ނިއުކްލިޔަރ ހަތިޔާރުގެ ތަސައްވުރު ދޫކޮށް ނުލާ ނަމަ އީރާނަށް ޙަމަލާދޭނެ ކަމުގެ އިންޒާރު ޓްރަމްޕް ދެއްވައިފި

Read Time:7 Minute, 17 Second

(ފޮޓޯ ކްރެޑިޓްސް: ރޮއިޓާރސް)

އީރާނުގެ ނިއުކްލިޔަރ ޕުރޮގުރާމުގެ ދަށުން ބިނާކޮށްފައިވާ މަރުކަޒުތަކަށް ޙަމަލާދޭނެ ކަމުގައި ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވައިފިއެވެ. އޭނާ މި މޭރުމުން އިންޒާރު ދެއްވާފައި ވަނީ، އީރާނުގެ ނިއުކްލިޔަރ ޕުރޮގުރާމާ ގުޅޭ ގޮތުން ދެ ޤައުމުގެ ދެމެދުގައި އެއްބަސްވުމެއް އެކުލަވައިލުމަށް ފަށާފައިވާ މަޝްވަރާތަކަށް އިޝާރާތް ކުރައްވައެވެ. ޓްރަމްޕް ބޭނުން ވަނީ އީރާނުގެ ނިއުކްލިޔަރ ޕުރޮގުރާމަށް ބާރު ފޯރުވައި، އެ ޕުރޮގުރާމު ކޮންޓުރޯލު ކުރުމަށެވެ. އެ ކަމާ ގުޅޭ ގޮތުން މަޝްވަރާ ކުރުމަށް ޓްރަމްޕް ދެއްވި ދަޢުވަތު ޤަބޫލުކޮށް، އޭޕްރިލް 12ވަނަ ދުވަހު އީރާނުން ވަނީ އެމެރިކާގެ އޮފިޝަލުންނާ އެކު ބައްދަލުވުމެއް ބާއްވާފައެވެ. އެ ބައްދަލުވުމުގައި ދެ ޤައުމުގެ ދެމެދުގައި މެދުވެރިއެއްގެ ދައުރު އަދާކޮށްފައި ވަނީ އޮމާނުންނެވެ.

އެ މަޝްވަރާތަކަށް އިޝާރާތް ކުރައްވައި ޓްރަމްޕް ވިދާޅުވީ، އެއްބަސްވުމެއް އެކުލަވައިލަން އީރާނުން ފަސްޖެހެމުންދާ ކަމުގައެވެ. އަދި، އެއީ ގަސްދުގައި ކުރާ ކަމެއް ކަމުގައި ވެސް އޭނާ ތުހުމަތު ކުރެއްވިއެވެ. ޓްރަމްޕް ވިދާޅުވީ، ނިއުކްލިޔަރ ހަތިޔާރު އުފެއްދުމަށް އީރާނުން ގެންގުޅޭ ތަސައްވުރު ދޫކޮށްލުމަށް އިންކާރު ކޮށްފި ނަމަ، އެ ޤައުމުގެ ނިއުކްލިޔަރ މަރުކަޒުތަކަށް އެމެރިކާއިން ނުރައްކާތެރި ޙަމަލާތަކެއް ދޭނެ ކަމުގައެވެ.

” އީރާނަށް އޮތް ހަމައެކަނި ގޮތަކީ ނިއުކްލިޔަރ ހަތިޔާރު އުފެއްދުމުގެ ތަސައްވުރު ދޫކޮށްލުން. އެ މީހުންނަށް ނިއުކްލިޔަރ ހަތިޔާރެއް ލިބުނަ ނުދޭ ނަން،”

ޑޮނަލްޑް ޓްރަމްޕް، އެމެރިކާގެ ރައީސް

އޮމާންގައި ބާއްވާފައިވާ މަޝްވަރާތަކުގައި އީރާން ތަމްސީލު ކުރައްވާފައި ވަނީ އެ ޤައުމުގެ ޚާރިޖީ ވަޒީރު ޢައްބާސް ޢަރާޤިޖީއެވެ. އަދި، އެމެރިކާގެ ފަރާތުން ބައިވެރިވެ ވަޑައިގަންނަވާފައި ވަނީ ޓްރަމްޕްގެ ޚާއްޞަ މަންދޫބު ސްޓީވް ވިޓްކޮފެވެ. “އަޅުގަނޑަށް ހީވަނީ އެ މީހުން އޮޅުވައިލައި [މަޝްވަރާތައް] ދިގުދަންމަން މަސައްކަތް ކުރަމުންދާ ހެން،” ވިޓްކޮފާ އެކު ބެއްވި ބައްދަލުވުމަކަށް ފަހު ނޫސްވެރިންނާ ވާހަކަފުޅު ދައްކަވަމުން ޓްރަމްޕް ވިދާޅުވިއެވެ. ފުރަތަމަ ބައްދަލުވުމަށް ފަހު އީރާނާއި އެމެރިކާއިން ވެސް ވަނީ، އެއީ ވަރަށް ކާމިޔާބު އަދި ބިނާކުރަނިވި މަޝްވަރާތަކެއްގެ ގޮތުގައި ސިފަކޮށްފައެވެ. މަޞްދަރުތަކުން ބުނީ، އެއްބަސްވުމެއް އެކުލަވައިލެވޭނެ ގޮތްތައް ހޯދުުމަށް އޮމާންގައި ބޭއްވި ބައްދަލުވުމުގައި ފުޅާ ދާއިރާއެއްގައި މަޝްވަރާ ކޮށްފައިވާ ކަމުގައެވެ. އަދި، މަޝްވަރާތަކުގެ އިތުރު ބައްދަލުވުމެއް އޭޕްރިލް 17ގައި ބޭއްވުމަށް ނިންމާފައިވާ ކަމުގައި ވެސް މަޞްދަރުތަކުން ބުންޏެވެ. އެ ބައްދަލުވުން އޮންނާނީ އިޓަލީވިލާތުގެ ވެރިރަށް ރޯމްގައި ކަމަށް ބެލެވެެއެވެ.

“އީރާނަށް އޮތް ހަމައެކަނި ގޮތަކީ ނިއުކްލިޔަރ ހަތިޔާރު އުފެއްދުމުގެ ތަސައްވުރު ދޫކޮށްލުން. އެ މީހުންނަށް ނިއުކްލިޔަރ ހަތިޔާރެއް ލިބުނަ ނުދޭ ނަން،” ޓްރަމްޕް ވިދާޅުވިއެވެ. އީރާނުގެ ނިއުކްލިޔަރ މަރުކަޒުތަކަށް އެމެރިކާއިން ޙަމަލާ ދިނުމާ މެދު ވިސްނަމުންދާތޯ ނޫސްވެރިއަކު ސުވާލު ކުރުމުން، “އާދެ އެ ގޮތް އެބައޮތް،” ކަމުގައި ވެސް ޓްރަމްޕް ވިދާޅުވިއެވެ. އަދި، އެމެރިކާއިން އީރާނާ ދެކޮޅަށް އަޅާފާނެ ހަރުކަށި ފިޔަވަޅުތަކުން ސަލާމަތްވުމަށް އެ ޤައުމުން ހަލުވި ދުވެލީގައި ގިނަ މަސައްކަތްތަކެއް ކުރަން ޖެހިފައިވާ ކަމުގައި ވެސް އޭނާ ވިދާޅުވިއެވެ.

ހުސްވި ހަފުތާގެ ތެރޭގައި ވެސް އެމެރިކާއިން ވަނީ އީރާނާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އިތުރަށް ހަރުކަށި ކޮށްފައެވެ. އީރާންގެ ނިއުކްލިޔަރ ޕުރޮގުރާމު ކޮންޓުރޯލު ކުރުމަށް އެމެރިކާއާ އެކު 2015ވަނަ އަހަރު ވެސް އެއްބަސްވުމެއް އެކުލަވައިލިއެވެ. ނަމަވެސް، އެ އެއްބަސްވުން ބާޠިލު ކޮށްފައި ވަނީ 2018ވަނަ އަހަރު ރައީސް ޓްރަމްޕްގެ ވެރިކަމުގެ ފުރަތަމަ ދައުރުގައެވެ. ޓްރަމްޕްގެ ނިންމުމާ ގުޅިގެން އީރާނުން ވަނީ ޔުރޭނިޔަމް މުއްސަނދި ކުރުމުގެ މަސައްކަތްތައް އިތުރަށް ފުޅާ ކޮށްފައެވެ.