ރެޑް ކްރޮސްގެ ޑޮކްޓަރުންނަށް ދިން ޙަމަލާގައި ގެއްލުނު އެކަކު ހުރީ ޔަހޫދީންގެ ބަންދުގައި: އައިސީއާރުސީ

Read Time:5 Minute, 46 Second

(ފޮޓޯ ކްރެޑިޓްސް: ރޮއިޓާރސް)

މިދިިޔަ މާރިޗު މަހުގެ ތެރޭގައި ޔަހޫދީން ފަލަސްޠީނުގެ ޣައްޒާގައި ޙަރަކާތްތެރިވަމުންދިޔަ ފަލަސްޠީނުގެ 15 އިންސާނީ ޚިދުމަތްތެރިންނަށް ޙަމަލާދީ ޝަހީދު ކޮށްލި ހާދިޘާގައި ވީނުވީއެއް ނޭނގި ގެއްލުނު ފަލަަސްޓީނިއަން ރެޑް ކްރެސެންޓުގެ ޑޮކޮޓަރު ހުރީ ޔަހޫދީންގެ ބެލުމުގެ ދަށުގައި ކަމަށް ޕަލަސްޓީނިއަން ރެޑް ކްރެސެންޓާއި ރެޑް ކޮރޮސުން ބުނެފިއެވެ. އިންޓަނޭޝަނަލް ކޮމިޓީ އޮފް ދަ ރެޑް ކްރޮސް، އައިސީއާރުސީގެ ތަރުޖަމާނު ޙިޝާމް މިހާނާ ވަނީ ޕަލަސްޓީނިއަން ރެޑް ކްރެސެންޓުގެ މުވައްޒަފެއް ކަމަށްވާ ޢައްސަދު އަލް-ނަޞަސްރާ ޔަހޫދީން ބަންދު ކޮށްފައިވާކަން ކަށަވަރު ކޮށްދެއްވައިފައެވެ. އޭނާ ވިދާޅުވީ އެ މަޢުލޫމާތު ލިބުމުން ޢައްސަދު އަލް-ނަޞަސްރާގެ ޢާއިލާއަށާއި ޕަލަސްޓީނިއަން ރެޑް ކްރެސެންޓް ސޮސައިޓީއަށް އެ ކަން އަންގާފައިވާ ކަމަށެވެ. އެ ކަމާ ގުޅޭގޮތުން ޔަހޫދީން މިހާތަނަށް އެއްޗެއް ބުނެފައެއް ނުވެއެވެ.

މިހާނާ ވިދާޅުވީ ނަޞަސްރާއާ ބައްދަލު ކުރުމަށް އަދި މުޢާމަލާތު ކުރުމަށް އައިސީއާރުސީއަށް ޔަހޫދީން ފުރުޞަތު ދީފައި ނުވާ ކަމަށެވެ. އޭގެ އިތުރުން ޔަހޫދީ ޖަލުތަކުގައި ބަންދު ކޮށްފައިވާ ފަލަސްޠީނުގެ ރަައްޔިތުންނާ ބައްދަލު ކުރުމުގެ ފުރުޞަތު ވެސް 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހުން ފެށިގެން ދީފައި ނުވާ ކަމަށް އޭނާ ފާހަގަ ކުރެއްވިއެވެ. އެކްސްގައި ކުރި ޕޯސްޓެއްގައި ޕަލަސްޓީނިއަން ރެޑް ކްރެސެންޓް ސޮސައިޓީން ވަނީ ނަޞަސްރާ މިހާރުން މިހާރުން މިނިވަން ކުރުމަށް ޔަހޫދީންނަށް ގޮވާލައިފައެވެ. އެ ޖަމާޢަތުން ބުނީ ޔަހޫދީން ނަޞަސްރާ ވަގަށް ނަގާފައި ވަނީ އިންސާނީ މަސައްކަތުގައި ޙަރަކާތްތެރިވަމުން ދަނިކޮށް ކަމަށެވެ. ނަޞަސްރާއާއި އޭނާއާއެކު މަސައްކަތުގައި އުޅުނު އިތުރު މީހުންނަށް ޔަހޫދީން ވަރުގަދަ ޙަމަލާއެއް އަމާޒު ކޮށް އެ ޙަމަލާގައި އަށް މީހުން ޝަހީދު ކޮށްލާފައިވާ ކަން ފާހަގަ ކުރަމުން ޕަލަސްޓީނިއަން ރެޑް ކްރެސެންޓް ސޮސައިޓީން ބުނީ އެއީ ބައިނަލްއަޤްވާމީ އިންސާނީ ޤާނޫނުތަކާ ޚިލާފަށް އެއްވެސް ބެލުމެއް ނެތި ދީފައިވާ ޙަމަލާއެއް ކަމަށެވެ.

މިދިޔަ މާރިޗު މަހުގެ ތެރޭގައި ރެޑް ކްރެސެންޓަށް ނިޞްބަތްވާ 8 ޑޮކްޓަރުންނާއި މަދަނީ ޚިދުމަތުގެ މެންބަރުންނާއި އދގެ މުވައްޒަފުން ހިމެނޭ ގޮތަށް އިންސާނީ މަސައްކަތުގައި ޙަރަކާތްތެރިވަމުން ދިޔަ 15 މީހެއްގެ ހަށިގަނޑު ފެނިފައި ވަނީ މާސިންގާ ވަޅުގަނޑެއް ކޮނެ އެ މީހުންގެ ފުރާނަ ނެތް ހަށިތައް ވަޅުލާފައި ވަނިކޮށެވެ. އދއާއި ރެޑް ކްރެސެންޓުން ވަނީ ޔަހޫދީން ދިން ވައިގެ ޙަމަލާތަކެއްގައި ޒަޚަމްތައް ލިބުނު ބަޔަކަށް އެހީތެރިވުމަށް ޑޮކްޓަރުންނާއި އިންސާނީ އެހީތެރިން ދަތުރު ކުރަމުން ދަނިކޮށް އެ މީހުންނަށް އަމާޒު ކޮށް ޙަމަލާދީ ޝަހީދު ކޮށްލީ ޔަހޫދީން ކަމަށް ތުހުމަތު ކޮށްފައެވެ. އިންސާނީ ޚިދުމަތްތެރިންނަށް ޔަހޫދީން ދިން ޙަމަލާގައި ސަލާމަތްވި ކަމަށް އެނގިފައިވާ ހަމައެކަނި މީހަކީ ޕަލަސްޓީނިއަން ރެޑް ކްރެސެންޓް ސޮސައިޓީގެ މުންޒިޒު ޢާބިދެވެ. އޭނާ ބުނީ ޔަހޫދީން ޙަމަލާ ދީފައި ވަނީ ކުއްލި ޙާލަތްތަކުގައި ޚިދުމަތް ފޯރުކޮށްދޭ އުޅަނދެއް ކަން ސާފު ކޮށް އެނގޭނޭހެން ފާހަގަ ކޮށްފައިވާ އުޅަނދަކަށް ކަމަށެވެ.