ސިޓީ މާބޮޑަށް ދަށްވީ މަސައްކަތް ނުކުރުމުން: ގުންޑޮގަން

Read Time:3 Minute, 57 Second

ފާއިތުވެދިޔަ ހަތަރު އަހަރުގެ ޕްރެމިއާ ލީގުގެ ޗެމްޕިއަން މެންޗެސްޓާ ސިޓީ މި ސީޒަނުގައި މާބޮޑަށް ދަށްވީ ކާމިޔާބު ހޯދަން ކުޅުންތެރިން ގަދަ އަޅައި މަސައްކަތް ނުކުރުމުން ކަމަށް މިޑްފީލްޑަރު އިކާއީ ގުންޑޮގަން ބުނެފި އެވެ. ޖަރުމަނުގެ ތަޖުރިބާކާރު މިޑްފީލްޑަރަކީ ސިޓީގެ އެންމެ ކާމިޔާބު ކެޕްޓަނެވެ. އަދި އޭނާ އަކީ ސިޓީގެ އެންމެ ކާމިޔާބު ސީޒަން ކަމަށްވާ 2023 ވަނަ އަހަރަށް ފަހު ބާސެލޯނާ އަށް އެއް ސީޒަން ކުޅެދީފައި މި ސީޒަނުގައި އަނެއްކާ ވެސް ސިޓީއާ ގުޅުނު ކުރީގެ ކެޕްޓަން އެވެ.

އުމުރުން 34 އަހަރުގެ ގުންޑޮގަން ބުނީ އަށް އަހަރު ސިޓީ އަށް ކުޅެ، ފަހު ދެތިން އަހަރު ކެޕްޓަންކަން ކުރުމަށްފަހު އޭނާ ބާސެލޯނާ އަށް ދިޔައިރު އޮތް ޓީމަށްވުރެ މި ސީޒަން ފެށިއިރު އޮތް ސިޓީގެ ޓީމުގެ މަސައްކަތުގެ ރޭޓު ދަށް ކަމަށެވެ. “ވަރަށް ގިނަ ކުޅުންތެރިން އިންޖަރީވި. ހާއްސަކޮށް (ޔޫރަޕުގެ އެންމެ މޮޅު ކުޅުންތެރިޔާ) ރޮޑްރީ. އެކަމަކު އަހަރެން ދެކޭ ގޮތުގައި އެންމެ ބޮޑު މައްސަލައަކީ ކާމިޔާބު ހޯދަން ބޭނުންވެގެން އެކަމަށް ކުރެވުނު މަސައްކަތް މަދީ. ގަދަ އަޅައި މޮޅުވާން ކުރި މަސައްކަތް ދަށްކޮށް ދިޔައީ ކުޅުންތެރިންގެ ފަރާތުން. އަނެއްހެން ބުނާނަމަ ޓެކްޓިކްސް އަށް މަސައްކަތް ކުރުމަށްވުރެ ޕޮޒިޝަން ހިފަހައްޓައިގެން އެމީހަކު ހުރި ތަނެއްގައި ހުންނަތަން ފެނުނީ،” ގުންޑޮގަން ބުންޏެވެ.

ނަމަވެސް އޭނާ ބުނީ ޓީމަށް ގެނައި ބަދަލުތަކަށް ފަހު ހާއްސަކޮށް ޒުވާން ކުޅުންތެރިން ގެނައުމުން ސީޒަނުގެ ފަހު ބައިގައި ސިޓީގެ ފަރާތުން ގިނަ ކަންކަން ބަދަލުވެފައިވާ ކަމަށެވެ. “ހާއްސަކޮށް އަހަރެން ބުނާނީ މާޗު މަހު ގައުމީ ޓީމުގެ މެޗުތަކަށް ފަހު ޓީމަށް ކުރިއެރުން ލިބިއްޖެކަމަށް. އޭގެ ހެއްކެއް އެފްއޭކަޕުގައި އަހަރުމެން ފަހަތުން އަރައި މެޗު ކާމިޔާބު ކުރުން. މިހާރު ޓީމުން އެބަފެނޭ ކުރިއެރުންތަކެއް،” ގުންޑޮގަން ބުންޏެވެ. ސިޓީ އަށް އަންނަ ސީޒަނުގެ ޗެމްޕިއަންސް ލީގުން ޖާގަ ހޯދުމުގެ އަމިއްލަ ބާރެއް މިހާރަކު ނެތެވެ. ނަމަވެސް އިނގިރޭސި ޕްރެމިއާ ލީގުގައި ބާކީ އޮތް ހަތް މެޗުން މޮޅުވެ ކޯޗު ޕެޕް ގާޑިއޯލާ އުއްމީދު ކުރަނީ ސިޓީ އަނެއްކާ ވެސް ޔޫރަޕުގެ އެންމެ ވަރުގަދަ މުބާރާތުގައި ކުޅޭނެ ކަމަށެވެ.