ދުނިޔެއަށް ކުރިމަތިވަމުންދާ ނުރައްކާތަކުން އަރައިގަތުމަށް މަޝްވަރާ އިސްކުރަން ހަލީލް ބާރުއަޅުއްވައިފި

Read Time:4 Minute, 5 Second

(ފޮޓޯ ކްރެޑިޓްސް: ޙާރިޖީ ވުޒާރާ)

ދުނިޔެއަށް ކުރިމަތިވަމުންދާ ނުރައްކާތަކުން އަރައިގަތުމަށްޓަކައި މަޝްވަރާ އާއި ޑިޕްލޮމެސީގެ އިސްކުރުމަށް ފޮރިން މިނިސްޓަރު ޑރ. އަބްދުﷲ ހަލީލް ބާރުއަޅުއްވައިފި އެވެ. އަންތާލިޔާ ޑިޕްލޮމަސީ ފޯރަމްގެ ހަތަރު ވަނަ އެޑިޝަންގެ ތެރޭގައި ޖަޕާނުގެ ސަސަކާވާ ޕީސް ފައުންޑޭޝަން އާ ގުޅިގެން “ޖިއޯސްޓްރެޓެޖިކް ޑައިނަމިކްސް އިން ދަ އޭޝިއާ ޕެސިފިކް”ގެ ނަމުގައި ބޭއްވި މަތީ ފެންވަރުގެ ޕެނަލް ޑިސްކަޝަންގައި، ބައިވެރިވެވަޑައިގެން ވާހަކަ ދައްކަވަމުން ޚަލީލް ވަނީ މި ސަރަހައްދުގެ ޖިއޮޕޮލިޓިކަލް މަސްރަހު ބަދަލުވަމުންދާ ގޮތުގެ މައުލޫމާތު ހިއްސާކުރައްވައިފަ އެވެ.

މިގޮތުން، ދުނިޔެއަށް ކުރިމަތިވަމުންދާ ނުރައްކާތަކުން އަރައިގަތުމަށްޓަކައި މަޝްވަރާ އާއި ޑިޕްލޮމެސީގެ އުސޫލުތައް އިސްކުރުމުގެ މުހިންމު ދައުރުގެ މައްޗަށް އަލިއަޅުއްވާލައްވައި، މިނިސްޓަރު ވަނީ އެކަމަށް ބާރުއަޅުއްވައިފަ އެވެ. އަދި ދުނިޔޭގެ މަސްރަހުގައި ދިމާވާ އެކިއެކި ނުތަނަވަސްކަން ކުޑަކުރުމުގައި ސަރަހައްދީ އަދި ބަނަލްއަގުވާމީ ޖަމްއިއްޔާތަކުން އަދާކުރަމުންދާ މުހިންމު ދައުރު ހަލީލް ވަނީ ފާހަގަކުރައްވައިފަ އެވެ.

(ފޮޓޯ ކްރެޑިޓްސް: ޙާރިޖީ ވުޒާރާ)

އެ ޕެނަލް ޑިސްކަޝަންގައި މިނިސްޓަރު ވަނީ، މޫސުމަށް އަންނަ ބަދަލުތަކުގެ ސަބަބުން ކުދި ޖަޒީރާ ގައުމުތަކަށް ކުރަމުންދާ ނޭދެވޭ އަސަރުތަކުގެ މައްޗަށް ވެސް ވާހަކަ ދައްކަވައިފަ އެވެ. މީގެއިތުރުން، ގުދުރަތީ ގޮތުން، ރާއްޖެ އޮތް ސަރަހައްދުގެ މުހިންމުކަމުގެ މައްޗަށް އަލިއަޅުއްވާލައްވައި، ރާއްޖޭގެ ސަލާމަތާއި ފާގަތިކަމަކީ، މުޅި ސަރަހައްދުގެ ހަމަޖެހުމާ ވަރަށް ބޮޑަށް ގުޅިލާމެހިފައިވާ ކަމެއްކަން ހަލީލް ފާހަގަކުރެއްވި އެވެ. މި ޕެނަލް ޑިސްކަޝަންގައި ހަލީލުގެ އަރިހުގައި ސަސަކަވާ ޕީސް ފައުންޑޭޝަންގެ ރައީސް ޑރ. އަޓްސުޝީ ސުނާމީ އާއި ސްޓޮކްހޯމް ސެންޓާ ފޮ ސައުތު އޭޝިއަން އެންޑް އިންޑޯ ޕެސިފިކް އެފެއާޒްގެ ހެޑް ޕްރޮފެސާ ޖަގަނަތު ޕަންޑާ ވެސް ބައިވެރިވެވަޑައިގަތެވެ.

އަންތާލިޔާ ޑިޕްލޮމަސީ ފޯރަމްގައި ބައިވެރިވެވަޑައިގަތުމަށް ހަލީލް ތުރުކީވިލާތަށް ވަޑައިގެންނެވީ އެ ގައުމުގެ ހާރިޖީ ވަޒީރު ހަކާން ފިދާންގެ ދައުވަތަކަށެވެ.