އެސްޓަން ވިލާއިން ޗެމްޕިއަންސް ލީގުގެ ފުރުސަތު ބޮޑުކޮށްފި

Read Time:3 Minute, 46 Second

އިނގިރޭސި ޕްރިމިއަރ ލީގުގައި ރޭ ސައުތެމްޓަނާ ދެކޮޅަށް ކުޅުނު މެޗު 3-0 ގެ ނަތީޖާއަކުން ކާމިޔާބުކޮށް، ކުރިއަށް އޮތް ސީޒަނުގެ ޔުއެފާ ޗެމްޕިއަންސް ލީގުގެ ފުރުސަތު އެސްޓަން ވިލާއިން ބޮޑުކޮށްފިއެވެ. މި މެޗުން އެސްޓަން ވިލާ މޮޅުވުމާއިއެކު އެ ޓީމަށް ވަނީ ލީގުގައި މިހާތަނަށް ކުޅުނު 32 މެޗުން 54 ޕޮއިންޓާއެކު ތާވަލުގެ ފަސްވަނަ މަގާމް ލިބިފަ އެވެ. ސައުތެމްޓަން އަށް 32 މެޗުން ލިބިފައިވާ 10 ޕޮއިންޓާއެކު އެ ޓީމު އޮތީ ތާވަލުގެ ފުލުގަ އެވެ. ސައުތެމްޓަންގެ ދަނޑުގައި ތިރީސް ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ކާމިޔާބު ކުރެވިފައިނުވި ނަމަވެސް އެސްޓަން ވިލާ އަށް ވަނީ ލަނޑު ޖަހަން ރަގަޅު ފުރުސަތުތަކެއް ލިބިފަ އެވެ.

މި މެޗުގެ 69 ވަނަ މިނިޓުގައި އެސްޓަން ވިލާއަށް ވަނީ ލީޑު ނަގަން ރަގަޅު ފުރުސަތެއް ލިބިފަ އެވެ. އެގޮތުން އެ ޓީމަށް ލިބުނު ޕެނަލްޓީ މާކޯ އަސެންސިއޯ ފޮނުވާލިއިރު ސައުތެމްޓަންގެ ކީޕަރު އާރޮން ރަމްސްޑޭލް ވަނީ އެ ބޯޅަ މަތަކޮށްފަ އެވެ. ނަމަވެސް އޭގެ ތިން މިނިޓު ފަހުން އެސްޓަން ވިލާގެ ޔޫރީ ޓިއެލެމަންސް ދިން ޕާހަކުން އޮލީ ވޮޓްކިންސް ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. އަދި އޭގެ ހަ މިނިޓު ފަހުން ޑޮންޔެލް މަލެން ވަނީ އެސްޓަން ވިލާއަށް އިތުރު ލަނޑެއް ޖަހައިދީ މެޗުގެ ނަތީޖާ 2-0 އަށް ބަދަލުކޮށްފަ އެވެ.

އެސްޓަން ވިލާއިން މި މެޗުގައި ޖެހި ތިންވަނަ ލަނޑަކީ މެޗުގެ އިތުރު ވަގުތުގައި އެ ޓީމަށް ލިބުނު ޕެނަލްޓީއެއް މާކޯ އަސެންސިއޯ ފޮނުވާލުމުން ކީޕަރު ރަމްސްޑޭލް އަތުގައި ޖެހިފައި ނިކުތް ވަގުތުޖޯން މެކްގިން ދެވަނަ ފަހަރަށް ޖަހާ ގޯލުގެ ތެރެއަށް ފޮނުވާލައިގެން ކާމިޔާބުކޮށްފައިވާ ލަނޑެކެވެ. ޗެމްޕިއަންސް ލީގުގެ ޖާގައެއް ހޯދުމުގެ ފުރުސަތު އެސްޓަން ވިލާއަށް ބޮޑު ވެފައިވާއިރު އެ ޓީމުން ވަނީ މި ސީޒަނުގެ މުބާރާތުގެ ކުއާޓަރ ފައިނަލުގެ ޖާގައެއް ހޯދާފަ އެވެ. އަދި މި ހަފްތާގައި ކުއާޓަރ ފައިނަލުގެ ދެވަނަ ލެގުގައި ފްރާންސްގެ ޕީއެސްޖީ އާއި ދެކޮޅަށް އެސްޓަން ވިލާ ނިކުންނާނެ އެވެ.