އެވަޓަންއިން އާސެނަލް ހިފަހައްޓައިފި

Read Time:3 Minute, 44 Second

އިނގިރޭސި ޕްރިމިއަރ ލީގުގައި އިއްޔެ އާސެނަލް އާއި އެވަޓަން މެޗު 1-1 ގެ ނަތީޖާއަކުން އެއްވަރުވެއްޖެއެވެ. މި ނަތީޖާ އާއިއެކު އާސެނަލް އިން ލީގު ހޯދުމަށް ކުރަމުންދާ މަސައްކަތަކަށް ވަނީ ހީނަރުކަން ލިބިފަ އެވެ. އާސެނަލް އަށް ލީގުގައި މިހާތަނަށް ކުޅުނު 31 މެޗުން 62 ޕޮއިންޓާއެކު ތާވަލުގެ ދެވަނަ މަގާމް ލިބިފައިވާއިރު އެއްވަނައިގައި އޮތް ލިވަޕޫލް އަށް އެއް މެޗު މަދުން ކުޅެގެން ލިބިފައިވަނީ 73 ޕޮއިންޓެވެ. އެވަޓަން އަށް ލިބިފައިވާ 35 ޕޮއިންޓާއެކު އެ ޓީމު އޮތީ ތާވަލުގ 14 ވަނައިގަ އެވެ. އެވަޓަންގެ ގުޑިސަން ޕާކުގައި ކުޅުނު މި މެޗުގައި އާސެނަލް އިން ވަނީ މެޗު ޑޮމިނޭޓްކޮށް އިދިކޮޅު ޓީމުގެ ގޯލަށް ގިނަ ހަމަލަތަކެއް ފޮނުވާލާފަ އެވެ. ނަމަވެސް މި މެޗުގައި އެވަޓަންގެ ކީޕަރު ޕިކްފޯޑްގެ ފަރާތުން ވަނީ މޮޅު ކުޅުމެއް ފެނިފަ އެވެ.

މެޗުގެ 34 ވަނަ މިނިޓުގައި އާސެނަލްގެ ރަހީމް ސްޓާލިން ދިން ޕާހަކުން ލިއަންދްރޯ ޓްރޮސާޑް ވަނީ ލަނޑެއް ޖަހާ އާސެނަލް އަށް ކުރި ހޯދަދީފަ އެވެ. އަދި ފުރަތަމަ ހާފުގެ ކުޅުން ނިމުމުގެ ކުރިން ޓްރޮސާޑް ފޮނުވާލި އިތުރު ހަމަލައެއް ކީޕަރު ޕިކްފޯޑް ވަނީ މަތަކޮށްފަ އެވެ. އެވަޓަން އިން މެޗުގެ ނަތީޖާ އެއްވަރުކޮށްފައިވަނީ ދެވަނަ ހާފުގެ ކުޅުން ފެށުނުތާ ފުރަތަމަ މިނިޓުގައި އާސެނަލްގެ މައިލްސް ލެވިސް-ސްކެލީ އެވަޓަންގެ ޖެކް ހެރިސަން އަށް ފައުލް ކުރުމާއި ގުޅިގެން އެ ޓީމަށް ލިބުނު ޕެނަލްޓީ އަކުން އިލިމަން އެންޑިއާއޭ އެވެ. އިނގިރޭސި ޕްރިމިއާ ލީގުގައި ރޭ ނޮޓިންހަމް ފޮރެސްޓް އާއި ދެކޮޅަށް އެސްޓަން ވިލާ ކުޅުނު މެޗު 2-1 ގެ ނަތީޖާއަކުން އެސްޓަން ވިލާއިން ވަނީ ކާމިޔާބުކޮށް ތާވަލުގެ ހަވަނަ މަގާމް ހޯދާފަ އެވެ.

ލީގުގައި މިހާތަނަށް ކުޅުނު 31 މެޗުން އެސްޓަން ވިލާއަށް ވަނީ 51 ޕޮއިންޓާއެކު ހަވަނަ ލިބިފަ އެވެ. ފަސްވަނައިގައި އޮތް މެންޗެސްޓަރ ސިޓީ އަށްވެސް 51 ޕޮއިންޓް ލިބިފައިވާއިރު އެ ޓީމަށް ކުރި ލިބިފައިވަނީ ފައިދާ ގޯލުންނެވެ. ނޮޓިންހަމް ފޮރެސްޓަށް ލިބިފައިވާ 57 ޕޮއިންޓާއެކު އެ ޓީމު އޮތީ ތާވަލުގެ ތިންވަނަ މަގާމުގަ އެވެ.