ހަ މެޗު ބާކީ އޮއްވައި ޕީއެސްޖީން ލީގު ޗެމްޕިއަންކަން ހޯދައިފި

Read Time:4 Minute, 34 Second

ފްރެންޗް ލީގުގައި ބާކީ ހަ މެޗު ކުޅެން އޮއްވައި ޕީއެސްޖީން ލީގު ޗެމްޕިއަންކަން ހޯދައިފިއެވެ. ޕީއެސްޖީ އިން ލީގު ޗެމްޕިއަންކަން ޖެހިޖެހިގެން ހަތަރުވަނަ ފަހަރަށް ހޯދާފައިވަނީ ރޭ އެންޖާރސް އާއި ދެކޮޅަށް ކުޅުނު މެޗު 1-0 ގެ ނަތީޖާއަކުން ކާމިޔާބުކޮށްގެންނެވެ. މި މެޗަށް ނިކުތްއިރުވެސް ޕީއެސްޖީ އަށް ޕޮއިންޓެއް ހޯދައިގެން ލީގު ޗެމްޕިއަންކަން ކަށަވަރުވާނެ އެވެ. މި މެޗުން މޮޅުވުމާއިއެކު ޕީއެސްޖީ އަށް ވަނީ ލީގުގައި މިހާތަނަށް ކުޅުނު 28 މެޗުން 74 ޕޮއިންޓާއެކު ތާވަލުގެ އެއްވަނަ މަގާމް ލިބިފަ އެވެ. ދެވަނައިގައި އޮތް މޮނާކޯ އަށް 28 މެޗުން ލިބިފައިވަނީ 50 ޕޮއިންޓެވެ.

އެންޖާރސް އާއި ދެކޮޅަށް އަމިއްލަ ދަނޑުގައި ޕީއެސްޖީ ކުޅުނު މި މެޗުގައި ފެނިގެންދިޔަ ހަމައެކަނި ލަނޑު މެޗުގެ 55 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ ޒުވާން މިޑްފީލްޑަރ ޑިސަޔާ ޑުއޭ އެވެ. ޖެހިޖެހިގެން ހަތަރުވަނަ ފަހަރަށް ފްރެންޗް ލީގުގެ ޗެމްޕިއަންކަން ހޯދުމަށްފަހު ޕީއެސްޖީގެ ކޯޗު ލުއިސް އެންރީކޭ ބުނެފައިވަނީ ލީގުގައި ހަ މެޗު އަދި ކުޅެން އޮއްވާ ޗެމްޕިއަންކަން ލިބުނު ނަމަވެސް އެ ޓީމުން ބޭނުންވަނީ ކުރިއަށް އޮތް ހަ މެޗުންވެސް މޮޅުވާން ކަމަށެވެ. ޕީއެސްޖީ އިން މި ސީޒަނުގައި މިހާތަނަށް ކުޅުނު 28 މެޗުގެ ތެރެއިން އެއްވެސް މެޗަކުން ބަލިވެފައެއް ނުވެއެވެ. އޭގެ ތެރެއިން 23 މެޗުން މޮޅުވެފައިވާއިރު ފަސް މެޗު ވަނީ އެއްވަރުވެފަ އެވެ.

ލީގުގައި ބާކީ އޮތް ހަ މެޗުން ބަލިނުވެ ޕީއެސްޖީ ލީގު ނިންމާލައިފިނަމަ އެ ޓީމު ވެގެންދާނީ ޔޫރަޕްގެ އެންމެ ވަރުގަދަ ފަސް ލީގުގެ ތެރެއިން މެޗަކުން ބަލިނުވެ ލީގު ނިންމާލީ ހަތްވަނަ ޓީމަށެވެ. މީގެ ކުރިން މި ރެކޯޑް ހަދާފައިވާ ކްލަބްތަކަކީ 2024 ވަނަ އަހަރު ޗެމްޕިއަންކަން ހޯދި ބެޔާ ލެވަކޫސަން އާއި 2012 ވަނަ އަހަރު ސެރިއާގެ ޗެމްޕިއަންކަން ހޯދި ޔުވެންޓަސް އާއި 2004 ވަނަ އަހަރު ޕްރިމިއާ ލީގު ކާމިޔާބުކުރި އާސެނަލް އާއި 1992 ވަނަ އަހަރު ސެރިއާގެ ޗެމްޕިއަން އޭސީ މިލާނުގެ އިތުރުން 1979 ގެ ޗެމްޕިއަން ޕެރޫޖިއާ އަދި 1889 ވަނަ އަހަރުގެ ޗެމްޕިއަން ޕްރެސްޓަން ނޯތު އެވެ.

ފްރެންޗް ލީގުގެ ޗެމްޕިއަންކަން ޕީއެސްޖީ އިން ހޯދާފައިވާއިރު ޔޫއެފާ ޗެމްޕިއަންސް ލީގުގެ ކުއާޓަރ ފައިނަލުގައި އެސްޓަން ވިލާ އާއި ދެކޮޅަށް މި މަހު ނިކުންނާނެ އެވެ. އަދި އަންނަ މެއި މަހުގެ ފަހުކޮޅު ފްރެންޗް ކަޕްގެ ފައިނަލުގައި ރެއިމްސް އާއި ދެކޮޅަށް ޕީއެސްޖީ ކުޅޭނެ އެވެ. އެހެންކަމުން މި ސީޒަނުގައި ތިން މުބާރާތް ކާމިޔާބު ކުރުމުގެ ފުރުސަތު އެ ޓީމަށް ވަނީ ލިބިފަ އެވެ.