ބައިނަލްއަޤްވާމީ 44 އެއަރލައިނެއްގެ ދަތުރުތައް ރާއްޖެއަށް

Read Time:3 Minute, 33 Second

(ފޮޓޯ ކްރެޑިޓްސް: އެމްއޭސީޢެލް)

ބައިނަލްއަޤްވާމީ 44 އެއަރލައިނަކުން ރާއްޖެއަށް މިހާރު ދަތުރުކުރަމުން އަންނަކަމަށް ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކައިފިއެވެ. ރާއްޖެއަކީ އަބަދުވެސް ބައިނަލްއަޤްވާމީ އެއަރލައިންތަކުން ދަތުރުކުރަން ބޭނުންވާ މަންޒިލެކެވެ. މޯލްޑިވްސް ޓޫރިޒަމް އަޕްޑޭޓް ރިޕޯޓުން ދައްކާގޮތުން ދުނިޔޭގެ އެކި ކަންކޮޅުތަކުން 44 އެއަރލައިނަކުން މިހާރު ދަނީ ރާއްޖެއަށް ދަތުރުކުރަމުންނެވެ. މީގެތެރޭގައި ޔޫރަޕާއި، މެދުއިރުމައްޗާއި، އޭޝިއާ ސަރަޙައްދުގެ އެއަރލައިންތައްވެސް ހިމެނެއެވެ. އަދި މިހާރުވެސް ގިނަ އެއަރލައިންތަކަކުން ދަނީ ރާއްޖެއަށް ދަތުރުކުރުމުގެ ޝައުގުވެރިކަން ފާޅުކުރަމުންނެވެ.

ފަތުރުވެރިކަމާ ބެހޭ ވުޒާރާގެ ތަފާސްހިސާބުތައް ދައްކާގޮތުން މިމަހުގެ 2 ވަނަ ދުވަހުގެ ނިޔަލަށް ރާއްޖެއަށް 647،677 ފަތުރުވެރިން ވަނީ ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާއި އަޅާބަލާއިރު %5.2 އިތުރުވުމެކެވެ.

(ފޮޓޯ ކްރެޑިޓްސް: ޕީޢެސްއެމް ނިއުސް)

އަހަރުގެ މިހާތަނަށް ރާއްޖެ އައި ފަތުރުވެރިން ޗުއްޓީ ހޭދަކޮށްފައިވާ ތަންތަން:

• ރިސޯޓް: %69.4 (449،382 މީހުން)
• ގެސްޓްހައުސް: %25.2 (162،928 މީހުން)
• ހޮޓެލް: %2.9 (18،879 މީހުން)
• ސަފާރީ: %2.5 (16،041 މީހުން)

ރާއްޖޭގައި މިވަގުތު ފަތުރުވެރިންނަށް ޚިދުމަތް ދިނުމަށް 1201 ތަނެއް ވަނީ ހުޅުވާފައެވެ. މި ތަންތަނުގެ ބެޑް ކެޕޭސިޓީ 65،561 އަށް އަރާކަމަށް މޯލްޑިވްސް ޓޫރިޒަމް އަޕްޑޭޓް ރިޕޯޓުން ދައްކައެވެ. މީގެތެރެއިން %97.3 އެނދު މިހާރުވެސް ހުރީ އޮޕަރޭޝަންގައެވެ. އަހަރުގެ މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން އައިސްފައިވަނީ ޗައިނާއިންނެވެ. އެއީ ފަތުރުވެރިންގެ %11.6 އެވެ. ޗައިނާއިން ޖުމްލަ 75،135 ފަތުރުވެރިން ވަނީ އައިސްފައެވެ. 2 ވަނައިގައި އޮތީ ރަޝިއާއެވެ. އެއީ %10.6 އާއިއެކު 68،375 ފަތުރުވެރިން އައިސްގެންކަމަށް ތަފާސްހިސާބުތަކުން ދައްކައެވެ.