Read Time:4 Minute, 51 Second
(ފޮޓޯ ކްރެޑިޓްސް: އިއަން)
ލިވަޕޫލް ފުޓްބޯޅަ ކްލަބާއި ވިޒިޓް މޯލްޑިވްސްއާ ދެމެދު އަލަށް ވެވުނު ވިޔަފާރި އެއްބަސްވުމަކީ ހަމައެކަނި ފަތުރުވެރިކަމުގެ ދާއިރާއަށް އަމާޒުކޮށްގެން ވެވުނު އެއްބަސްވުމެއް ނޫން ކަމަށާއި ރާއްޖެ ބޭނުންވާ އަމާޒަށް ވާސިލް ވުމަށް އެހީތެރިވެދޭނެ ކަމަށް ލިވަޕޫލްގެ ކުރީގެ ކުޅުންތެރިއެއް ކަމަށްވާ އިއަން ރަޝް ވިދާޅުވެއްޖެއެވެ. ލިވަޕޫލްގެ ހޯމް ގްރައުންޑް އެންފީލްޑަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރެއްވި ޒިޔާރަތާ ގުޅިގެން އިއަން ރަޝް އިންސްޓަގްރާމުގައި ޕޯސްޓެއް ކުރައްވާފައިވެއެވެ. މި ޕޯސްޓުގައި އޭނާ ވިދާޅުވެފައިވަނީ ލިވަޕޫލް އެފްސީ އާއި ވިޒިޓް މޯލްޑިވްސްއާ ދެމެދު ވެވުނު މި އެއްބަސްވުމަކީ ދެފަރާތުގެ މެދުގައި ހިއްސާކުރެވޭ އަގުތަކާ ގުޅޭ އެއްބަސްވުމެއް ކަމަށެވެ.
“މި އެއްބަސްވުމަކީ ހަމައެކަނި ފަތުރުވެރިކަމާ ގުޅޭ އެއްބަސްވުމެއް ނޫން. މިއީ ދެމެހެއްޓެނިވި ގޮތެއްގައި ތަރައްޤީ ވުމާއި އަޅުގަނޑުމެންގެ ދުނިޔެ ރައްކާތެރިކުރުމާ ގުޅޭ ގޮތުން ދެފަރާތުން ހިއްސާކުރާ އަގުތަކާ ގުޅޭ އެއްބަސްވުމެއް،” އިއަން ރަޝް ވިދާޅުވިއެވެ.
ވިޒިޓް މޯލްޑިވްސްއިން ރާއްޖޭގެ ތިމާވެށި ރައްކާތެރިކުރުމަށް ކުރާ މަސައްކަތްތަކަށް އިޝާރާތްކުރައްވައި، ކަނޑުގެ މާޙައުލު ރައްކާތެރިކުރުމާއި ދެމެހެއްޓެނިވި ފަތުރުވެރިކަމަށް ވިޒިޓް މޯލްޑިވްސްއިން ދޭ އަހައްމިއްޔަތު ފާހަގަކުރެއްވިއެވެ. މޫސުމަށް އަންނަ ބަދަލުތަކާއި ކަނޑުގެ ލޮނުގަނޑު އުފުލުމުގެ ސަބަބުން ރާއްޖެއަށް ކުރިމަތިވެދާނެ ނުރައްކާތަކަށް އިޝާރާތްކުރައްވައި، މިފަދަ މައްސަލަތަކަށް ހޭލުންތެރިކަން އިތުރުކުރުމަށް ލިވަޕޫލް އެފްސީގެ “ދަ ރެޑް ވޭ” ޕްރޮގްރާމްގެ ދަށުން މަސައްކަތްކުރާނެ ކަމަށް އިއަން ރަޝް ވިދާޅުވިއެވެ.
“ވިޒިޓް މޯލްޑިވްސްއަކީ ކަނޑުގެ ލޮނުގަނޑު އުފުލުމާއި މޫސުމަށް އަންނަ ބަދަލުތަކުގެ ނުރައްކާ ބޮޑު ޖަޒީރާ ގައުމަކަށް ދިމާވެފައިވާ މުހިންމު މައްސަލަތަކެއް. މި ޕާޓްނަރޝިޕްމެދުވެރިކޮށް އެލްއެފްސީން ވިޒިޓް މޯލްޑިވްސްއާއި ގުޅިގެން މިމަސައްކަތްތަކަށް އެހީތެރިކަން ފޯރުކޮށްދީ، ކްލަބުގެ އެވޯޑް ހާސިލްކޮށްފައިވާ ސަސްޓެއިނަބިލިޓީ ޕްރޮގްރާމް، ދަ ރެޑްވޭގެ ބޭނުން ހިފައި، ހޭލުންތެރިކަން އިތުރުކުރުމަށާއި، ހެޔޮ ފިޔަވަޅުތައް އެޅުމަށް ވަނީ ހަމަޖެހިފައި.” އިއަން ރަޝް ވިދާޅުވިއެވެ.
ލިވަޕޫލް އެފްސީގެ 200 މިލިއަނަށްވުރެ ގިނަ ފޮލޯވަރުންނާއި، ފާއިތުވި ސީޒަންގައި ލިބުނު 12 ބިލިއަނަށްވުރެ ގިނަ ވިއުސްއާ އެކު، ދުނިޔޭގެ އެކި ކަންކޮޅުތަކުގައި ތިބި ފޭންސްއާ ގުޅުން ބަދަހިކުރުމުގައި ލިވަޕޫލް އެފްސީއިން ކުރިއަރަމުންދާކަން ފާހަގަކުރެއްވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0