އދ.ގެ އަންހެނުންގެ ކޮމިޝަނަށް ރާއްޖެ ފުރަތަމަ ފަހަރަށް އިންތިޚާބުވުމަކީ ލިބުނު ފަޚުރެއް: ރައީސް

Read Time:5 Minute, 7 Second

(ފޮޓޯ ކްރެޑިޓްސް: ރައީސް އޮފީސް)

އދ.ގެ ކޮމިޝަން އޮން ދަ ސްޓޭޓަސް އޮފް ވިމެންއަށް ދިވެހިރާއްޖެ ފުރަތަމަ ފަހަރަށް އިންތިޚާބުވުމަކީ ލިބުނު ފަޚުރެއްކަމަށާއި، އަންހެނުންގެ ކުރިއެރުމާއި ޙައްޤުތައް ޙިމާޔަތްކުރުމަށް ކުރެވޭ މަސައްކަތުގައި އަބަދުވެސް ގުޅިގެން މަސައްކަތްކުރުމަށް، ދިވެހިރާއްޖެއިން އޮންނާނީ ތައްޔާރަށްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އދ.ގެ އަންހެނުންގެ ތަރައްޤީއަށް މަސައްކަތްކުރާ ޖަމްޢިއްޔާގެ މެމްބަރަކަށް ދިވެހިރާއްޖެ އިންތިޚާބުވުމާއި ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައެވެ.

އދ. ގެ އަންހެނުންގެ ތަރައްޤީއަށް އަދި އަންހެނުންގެ ޙައްޤުތަކަށް މަސައްކަތްކުރާ ޖަމްޢިއްޔާއަކީ، އަންހެނުންގެ ޙައްޤުގައި މަސައްކަތްކުރާ ބައިނަލްއަޤުވާމީ އެންމެ ބޮޑު އެއް ޖަމްޢިއްޔާއެވެ. އދ.ގެ މެމްބަރު 193 ޤައުމުގައި އަންހެނުންގެ ޙައްޤުތައް ކަށަވަރުކުރުމަށް ބާރުއަޅާ މި ޖަމްޢިއްޔާގެ މެމްބަރުކަން ރާއްޖެއަށް ލިބުނު މިއީ ފުރަތަމަ ފަހަރެވެ. މިކަން ފާހަގަކުރައްވާ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރެއްވި ޕޯސްޓުގައި ވިދާޅުވީ، ރާއްޖެ އެޖަމްޢިއްޔާގެ މެމްބަރު ޤައުމަކަށް ވެގެންދިޔުމަކީ ލިބިގެންދިޔަ ޝަރަފެއްކަމަށެވެ.

It is a great honour for the Maldives to be elected for membership of the Commission on the Status of Women (@UN_Women) for the 2026-2030 term.

I further extend congratulations to all countries who were elected to the Commission today. Through collective partnership, we stand…

— Dr Mohamed Muizzu (@MMuizzu) April 4, 2025

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އަންހެނުންގެ ޙައްޤުތައް ކަށަވަރުކުރުމަށާއި އަންހެނުންގެ ކުރިއެރުމަށް ކުރެވޭ ކޮންމެ ކަމެއްގައިވެސް ރާއްޖެއިން އަބަދުވެސް އޮންނާނީ ތައްޔާރަށްކަމަށެވެ. އަދި މިވޭތުވެދިޔަ ތަނުގައި އަންހެނުން ބާރުވެރިކުރުވުމަށް ރާއްޖެއިން ފާހަގަކޮށްލެވޭ ފަދަ މަސައްކަތްތަކެއް ޤައުމީ ފެންވަރުގައާއި ބައިނަލްއަޤުވާމީ ފެންވަރުގައި ކުރައްވާފައިވާކަން އެމަނިކުފާނު ފާހަގަކުރެއްވިއެވެ. ރައިސުލްޖުމްހޫރިއްޔާގެ ޕޯސްޓުގައިވަ ނީ ރާއްޖެއާއެކު ކުރިއަށް އޮތް 4 އަހަރަށް އެޖަމްޢިއްޔާގެ މެމްބަރުކަން ލިބިގެންދިޔަ އެހެން ޤައުމުތަކަށްވެސް މަރުޙަބާ ދަންނަވާފައެވެ. އަދި ކުރިއަށް އޮތް ދުވަސްތަކަކީ ހުރިހާ މެމްބަރު ޤައުމުތަކާއި ގުޅިގެން ޖަމްޢިއްޔާގެ ކުރިއެރުމަށްވެސް މުހިންމު މަސައްކަތްތަކެއް ކުރެވޭނެ ދުވަސްތަކަކަށްވާނެކަމަށް ޤަބޫލުފުޅުކުރައްވާކަމަށް އެމަނިކުފާނު ވިދާޅުވިއެވެ.

ރާއްޖެ އަދ.ގެ އަންހެނުންގެ ތަރައްޤީއަށާއި ޙައްޤުތައް ޙިމާޔަތްކުރުމަށް މަސައްކަތްކުރާ “ޔޫއެން ވިމެން”ގެ މެމްބަރަކަށް އިންތިޚާބުވެފައިވަނީ 2026 ވަނަ އަހަރުން ފެށިގެން 2030 ވަނަ އަހަރުގެ ނިޔަލަށެވެ. މިއީ ރާއްޖެ އެޖަމްޢިއްޔާގެ މެމްބަރަކަށް އިންތިޚާބުވީ ފުރަތަމަ ފަހަރެވެ.