Read Time:3 Minute, 43 Second
ދެކުނު އޭޝިޔާގެ ފުޓްބޯޅަ ޖަމިއްޔާ (ސާފް)ގެ ޖެނެރަލް ސެކްރެޓަރީ އަކަށް ނޭޕާލްގެ ޕުރުޝޮޓަމް ކަޓޭލް ހަމަޖައްސައިފި އެވެ. އޭނާ އަކީ 17 އަހަރު ވަންދެން އޭޝިޔާގެ ފުޓްބޯޅައިގެ މައި ޖަމާއަތް ކަމަށްވާ (އޭއެފްސީ)ގައި ވެސް މަސައްކަތް ކޮށްފައިވާ ތަޖުރިބާކާރެކެވެ. އޭނާގެ މައިގަނޑު ދާއިރާ އަކީ ހިންގުމުގެ ދާއިރާ އެވެ. ސާފްގެ ޖެނެރަލް ސެކްރެޓަރީގެ މަގާމަށް އޭނާ އައްޔަންކުރީ ލަންކާގައި ބޭއްވި ސާފްގެ އެކްސްޓްރާ އޯޑިނަތީ ކޮންގްރެސްގަ އެވެ. އެއީ 2015 ވަނަ އަހަތުން ފެށިގެން ޖެނެރަލް ސެކްރެޓަރީގެ މަގާމު ފުރަމުން އައި އަންވަރުން ހައްގު މަގާމުން އިސްތިއުދާ ދެއްވުމުންނެވެ.
ކަޓޭލް ވިދާޅުވީ ސާފުގެ ޖެނެރަލް ސެކްރެޓަރީގެ މަގާމު ލިބުމަކީ އޭނާގެ ކެރިއަރުގައި ލިބުނު ވަރަށް ބޮޑު ކުރިއެރުމެއް ކަމަށެވެ. “އަހަރެން ވަރަށް އުފާވެއްޖެ ސާފުގެ ޖެނެރަލް ސެކްރެޓަރީގެ މަގާމު ލިބުމުން. މިއީ އަހަރެންގެ ކެރިއަރުގައި ލިބުނު ވަރަށް ބޮޑު ފުރުސަތެއް އަދި އެހާމެ ބޮޑު ޗެލެންޖެއް. އަހަރެންގެ ފުޓްބޯޅަ ކެރިއަރު ފެށުނު ފަހުން މިހާތަނަށް މިއީ ދެކުނު އޭޝިޔާއާ ވަރަށް ގާތުން މަސައްކަތް ކުރަމުން. މިއީ ވަރަށް ޗެލެންޖިން ރީޖަނެއް. ހަމަ މިއާއެކު ބުނަން ޖެހެނީ މިއީ ކުރިއަރަމުން އަންނަ އަދި ފުރުސަތު ފަހި ސަރަހައްދެއް. އަހަރެންނަށް ޔަގީންކަން އެބައޮތް މި ސަރަހައްދުގެ ފުޓްބޯޅައިގެ ކުރިމަގު އޮތީ އުޖާލާކޮށްކަން،” ކަޓޭލް ވިދާޅުވި އެވެ.
އޭނާ ވަނީ ސާފުގެ ރައީސް ބަނގްލަދޭޝްގެ ޢާޒީ ސަލާހުއްދީނަށް ޝުކުރު އަދާކޮށްފަ އެވެ. “އަހަރެން ރައީސް ސަލާހުއްދީނާއި ހިންގާ ކޮމިޓީގެ މެމްބަރުންނަށް ޝުކުރު އަދާކުރަން މި މަގާމަށް އަހަރެން ހަމަޖެއްސީތީވެ. އަދި ހަމަ މިއާއެކު އަންވަރުން ހައްގު މިހާތަނަށް ކޮއްދެއްވި މަސައްކަތަށް ވެސް ޝުކުރު އަދާކުރަން،” ކަޓޭލް ވިދާޅުވި އެވެ. ޖެނެރަލް ސެކްރެޓަރީގެ މަގާމުގައި ކަޓޭލްގެ އެންމެ ފުރަތަމަ ބޮޑު މަސައްކަތަކަށް އޮންނާނީ ސްރީލަންކާގައި މި އަހަރުގެ ޖޫން މަހު ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތް ރާވައި ހިންގުމެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0