ހަމެލްސް މި ސީޒަނަށްފަހު ކުޅުން ހުއްޓާލަނީ

Read Time:3 Minute, 45 Second

އިޓާލިއަން ލީގުގައި ވާދަކުރަމުން އަންނަ ރޯމާއަށް ކުޅެމުންދާ ޖަރުމަނުގެ ޑިފެންޑަރު މެޓްސް ހަމެލްސް މި ސީޒަނަށްފަހު ކުޅުން ހުއްޓާލާނެ ކަމަށް ބުނެފިއެވެ. އުމުރުން 36 އަހަރުގެ ހަމެލްސް އޭނާގެ ސޯޝަލް މީޑިއާ އެކައުންޓުތަކުގައި ބުނެފައިވަނީ އުނދަގޫ ނިންމުމެއް ނަމަވެސް މި ސީޒަނަށްފަހު އޭނާ ކުޅުން ހުއްޓާލާނެ ކަމަށެވެ. “މިއީ ވަރަށް ހިތްދަތި ވަގުތެއް ނަމަވެސް މި ކަމަކީ ހުރިހާ ކުޅުންތެރިންވެސް ކުރިމަތިލާން ޖެހޭނެ ދުވަހެއް. މި ސީޒަނަށްފަހު އަހަރެން ކުޅުން ހުއްޓާލާނަން.” ހަމެލްސް އޭނާގެ ސޯޝަލް މީޑިޔާ އެކައުންޓުތަކުގައި ބުނެފައިވެ އެވެ.

“ފާއިތުވެދިޔަ 18 އަހަރު ދުވަހުގެ ތެރޭގައި ތަފާތު ވަރަށް ގިނަ ތަޖުރިބާތަކެއް ވަނީ ލިބިފައި.” ހަމެލްސް އިތުރަށް ބުންޏެވެ. މި ސީޒަނުގެ ނިޔަލަށް ރޯމާ އާއިއެކު ހަމެލްސް ހަދާފައިވާ އެއްބަސްވުމުގެ މުއްދަތު ހަމަވާނެ އެވެ. ރޯމާ އާއި ގުޅުމުގެ ކުރިން އޭނާ ވަނީ ޖަރުމަނުގެ ގަދަ ބާރު ކަމުގައިވާ ބަޔާން މިއުނިކަށް ކުޅެފައެވެ. ބަޔާން މިއުނިކްގެ ޔޫތު ޕްރޮގްރާމުގެ ތެރެއިން ކުޅުމުގެ ތެރެއަށް އައި ހަމެލްސް އެޓީމުގެ ފުރަތަމަ ޓީމުން ފުރުސަތު ހޯދާފައިވަނީ 2007 ވަނަ އަހަރު އުމުރުން 18 އަހަރުގަ އެވެ.

އަދި ޖެހިގެން އައި 2008 ވަނަ އަހަރު ލޯނު އެއްބަސްވުމެއްގެ ދަށުން ބޮރޫޝިޔާ ޑޯޓްމަންޑާއި ގުޅި އެ ކްލަބާއިއެކު އޭނާ ވަނީ ބުންޑެސްލީގާގެ ޗެމްޕިއަންކަން ހޯދާފަ އެވެ. އަދި އޭގެ ފަހުން 2016 ވަނަ އަހަރު ހަމެލްސް ވަނީ ބަޔާން މިއުނިކާއި އަލުން ގުޅި އެ ކްލަބާއިއެކު ބުންޑެސްލީގާ ކާމިޔާބުކޮށްފަ އެވެ. ހަމެލްސް ވަނީ އޭގެ ތިން އަހަރު ފަހުން ދެވަނަ ފަހަރަށް ބޮރޫޝިޔާ ޑޯޓްމަންޑާއި ގުޅިފަ އެވެ. އޭނާ ވަނީ ޑޯޓްމަންޑަށް 508 މެޗު ކުޅެދީފަ އެވެ. އަދި ބަޔާން މިއުނިކަށް އޭނާ ވަނީ 118 މެޗު ކުޅެފަ އެވެ.

2010 ވަނަ އަހަރު ޖަރުމަނުގެ ގައުމީ ޓީމުން ފުރުސަތު ހޯދި ހަމެލްސް ވަނީ 2014 ވަނަ އަހަރުގެ ވޯލްޑްކަޕް ޖަރުމަނުން ހޯދިއިރު އެ ޓީމުގައި މުހިންމު ދައުރެއް އަދާކޮށްފަ އެވެ. އޭނާ ވަނީ ޖަރުމަނުގެ ގައުމީ ޓީމަށް 13 އަހަރު ދުވަހުގެ ތެރޭގައި 78 މެޗު ކުޅެފަ އެވެ.