Read Time:4 Minute, 3 Second
މެންޗެސްޓާ ޔުނައިޓެޑުން މަސައްކަތްކުރަނީ ކުރިއަށް އޮތް ތިން އަހަރުގެ ތެރޭގައި ކާމިޔާބީ ހޯދުމަށް ކަމަށް އެ ޓީމުގެ ކޯޗު ރުބެން އަމޮރިމް ބުނެފިއެވެ. ދާދި ފަހުން މެންޗެސްޓަރ ޔުނައިޓެޑްގެ ކޯޗު ކަމާއި ހަވާލުވި އަމޮރިމް ބުނެފައިވަނީ މެންޗެސްޓަރ ޔުނައިޓެޑް މި ވަގުތު އޮތީ އެ ޓީމުގެ ތާރީޚުގައިވެސް އެންމެ އުނދަގޫ ހާލަތުގައި ކަމަށާއި އަދި އެކަމުން އަރައިގަތުމަށް ބަދަލުތަކެއް ގެންނަމުންދާ ކަމަށެވެ. “މިއީ މި ކްލަބުގެ ތާރީޚުގައިވެސް އެންމެ އުނދަގޫ ހާލަތުގައި އޮތް ވަގުތު އަދި އެކަމުން އަރައިގަތުމަށް ޓީމަށް ވަނީ ބޮޑެތި ބަދަލުތަކެއް ގެނެސްފައި. އަހަރެން ގަބޫލެއް ނުކުރަން ކާމިޔާބީ ހޯދުމަށް އެތަކެއް އަހަރުތަކެއް ހޭދަވާނެ ކަމަކަށް.” އަމޮރިމް ބުންޏެވެ.
އޭނާ އިތުރަށް ބުނެފައިވަނީ ކުޅުންތެރިންގެ އިތުރުން ކްލަބުގެވެސް ގިނަ މަގާމުތަކަށް ބަދަލުތަކެއް އައިސްފައިވާއިރު އެކަމުގެ އަސަރު ފެންނަމުންދާ ކަމަށެވެ. އަދި މިއީ ވަގުތުން ނަތީޖާ ހޯދޭނެ ކަމެއް ނޫން ކަމަށާއި ކާމިޔާބީއާއި ހަމައަށް ދިއުމަށް ގިނަ މަސައްކަތްތަކެއް ކުރަން ޖެހިފައިވާ ކަމަށެވެ. “އަހަރެން ގަބޫލުކުރަން މިފަދަ ބަދަލުތަކެއް އަންނައިރު ކާމިޔާބީ ހޯދަން ވަގުތު ނަގާނެ އަހަރެއް ދެ އަހަރެއްގެ ތެރޭގައި ލީގަށް ވާދައެއް ނުކުރެވޭނެ. ނަމަވެސް ކްލަބުގެ 150 ވަނަ އަހަރީ ދުވަހާއި ހަމައަށްދާއިރު މިއީ ކާމިޔާބީ ހޯދޭނެ ކްލަބެއް.” އަމޮރިމް އިތުރަށް ބުންޏެވެ.
އަމޮރިމް އިތުރަށް ބުނެފައިވަނީ އެކްލަބަށް ނަން މަޝްހޫރު މޮޅު ދެ ކުޅުންތެރިއަކު ގެންނަން ޖެހޭނެ ކަމަށެވެ. އަދި މީގެ ދިހަ ވަރަކަށް އަހަރު ކުރިން ކާމިޔާބީ ހޯދަން އުޅުނު ގޮތާއި މިހާރާއި ވަރަށް ތަފާތުކަމަށްވެސް އޭނާ ވަނީ ބުނެފަ އެވެ. “އެލެކްސް ފާގަސަންގެ އިރުޝާދުގެ ދަށުން ތަށްޓެއް ހޯދުމަށް ތިން ހަތަރު އަހަރު ނެގި ނަމަވެސް މިހާރު އެ ގޮތަކަށް އެކަމެއް ނުކުރެވޭނެ. އޭރާއި މިހާރާއި ވަރަށް ތަފާތު. ވަކިން ޚާއްސަކޮށް ކޯޗުންނާއި ކުޅުންތެރިންނަށް އޮތް ޕްރެޝަރ ބޮޑު.” އަމޮރިމް ބުންޏެވެ. މިވަގުތު އަމޮރިމްގެ އެންމެ ބޮޑު ސަމާލުކަމެއް ހުއްޓިފައިވަނީ އަންނަ އާދީއްތަ ދުވަހު ޕްރިމިއާ ލީގުގައި ފާއިތުވެދިޔަ ހަތަރު އަހަރުގެ ޗެމްޕިއަން މެންޗެސްޓަރ ސިޓީ އާއި ދެކޮޅަށް ކުޅޭ މެޗެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0