Read Time:4 Minute, 52 Second
(ފޮޓޯ ކްރެޑިޓްސް: ބައިބަލާ އެސޯސިއޭޝަން)
ބައިބަލާ އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ކުރިއަށްގެންދާ ޢީދު ބައިބަލާ ޗެލެންޖް 1446 ގެ ސެމީ ފައިނަލަށް ޓީއެފްޓީ އާއި، ލޮރެންޒޯ ސްޕޯޓްސް ކުލަބާއި، މިދިޔަ އަހަރުގެ ރަނަރަޕް ކުލަބު ކާސިންޖީ އަދި ޒެޕޯ ދަތުރުކޮށްފިއެވެ. ނޮކްއައުޓް އުސޫލުން ކުރިއަށްދާ މި މުބާރާތުގައި 29 ޓީމެއް ވަނީ ބައިވެރިވެފައެވެ. ހުޅުމާލޭ ސެންޓްރަލް ޕާކް ސަރަހައްދުގައި ކުރިއަށްދާ މި އަހަރުގެ ބައިބަލާ މުބާރާތުގެ ކުއާޓާ ފައިނަލް މެޗުތައް ރޭ ކުޅުނުއިރު، ފުރަތަމަ މެޗުގައި ބައްދަލުކުރި ޓީއެފްޓީ އާއި ޓީސީ ސްޕޯޓްސް ކުލަބެވެ. މި މެޗު ސީދާ ދެ ގޭމުން ކާމިޔާބުކޮށް ޓީއެފްޓީ ވަނީ ސެމީގެ ޖާގައެއް ކަށަވަރުކޮށްފައެވެ. މި މެޗުގެ ގޭމުތައް ޓީއެފްޓީން ގެންގޮސްފައިވަނީ 9-8 އަދި 19-0 އިންނެވެ.
މުބާރާތުގެ ސެމީގެ ޖާގައެއް ލޮރެންޒޯއިން ހޯދީ ރޭ ކުޅުނު ކުއާޓާ ފައިނަލް މެޗުގައި އެލްޓީ ސްޕޯޓްސް ކުލަބު އަތުން މޮޅުވެގެންނެވެ. މި މެޗުގެ ފުރަތަމަ ގޭމް އެތެރެއިން ކުޅުނު ލޮރެންޒޯ ވަނީ 20-1 އިން ކާމިޔާބުކޮށްފައެވެ. އަދި ދެވަނަ ގޭމް 6-6 އިން އެއްވަރުވުމާއެކު، ލޮރެންޒޯއަށް ވަނީ ސެމީގެ ޖާގައެއް ކަށަވަރުވެފައެވެ. ރޭ ކުޅުނު ކުއާޓާގެ ތިންވަނަ މެޗުގައި ބައްދަލުކޮށްފައިވަނީ ރަނަރަޕް ކާސިންޖީ އާއި ބައިބަލާގެ ޗެމްޕިއަންކަން 10 އަހަރު ހޯދާފައިވާ ބީޖީ ސްޕޯޓްސް ކުލަބެވެ. ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ގޭމް 7-6 އިން ކާމިޔާބުކުރީ ބޭރުން ކުޅުނު ކާސިންޖީންނެވެ. އެކަމަކު ބީޖީން ވަނީ ދެވަނަ ގޭމް 6-5 އިން ގެންގޮސްފައެވެ. ކޮންމެ ޓީމަކުންވެސް ގޭމެއް ކާމިޔާބުކުރުމާއެކު މި މެޗުގެ ނަތީޖާ ނެރެފައިވަނީ ގަދަހިފުމުންނެވެ. ގަދަހިފުމުގެ ފުރަތަމަ ހިފުން ކާމިޔާބުކޮށްފައިވަނީ ބީޖީންނެވެ. އެކަމަކު ކާސިންޖީން ވަނީ ދެވަނަ ހިފުމާއި ތިންވަނަ ހިފުން ކާމިޔާބުކޮށްފައެވެ.
މީގެ އިތުރުން މި މުބާރާތުގެ ސެމީގެ ފަހު ޖާގަ ޒެޕޯއިން ހޯދާފައިވަނީ ރޭ ކުޅުނު ފަހު މެޗުގައި ސީދާ ދެ ގޭމުން ކުޑަ ހެންވޭރު ލަޔަންސް ބަލިކުރުމަށްފަހުއެވެ. މި މެޗުގެ ގޭމުތައް ޒެޕޯއިން ކާމިޔާބުކުރީ 6-5 އަދި 12-10 އިންނެވެ. މި މުބާރާތުގެ ސެމީ ފައިނަލާއި، ފައިނަލް މެޗު ކުޅުމަށް ހަމަޖެހިފައިވަނީ މާދަމާރެއެވެ. ސެމީ ފައިނަލުގައި ލޮރެންޒޯ ނުކުންނާނީ ޒެޕޯއާ ދެކޮޅަށެވެ. އަދި ސެމީގައި ކާސިންޖީއާ ވާދަކުރާނީ ޓީއެފްޓީއެވެ. މިއީ މީގެ ކުރިން ބައިބަލާގެ ޗެމްޕިއަންކަން ލިބިފައިނުވާ ހަތަރު ޓީމެވެ. ޢީދު ބައިބަލާ ޗެލެންޖް 1446 ގެ މީޑިއާ ޕާޓްނަރަކީ ޕަބްލިކް ސަރވިސް މީޑިއާ، ޕީއެސްއެމް އެވެ. ޕީއެސްއެމްގެ ޔެސް ޓީވީން މުބާރާތުގެ ހުރިހާ މެޗެއް ވަގުތުން ގެނެސްދިނުމަށް ވަނީ ހަމަޖެހިފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0