އޯޓިސްޓިކް ކުދިންނަށް ހަޖޫ ޖެހި މައްސަލާގައި ފިޔަވަޅު އަޅަނީ

Read Time:4 Minute, 7 Second

ރާއްޖެ ޓީވީން ދެއްކި ޕްރޮގްރާމެއްގައި އޮޓިސްޓިކް ކުދިންނާއި ޑައުންސިންޑްރޮމް ކުދިންނަށް މަލާމާތްކޮށް ހަޖޫ ޖެހި މައްސަލައިގައި ފިޔަވަޅު އެޅުމުގެ މަސައްކަތް ކުރިއަށްދާ ކަަމަށް މިއިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާ އިން ވިދާޅުވެއްޖެއެވެ. އެ ވުޒާރާއިން ވިދާޅުވީ ނުކުޅެދުންތެރިކަން ހުންނަ ކުދިންނަށް ފުރައްސާރަ ކުރުމާއެކު އެ ކުދިންގެ އާއިލާތަކަށް ނިކަމެތިވާގޮތަށް މުއާމަލާތް ކުރުމާއި އެފަދަ ކޮންޓެންޓް ބްރޯޑްކާސްޓް ކުރުމަކީ އެ ވުޒާރާއިން ހިތްވަރުދޭ ކަންކަން ނޫން ކަމަށެވެ.

އަދި އެ މަައްސަލަ މީސް މީޑިއާއަށް ފެންމަތިވުމާއެކު އެ ވުޒާރާގެ މެންޑޭޓްގެ ތެރެއިން އެކަމަށް ފިޔަވަޅު އެޅުމަށް މިހާރުވެސް މަސައްކަތް ކުރަމުންދާ ކަމަށް ވިދާޅުވެފައި ވެއެވެ ރާއްޖެޓީވީން ގެނެސްދިން “ކާލާބައިސާ” ނަމަކަށް ކިޔާ ޕްރޮގްރާމްގައި ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެންބަރު މުހައްމަދު ނަޝީދު އަބްދުﷲ (މޮސްޓާ) އާއި ކުރީގެ ކާނަލް އަހުމަދު ފަޔާޒް އަލީ ރިޒާ (ޕާޕާ ފަޔާޒް) ވަނީ ސިޔާސީ ވާހަކަތަކާ ގުޅުވައިގެން އެފަދަ ކުދިންނަށް ހަޖޫ ޖައްސަވާފައެވެ. ރައީސް ޑރ. މުހައްމަދު މުއިއްޒު ނޫސްވެރިޔަކަށް ފޯނުން ގުޅުއްވާފައި އިންޒާރުދިން ވާހަކަ ދައްކަވަމުން ގޮސް މި ސަރުކާރަށް ފާޑު ވިދާޅުވަމުން ދެއްކި ވާހަކަތަކުގެ ތެރެއިން ޕާޕާ ފަޔާޒު ވަނީ ރައީސް ޑރ. މުހައްމަދު މުއިއްޒަށް ނިސްބަތްކޮށް އޮޓިސްޓިކް ގޮތެއް އެމަނިކުފާނުގެ ހުންނަ ކަމަށާއި އެމަނިކުފާނުގެ އަމަލުތައް ހުންނަވަނީ އޮޓިސްޓިކް ކުއްޖެއްގެ އަމަލުތައް ހުންނަ ގޮތަށް ކަމަށް ވިދާޅުވެ މަލާމާތް ކުރައްވައިފައެވެ.

އޭނާ މިހެން ވިދާޅުވުމުން މޮސްޓާ ވަނީ އެއަށް ޖޯކު ޖައްސަައި ރައީސްއަކީ “އޮޓިސްޓިކް އެކަންޏެއް ނޫން ޑައުންސިންޑްރޮމްވެސް ހުންނަހެން ހީވޭ.” ވިދާޅުވެފައެވެ. އެއާއެކީ ޓީވީ ޕްރެޒެންޓަރު އަދި މި ދެބޭފުޅުން ވަނީ އެފަދަ ބަލިތައް ތަހައްމަލު ކުރަމުންދާ ކުދިންގެ ހާލަތަށް މަލާމާތްކޮށް މި ސަރުކާރު ހިންގަނީ އޮޓިސްޓިކް ބޭފުޅެއްހެން ހީވާ ކަމަށް ވަނީ ވިދާޅުވެފައެވެ. އަދި އެ ވާހަކަ ބުނުމާއެކު، ތިން ހޯސްޓުން ވެސް ހިނިގަނޑެއް ޖަހާލައެވެ. މި ވާހަކަތަކާއި ގުޅިގެން ގިނަ ބަޔަކު ދަނީ މީސްމީޑިޔާގައި ކަންބޮޑުވުން ފާޅުކުރަމުންނެވެ.