Read Time:5 Minute, 21 Second
އެއްވެސް ފަރާތެއްގެ އަބުރާއި ކަރާމާތް ނުގެެއްލޭ ގޮތަށް ކޮންޓެންޓް އުފެއްދުމަށް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން އިލްތިމާސްކޮށްފިއެވެ. ރާއްޖެ ޓީވީން ދެއްކި ޕްރޮގްރާމެއްގައި އޮޓިސްޓިކް ކުދިންނާއި ޑައުންސިންޑްރޮމް ކުދިންނަށް މަލާމާތްކޮށް ވަނީ ހަޖޫ ޖަހައިފައެވެ. އެ މައްސަލައިގައި ބްރޯޑްކޮމް އިން ނެރުނު ސާކިއުލާއެއްގައި ވިދާޅުވީ، ގާނޫނުގައި ބުނާ “ކުޑަކުދިންނާއި ޅަފުރައިގެ ކުދިންނާއި އުމުރުން ދުވަސްވީ މީހުންނާއި ހާއްސާ އެހީއަށް ބޭނުންވާ މީހުންނަށް ލިބޭ ހާއްސާ ރައްކާތެރިކަން” އަދި ކޯޑް އޮފް ޕްރެކްޓިސްއާ ގައިޑްލައިންތަކާ ތައާރަޒުވާ ކޮންޓެންޓް ބްރޯޑްކާސްޓްކުރަމުގެ މައުލޫމާތު އެ ކޮމިޝަނުގެ ސަމާލުކަމަށް އައިސްފައިވާ ކަަމަށެވެ.
އަދި މިފަދަ ކޮންޓެންޓް ތަހުޤީޤުކޮށް އެކަންކަން ރަނގަޅުކުރުމަށް ކުރަންޖެހޭ ހުރިހާ ކަންކަން ކުރުމުގެ ފުރިހަމަ އިހްތިސާސް ކޮމިޝަނަށް ލިބިގެންވާ ކަމާއި، ކޮމިޝަންގެ ސަމާލުކަމަށް އަންނަ އަދި ހުށެހެޅޭ މިފަދަ ކޮންޓެންޓް ބަލައި ގާނޫނުން ޖާގަ ދޭ އެންމެ ހަރުކަށި ފިޔަވަޅު އަޅާނެ އެ ކޮމިޝަނުން ވިދާޅުވެފައި ވެއެވެ. “ހަމަ އެހެންމެ ގާނޫނު އަސާސީ އާއި ރާއްޖޭގެ އަމަލުކުރަމުންދާ އެންމެހާ ގާނޫނުތަކަށް އިހްތިރާމްކޮށް އެއްވެސް ފަރާތެއްގެ އަބުރާއި ކަރާމާތް ނުގެެއްލޭ ގޮތަށް ކޮންޓެންޓް އުފެއްދުމަށްވެސް ބްރޯޑްކާސްޓަރުންނަށް އިލްތިމާސް ކުރަމެވެ.”. އެ ސާކިއުލާގައި ވެއެވެ. ރާއްޖެ ޓީވީން ދެއްކި “ކާލާބައިސާ” ނަމަކަށް ކިޔާ ޕްރޮގްރާމްގައިރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެންބަރު މުހައްމަދު ނަޝީދު އަބްދުﷲ (މޮސްޓާ) އާއި ކުރީގެ ކާނަލް އަހުމަދު ފަޔާޒް އަލީ ރިޒާ (ޕާޕާ ފަޔާޒް) ވަނީ ސިޔާސީ ވާހަކަތަކާ ގުޅުވައިގެން އެފަދަ ކުދިންނަށް ހަޖޫ ޖައްސަވައިފައެވެ
ރައީސް ޑރ. މުހައްމަދު މުއިއްޒު ނޫސްވެރިޔަކަށް ފޯނުން ގުޅުއްވާފައި އިންޒާރުދިން ވާހަކަ ދައްކަވަމުން ގޮސް މި ސަރުކާރަށް ފާޑު ވިދާޅުވަމުން ދެއްކި ވާހަކަތަކުގެ ތެރެއިން ޕާޕާ ފަޔާޒު ވަނީ ރައީސް ޑރ. މުހައްމަދު މުއިއްޒަށް ނިސްބަތްކޮށް އޮޓިސްޓިކް ގޮތެއް އެމަނިކުފާނުގެ ހުންނަ ކަމަށާއި އެމަނިކުފާނުގެ އަމަލުތައް ހުންނަވަނީ އޮޓިސްޓިކް ކުއްޖެއްގެ އަމަލުތައް ހުންނަ ގޮތަށް ކަމަށް ވިދާޅުވެ މަލާމާތް ކުރައްވައިފައެވެ. “އަސްލު މީނައަކީ އޮޓިސްޓިކް ގޮތެއް ހުންނަ މީހެއްހެން ހީވަނީ އޮޕަރޭޓް ކުރާ ގޮތުން.” ޕާޕާ ފަޔާޒު ވިދާޅުވިއެވެ.
އޭނާ މިހެން ވިދާޅުވުމުން މޮސްޓާ ވަނީ އެއަށް ޖޯކު ޖައްސަައި ރައީސްއަކީ “އޮޓިސްޓިކް އެކަންޏެއް ނޫން ޑައުންސިންޑްރޮމްވެސް ހުންނަހެން ހީވޭ.” ވިދާޅުވެފައެވެ. އެއާއެކީ ޓީވީ ޕްރެޒެންޓަރު އަދި މި ދެބޭފުޅުން ވަނީ އެފަދަ ބަލިތައް ތަހައްމަލު ކުރަމުންދާ ކުދިންގެ ހާލަތަށް މަލާމާތްކޮށް މި ސަރުކާރު ހިންގަނީ އޮޓިސްޓިކް ބޭފުޅެއްހެން ހީވާ ކަމަށް ވަނީ ވިދާޅުވެފައެވެ. އަދި އެ ވާހަކަ ބުނުމާއެކު، ތިން ހޯސްޓުން ވެސް ހިނިގަނޑެއް ޖަހާލައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0