ފްލެޓް ލިސްޓަށް 1،500 އަށްވުރެ ގިނަ ޝަކުވާ

Read Time:4 Minute, 3 Second

(ފޮޓޯ ކްރެޑިޓްސް: ވަގުތު)

ގެދޮރުވެރިޔާ ސްކީމްގެ ދަށުން ދޫކުރާ 4،000 ފްލެޓް ލިބޭ މހުުންގެ ލިސްޓަށް 1،500 އަށްވުރެ ގިނަ ޝަކުވާ ލިބިފައިވާކަމަށް ކޮންސްޓްރަކްޝަން އެންޑް ހައުސިން މިނިސްޓްރީން ވިދާޅުވެއްޖެއެވެ. އެ މިނިސްޓްރީން މިއަދު ވިދާޅުވެފައިވަނީ ފްލެޓް ލިބުނު މީހުންގެ ލިސްޓާ ގުޅިގެން 1،575 ޝަކުވާ ލިބިފައިވާކަމަށެވެ. މީގެ ތެރޭގައި ހިމެނެނީ ތިން ކޮޓަރީގެ އެޕާޓްމަންޓް ލިސްޓާ ގުޅިގެން ހުށަހަޅާފައިވާ 1،176 ޝަކުވާއާއި ދެ ކޮޓަރީގެ އެޕާޓްމަންޓާ ގުޅިގެން ހުށަހަޅާފައިވާ 399 ޝަކުވާއެވެ. އަދި މުޅި ފްލެޓް ލިސްޓާ ގުޅިގެން މިހާތަނަށް 2،843 ޝަކުވާ ލިބިފައިވާކަމަށް މިނިސްޓްރީން ވިދާޅުވެފައިވެއެވެ. ކުރީގެ ސަރުކާރުން ހިންގި ގެދޮރުވެރިޔާ ސްކީމުގެ ދަށުން އާންމުކުރި ފްލެޓް ލިސްޓަށް ޝަކުވާ ހުށަހެޅުމުގެ މުއްދަތު ވެސް ވަނީ އިތުރުކޮށްފައެވެ.

މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރއިން ކުރިން މުއްދަތު ހުޅުވާލީ ޝަކުވާ ހުށަހެޅުމަށް އެއް މަސް ދުވަހެވެ. ނަމަވެސް އެ މިނިސްޓްރީން ވިދާޅުވީ ފްލެޓް ލިސްޓަށް ޝަކުވާ ހުށަހެޅުމުގެ މުއްދަތު އަންނަ އޭޕްރީލް މަހުގެ 15 ވަނަ ދުވަހަށް އިތުރުކޮށްފައިވާ ކަމަށެވެ. ވެރިފިކޭޝަނަށްފަހު ނެރުނު ލިސްޓުގައި ޝަރުތު ހަމަނުވާކަމަށް ކަނޑައަޅާފައިވާ ފަރާތްތަކުން ހުށަހަޅާ ޝަކުވާތަކަށް ބަލައި ސަރުކާރުގެ އިދާރާތަކުގައިހުރި މިނިސްޓްރީއަށް ޗެކްކުރެވެން ހުރި މަޢުލޫމާތުތަކަށް ރިއާޔަތްކޮށް ޝަރުތު ހަމަވާކަން ސާބިތުވާނަމަ އެ ފަރާތްތަކަށް ޙައްލު ހޯދައިދެވޭނެ ކަމަށާއި އެފަދަ ފަރާތްތަކުން ޕޯޓަލް ތެރެއިން ތަފްޞީލާއެކު ޝަކުވާ ހުށަހެޅުމަށް މިނިސްޓްރީން ވަނީ އެދިފައެވެ.

ހުރިހާ ކަމެއް ވެރިފައި ކުރުމަށްފަހު ނެރުނު ލިސްޓަށް ބަލާއިރު ތިން ކޮޓަރީގެ ލިސްޓުގައި ހިމެނޭ 3،721 ފަރާތުގެ ތެރެއިން ޝަރުތު ހަމަވެ 75 ޕޮއިންޓަށްވުރެ މަތިން 1،423 ފަރާތަކަށް ވަނީ ޕޮއިންޓު ލިބިފައެވެ. އަދި ދެ ކޮޓަރީގެ ލިސްޓުގައި ހިމެނޭ 1،218 ފަރާތުގެ ތެރެއިން ޝަރުތު ހަމަވެ 73 ޕޮއިންޓަށްވުރެ މަތިން ލިބިފައިވަނީ 397 ފަރާތަކަށެވެ. އެހެންކަމުން ޖުމްލަ ޗެކްކުރި 4،939 ފޯމުގެ ތެރެއިން ފްލެޓް ލިބޭނެ ކަމަށް ކަނޑައަޅާފައިވަނީ 1،820 ފަރާތަކަށެވެ.