ވަޢުދު ވިތާ 56 ދުވަސްތެރޭ އުތީމުގައި ބީއެމްއެލް އޭޓީއެމްގެ ޚިދުމަތް ފަށައިފި

Read Time:5 Minute, 17 Second

(ފޮޓޯ ކްރެޑިޓްސް: ޕީއެސްއެމް)

ހއ. އުތީމުގައި ބީއެމްއެލް އޭޓީއެމްގެ ޚިދުމަތް ފަށައިފިއެވެ. ދިވެހި ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމް ބެހެއްޓުމަކީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސިޔާސަތަކެވެ. މި ސިޔާސަތުގެ ދަށުން އުތީމުގައި ޤާއިމްކޮށްފައިވާ އޭޓީއެމް، ހުޅުއްވައި ދެއްވީ އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުހައްމަދު ސަޢީދުއެވެ.

(ފޮޓޯ ކްރެޑިޓްސް: ޕީއެސްއެމް)

އުތީމުގައި ބޭންކް އޮފް މޯލްޑިވްސް، ބީއެމްއެލްގެ އޭޓީއެމް ޚިދުމަތް ފައްޓަވައިދެއްވުމަށްފަހު ވަޒީރު ސައީދު ވަނީ އެ އޭޓީއެމުން ފައިސާ ނަންގަވާފައެވެ. އަދި އޭޓީއެމުން ފައިސާ ނަންގަވަން ބޭނުން ކުރެއްވި ކާޑު ވަޒީރުވަނީ އުތީމުގެ ކައުންސިލާ ހަވާލުކުރައްވާފައެވެ.

މިރަސްމިއްޔާތުގައި ވާހަކަ ދައްކަވަމުން ބީއެމްއެލްގެ ސީއީއޯ މުހައްމަދު ޝަރީފް ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުޢިއްޒުގެ އަމާޒަކީ ކިތަންމެ ކުޑަ އާބަދީއެއް އޮތް ރަށެއްނަމަވެސް ބޭންކުގެ ޚިދުމަތް ދިނުންކަމަށެވެ. އެގޮތުން އުތީމުގައި މިހުޅުވުނު އޭޓީއެމްގެ ސަބަބުން އާންމު ފަރުދުންނާއި ވިޔަފާރި ވެރިންނަށް ރަށުގައި ތިބެގެން މާލީ ކަންކަން ކުރުމުގެ މަގު ފަހި ވެގެން ދާނެކަމަށް ޝަރީފް ވިދާޅުވިއެވެ. އަދި އަމިއްލަ ރަށުގައި ތިބެގެން މިފަދަ ޚިދުމަތެއް ލިބުމަކީ ރައްޔިތުންނަށް އެކި ގޮތް ގޮތުން މަންފާ ކުރާނެ ކަމެއްކަމަށްވެސް ޝަރީފް ވިދާޅުވި.

“މި އޭޓީއެމްތަކުން 24 ގަޑިއިރު ޚިދުމަތް ލިބޭނެ. މިއޭޓީއެމްތަކަކީ ރައްޔިތުންގެ އެސެޓެއްގެ ގޮތުގައި ބަލައި ގަތުމަކީ މުހިންމު ކަމެއް. ބީއެމްއެލްއިން ދަނީ މުޅި ރާއްޖެއަށް އަމާޒުކޮށްގެން އިންވެސްޓު ކުރަމުން” މުހައްމަދު ޝަރީފް ވިދާޅުވިއެވެ.

(ފޮޓޯ ކްރެޑިޓްސް: ޕީއެސްއެމް)

އުތީމުގައި އޭޓީއެމްގެ ޚިދުމަތް ފަށާފައިވާއިރު، ރާއްޖޭގެ މީހުން ދިރިއުޅޭ ހުރިހާ ރަށެއްގައި މިއަހަރު ނިމުމުގެ ކުރިން އޭޓީއެމް ބެހެއްޓުމަށް ސަރުކާރުން ދަނީ މަސައްކަތް ކުރަމުންނެވެ. މިމަސައްކަތުގެ ދަށުން އުތީމުގައި އޭޓީއެމް ބެހެއްޓުމުގެ އެއްބަސްވުމުގައި ސޮއިކުރައްވާފައިވަނީ މިދިޔަ ޖެނުއަރީ މަހު ރައީސުލްޖުމްހޫރިއްޔާ ޑރ.މުހައްމަދު މުޢިއްޒު ހއ.އަތޮޅަށް ކުރެއްވި ދަތުރުފުޅުގެ ތެރެއިން އުތީމަށް ކުރެއްވި ޒިޔާރަތުގެތެރޭގައި ހިމަނައިގެންނެވެ. ރާއްޖޭގެ ހުރިހާ ރަށެއްގައި ބެންކް އޮފް މޯލްޑިވްސްގެ އޭޓީއެމް ބެހެއްޓުމުގެ މަސައްކަތުގެ ތެރެއިން ބައެއް ރަށްތަކުގައި އޭޓީއެމް ބަހައްޓާއި މިހާރުވަނީ ޚިދުމަތް ދޭން ފަށާފައެވެ.

މުޅި ރާއްޖެއަށް ބޭންކު އޮފް މޯލްޑިވްސްގެ އޭޓީއެމް ޚިދުމަތް ފޯރުކޮށްދިނުމުގެ މަސައްކަތް އިފްތިތާހުކޮށްފައިވަނީ މިދިޔަ އަހަރުގެ ނޮވެމްބަރުމަހުގެ ތެރޭގައެވެ. މި މަޝްރޫޢާއެކު ރައްޔިތުންގެ މާލީ ބައިވެރިވުން އިތުރުކުރުމަށް ގިނަ މަސައްކަތްތަކެއް ކުރުމަށް ސަރުކާރުން ވަނީ ރާވާފައެވެ.