ފެބްރީޒިއޯ ރޮމާނޯ ރާއްޖޭގެ އެމްބެސެޑަރަކަށް ހަމަޖައްސައިފި

Read Time:4 Minute, 10 Second

(ފޮޓޯ ކްރެޑިޓްސް: ސްކްރިލް)

ފުޓްބޯޅައިގެ އެންމެ ނުފޫޒުގަދަ ނޫސްވެރިޔާ، އިޓަލީގެ ފެބްރީޒިއޯ ރޮމާނޯ ރާއްޖޭގެ ފަތުރުވެރިކަން އިޝްތިހާރު ކުރުމަށް އެމްބެސެޑަރަކަށް ހަމަޖައްސައިފިއެވެ. ރާއްޖޭގެ ފަތުރުވެރިކަން އިޝްތިހާރުކުރާ ވިޒިޓް މޯލްޑިވްސްއިން މިއަދު “އެކްސް” ގައި ކުރި ޕޯސްޓެއްގައި ބުނީ ރާއްޖޭގެ ގްލޯބަލް ބްރޭންޑު އެމްބެސެޑަރުގެ ހައިސިއްޔަތުން އޭނާ ރާއްޖޭގެ ފަތުރުވެރިކަމާ ގުޅޭ މުހިންމު މައުލޫމާތުތައް ހިއްސާކުރަމުންދާނެ ކަމަށެވެ. ވިޒިޓް މޯލްޑިވްސް ހިއްސާކުރި ޕޯސްޓުގައި ފެބްރިޒީއޯގެ ވީޑިއޯއެއް ވެސް ވަނީ ހިމަނާފައެވެ. އެވީޑިއޯގައި އޭނާ ވަނީ ބުރަކޮށް މަސައްކަތް ކުރުމަށް ފަހު ހިތްހަމަޖައްސަލާ އަރާމުކޮށްލަން އެންމެ ރަނގަޅު ތަނަކީ ރާއްޖެ ކަމަށް ބުނެފައެވެ. އަދި ރާއްޖޭގެ ރީތިކަން ފެނި ހައިރާންވާ ކަމަށާއި ރާއްޖެއަށް ޒިޔާރަތް ކުރުމުން ހިތްހަމަޖެހުން ލިބޭ ކަމަށް ވެސް އޭނާ ވަނީ ބުނެފައެވެ.

ފެބްރީޒިއޯ ވަނީ މީގެ ކުރިން އެކި ފަހަރު މަތިން ރާއްޖެއަށް ޒިޔާރަތްކޮށްފައިވެއެވެ.އޭނާ ވަނީ ރާއްޖޭގެ ކުޅިވަރު ނޫސްވެރިންނާއެކު ޚާއްސަ ފުޓްސަލް މެޗެއް ކުޅެފައެވެ.މި މެޗަށްފަހު ދިން އިންޓަވިއުއެއްގައި ފެބްރީޒިއޯ ވަނީ ކުޅިވަރު ނޫސްވެރިއެއްގެ ގޮތުގައި އޭނާގެ ތަޖުރިބާ ރާއްޖޭގެ ކުޅިވަރު ނޫސްވެރިންނާއި ހިއްސާކޮށްފައެވެ. އަދި މޮޅު ކުޅިވަރު ނޫސްވެރިއަކަށް ވުމަށްޓަކައި ކޮންމެހެން ހުންނަން ޖެހޭނެ ސިފަތަކުގެ ވާހަކަވެސް ހިއްސާކުރިއެވެ. ފެބްރީޒިއޯ ބުނީ އޭނާ ދެވަނަ ފަހަރަށް ރާއްޖެއަށް ޒިޔާރަތްކުރީ ރާއްޖޭގެ މާހައުލު ކަމުދާތީ ކަމަށެވެ. އަދި ހުރިހާ އެންމެނަކީވެސް ވަރަށް ގުޅިގެން ގާތުން މަސައްކަތްކުރާ ބައެއްގެ ގޮތުގައި އޭނާ ފާހަގަކުރިއެވެ.

އިޓަލީގެ ފުޓްބޯޅައިގެ މަގުބޫލު ސިޓީއެއް ކަމަށްވާ މިލާނަށް އުފަން ފަބްރީޒިއޯ އަކީ ދުނިޔޭގެ ފުޓްބޯޅައިގެ ހަބަރުތަކަށް ބަލާއިރު، އެންމެ އިތުބާރު ހިފޭ މަސްދަރެެވެ. އަދި ބައެއް މީޑިއާތަކުން ހަބަރެއްގެ ސައްހަކަން ކަށަވަރުކުރަން ބޭނުންކުރާ ވަސީލަތަކީ ފަބްރީޒިއޯ ރޮމާނޯގެ ސޯޝަލް މީޑިއާ ޕްލެޓްފޯމެވެ.މީޑިއާތަކުގައި އޭނާ އަންނަނީ ޓޯކްޝޯތަކުގައި ބައިވެރިވަމުންނެވެ. އަދި ކްލަބްތަކުގެ ރަސްމީ މީޑިއާ ޗެނަލްތަކުގައި ވެސް ފަބްރީޒިއޯ ރޮމާނޯ ބައިވެރިވާ ޝޯތައް ހިނގައެވެ.