ކޮރަޕްޝަންގެ މައްސަލަތައް ބަލަން ފެށުމާއެކު އިސްތިއުފާ ދެއްވި ސުއޫދުގެ އިސްތިއުފާ ބަލައިގެންފި

Read Time:3 Minute, 51 Second

(ފޮޓޯ ކްރެޑިޓްސް: ރައީސް އޮފީސް)

ސުޕްރީމް ކޯޓުގެ ފަނޑިޔާރުކަމުގެ މަގާާމުން ހުސްނުއްސުއޫދު ވަކިވެފައިވާކަން ޖުޑީޝަލް ސާވިސް ކޮމިޝަން (ޖޭއެސްސީން) މިއަދު ހާމަކޮށްފިއެވެ. ޖޭއެސްސީން ބަލަމުންދާ މައްސަލައަކާ ގުޅިގެން ސަސްޕެންޝަނުގައި ހުންނެވި ސުއޫދު ފަނޑިޔާރުކަމުގެ މަގާމުން އިސްތިއުފާ ދެއްވީ އިއްޔެއެވެ. އިސްތިއުފާގެ ސިޓީ ސުއޫދޫ ފޮނުއްވީ ރައީސް ޑރ. މުހައްމަދު މުއިއްޒަށް އެޑްރެސްކޮށެވެ.

ޖޭއެސްސީއަށް ސުއޫދު ފޮނުއްވި ސިޓީގައި ވިދާޅުވީ، ގާނޫނު އަސާސީއަށް ހަވަނަ އިސްލާހު ގެނައުމުގެ ގާނޫނުން ގާނޫން އަސާސީގެ 73 ވަނަ މާއްދާއަށް ގެނައި އިސްލާހަކީ 2008 ގެ ގާނޫނު އަސާސީގެ އަސާސްތަކާއި އުސޫލުތަކާއި ހިލާފުވުމުގެ ސަބަބުން ދުސްތޫރީ ބާރުވެރިކަން ލިބިގެންނުވާ ބާތިލު އިސްލާހެއްކަމަށް ބުނެ ގާނޫނު އަސާސީއަށް ގެނެވުނު އެ އިސްލާހް ބާތިލުކުރުމަށް ދައުލަތަށް ދައުވާ ލިބޭ ގޮތަށް ރާއްޖޭގެ ސުޕްރީމް ކޯޓަށް އަމިއްލަ ފަރާތަކުން ހުށަހެޅު މައްސަލަ ބެލުމުގެ އިހްތިސާސް ގާނޫނު އަސާސީގެ ދަށުން ރާއްޖޭގެ ސުޕްރީމް ކޯޓަށް ލިބިގެންވާ ކަމަށް ދިވެހި ރާއްޖޭގެ ސްޕްރީމް ކޯޓުން ނިންމާފައިވާ ކަމަށެވެ.

ޖޭޢެސްސީއަށް ސުއޫދު ފޮނުއްވި ސިޓީ ލިބުނުކަން ހާމަކޮށް އެ ކޮމިޝަނުން މިއަދު ނެރުނު ކުރު ބަޔާނެއްގައި ބުނީ ފަނޑިޔާރުގެ މަގާމުން ސުއޫދު އިސްތިއުފާ ދެއްވާފައިވާތީ، އިއްޔެއިން ފެށިގެން ފަނޑިޔާރުކަމުގެ މަގާމުން ވަކިވެފައިވާ ކަމަށެވެ. “ދިވެހިރާއްޖޭގެ ސުޕްރީމް ކޯޓުގެ ފަނޑިޔާރުކަމުގައި ހުންނެވި ސ.މީދޫ ހަސަންކާރިގެ، އަލްއުސްތާޛު ޙުސްނުއްސުޢޫދު ފަނޑިޔާރުކަމުގެ މަޤާމުން 04 މާރިޗު 2025 ގައި އިސްތިއުފާ ދެއްވާފައިވާތީ، އެ ދުވަހުން ފެށިގެން އަލްއުސްތާޛު ޙުސްނުއްސުޢޫދު ފަނޑިޔާރުކަމުގެ މަޤާމުން ވަކިވެފައިވެއެވެ.” ޖޭއެސްސީން ބުންޏެވެ.

ހުސްނުއްސުއޫދަކީ އެންޓި ކޮރަޕްޝަން ކޮމިޝަން (އޭސީސީ) އިން ތަހުގީގު ކުރަމުންދާ މައްސަލަތަކަކާ ގުޅިގެން ސަސްޕެންޑްކުރި ސުޕްރީމް ކޯޓުގެ ތިން ފަނޑިޔާރުންގެ ތެރެއިން އެއް ފަނޑިޔާރެވެ. ސުއޫދު ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރެއްވީ ޑިސެމްބަރު 8، 2019 ގައެވެ.