އަޅުގަނޑު މި ގޮނޑީގައި މި އިނީ މިނިވަންކަމާއެކު: އަބްދުއްރަހީމް

Read Time:5 Minute, 8 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

އެމަނިކުފާނު މަޖިލީހުގެ ރައީސްގެ ގޮނޑިކޮޅުގައި އިންނަވަނީ މިނިވަންކަމާއެކު ކަމަށާއި އެއްވެސް ކަމަކަށް ހުރަހެއް ނެތް ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ. މަޖިލީހުގެ މިއަދުގެ ޖަލްސާގައި، މާލިއްޔަތު ކޮމިޓީން ހުށަހެޅި ރިޕޯޓަކަށް ބަހުސް ހިނގަމުން ދަނިކޮށް ގަލޮޅު ދެކުނު ދާއިރާގެ އެމްޑީޕީގެ މެންބަރު މީކާއިލް އަހުމަދު ނަސީމް، އަބްދުއްރަހީމަށް އިޝާރާތް ކުރައްވައި ވިދާޅުވީ “ބަޑި ބައިންދާފައި އިން ރައްޔިތުންގެ މަޖިލީހުގެ ރައީސެއް” މެދުވެރިކޮށް ކަންކަން ކުރަމުންދާ ކަމަށެވެ.

މީކާއިލްގެ މި ވާހަކައަށް ރައްދު ދެއްވަމުން، އަބްދުއްރަހީމް ވިދާޅުވީ އެމަނިކުފާނުގެ ހާލުކޮޅެއް މެމްބަރަކަށް އެނގިވަޑައެއް ނުގަންނަވާނެ ކަމަށެވެ. އަދި އެމަނިކުފާނު މަޖިލީހުގެ ރައީސްގެ ގޮނޑިކޮޅުގައި އިންނެވީ މިނިވަންކަމާއެކު ކަމަށާއި، އެ މަގާމަށް އިންތިޚާބުކުރެއްވީ މަޖިލީހުގެ މެމްބަރުން ކަމަށް ވިދާޅުވިއެވެ.

“އަޅުގަނޑަށް ހުރަހެއް މިތަނުގައި އެއްވެސް ކަމަކަށް ނެތް. އެހެންވީމާ އެއްގޮތަކަށް ވެސް ރައްޔިތުންނަށް ކަންކަން އޮޅުވާލެއްވުމަށް ގަލޮޅު ދެކުނު ދާއިރާގެ އިއްޒަތްތެރި މެންބަރުގެ މައިކު ބޭނުން ނުކުރެއްވުމަށް ތަކުރާރުކޮށް ދަންނަވަން،” އަބްދުއްރަހީމް ވިދާޅުވިއެވެ.

(ފޮޓޯ ކްރެޑިޓްސް: ރައްޔިތުންގެ މަޖިލިސް)

މީގެ ރައްދުގައި މީކާއިލް ވިދާޅުވީ ގަލޮޅު ދެކުނު ދާއިރާގެ މައިކުގައި އަޑު ހުރިހާ ހިނދަކު އަޑު އިއްވަވާނެ ކަމަށެވެ. އަދި ރައްޔިތުންގެ މަޖިލީހުގެ ބާރު ކަނޑުވާލަން ސަރުކާރުން އުޅޭ ކަމަށް ވިދާޅުވެ، މަޖިލިސް ރައީސްގެ ހާލުކޮޅު ވެސް މިއަދު ރައްޔިތުންނަށް އެނގޭނެ ކަމަށް ވިދާޅުވިއެވެ.

“އިއްޒަތްތެރި ރައީސްގެ ދަރިފުޅަށް ހަދާލި ގޮތާއި، އާއިލާގެ ބޭބޭފުޅުންނަށް ހަދާލި ގޮތާއި، އަދި އިއްޒަތްތެރި ރައީސް މެދުވެރިކޮށް އައްޔަނުކުރައްވާފައިވާ ސިޔާސީ މަގާމުތަކަށް..” މި ހިސާބަށް މީކާއިލް ވިދާޅުވުމުން އަބްދުއްރަހީމް ވަނީ މީކާއިލްގެ ވާހަކަ މެދުކަނޑާލައްވައި ރިޕޯޓާ ގުޅޭގޮތުން ބަހުސްކުރެއްވުމަށް ތަކުރާރުކޮށް އެދިވަޑައިގެންފައެވެ.

މި ބަހުސް ހިނގަމުންދިޔައީ މަޖިލީހުގެ ރައީސް އަބްދުއްރަހީމްގެ ދަރިކަލުން އިބްރާހިމް ފައިސަލް ފަތުރުވެރިކަމާ ބެހޭ ވަޒީރުކަމުން ކުއްލި ގޮތަކަށް ވަކިކުރި ފަހުން، އަބްދުއްރަހީމާއި ރައީސް މުއިއްޒުގެ ގުޅުން ގޯސްވެފައިވާ ކަމަށް ބުނެވޭ ދަނޑިވަޅެއްގައެވެ. ނަމަވެސް، މިދިޔަ ބުރާސްފަތި ދުވަހު އަބްދުއްރަހީމް ވަނީ ރައީސް އޮފީހަށް ވަޑައިގެން ރައީސް މުއިއްޒާ ބައްދަލުކުރައްވާފައެވެ. މި ބައްދަލުވުމުގައި މަޝްވަރާކުރެއްވީ މި ދައުރު ސަރުކާރުން ފޮނުވަން ހުރި ބިލުތަކާ ގުޅޭ ގޮތުން ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެފައިވެއެވެ.