އިގްތިސާދު ރަނގަޅު، މި އަހަރު %6.4 ގެ ކުރިއެރުމެއް ލިބޭނެ: ސައީދު

Read Time:4 Minute, 40 Second

(ފޮޓޯ ކްރެޑިޓްސް: ރައީސް އޮފީސް)

ރާއްޖޭގެ އިގްތިސާދު ރަނގަޅުވަމުންދާ މަންޒަރު ފެންނަ ކަމަށާއި މި އަހަރު އިގްތިސާދަށް %6.4 ގެ ކުރިއެރުމެއް ލިބޭނެ ކަމަށް ލަފާ ކުރެވޭ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ. ރައީސް އޮފީހުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ސައީދު ވިދާޅުވީ އިގްތިސާދު ކުރިއަރަމުން ނުދާ ކަމަށް ބުނެ ބައެއް ފަރާތްތަކުން ވާހަކަ ދެއްކި ނަމަވެސް އިގްތިސާދު ދަނީ ކުރިއަރަމުން ކަމަށެވެ.

“ލަފާކުރާ ފިގާއެއް އެއީ 6.4 އިންސައްތަނަމަ ދެން ކުއާޓަލީ މެޝާ ކުރަނީ. ކުރިއަރާނެ ކަމަށް ބެލެވެނީ”” ސައީދު ވިދާޅުވިއެވެ.

ސައީދު އެގޮތަށް ވިދާޅުވި އިރު، ރައްޔިތުންގެ މަޖިލިހުގެ ނައިބު ރައީސް އަހުމަދު ނާޒިމް އިއްޔެ ވިދާޅުވެފައިވަނީ ރާއްޖޭގެ އިގްތިސާދީ ހާލަތު ރަނގަޅުވަމުންދާ މަންޒަރު ނުފެންނަ ކަމަށާއި، ދައުލަތުގެ ޚަރަދުތައް ކުޑަކުރެވިގެންދާ ތަންވެސް ނުފެންނަ ކަމަށެވެ. މި ކަންބޮޑުވުންތަކާމެދު ދަންނަވާނެ އެއްޗެއް ނޭނގޭ ކަމަށް ވަޒީރު ސައީދު ވިދާޅުވިއެވެ. މަޖިލީހުގެ މާލިއްޔަތު ކޮމިޓީގެ މުގައްރިރު ގާސިމް އިބްރާހީމްވެސް ވަނީ ގައުމުގެ އިގްތިސާދީ ހާލަތާމެދު ކަންބޮޑުވުން ފާޅުކުރައްވާފައެވެ. އޭނާ ވިދާޅުވެފައިވަނީ ގައުމު އޮތް ހާލަތު ކިޔައި ދޭންޖެހޭ ކަމަށާއި، އިގްތިސާދު ރަނގަޅުވާނީ ސަރުކާރުގެ ފޯމެޓަށް ބަދަލުތަކެއް ގެނެވިގެން ކަމަށެވެ.

މީރާގެ ތަފާސްހިސާބުތަކުން ދައްކާ ގޮތުގައި މިއަހަރުގެ ޖަނަވަރީ މަހު ބަލައިގަނެފައިވާ ޖުމުލަ އާމްދަނީއަކީ 3.34 ބިލިއަން ރުފިޔާއެވެ. މިއީ މިދިޔަ އަހަރުގެ މި މުއްދަތުގައި ލިބުނު އާމްދަނީއަށްވުރެ 7.7 އިންސައްތަ ދަށް އަދަދެކެވެ. އަދި ފިނޭންސް މިނިސްޓްރީގެ ތަފާސްހިސާބުތަކުން ދައްކާ ގޮތުން މިދިޔަ މަހެއްހާ ދުވަހުގެ ތެރޭގައި ދައުލަތަށް ލިބުނު އާމްދަނީ ވަނީ 19 އިންސައްތަ ދަށްވެފައިވާކަން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިންވެސް ވަނީ ފާހަގަކޮށްފައެވެ.

ރައްޔިތުންގެ މަޖިލިސް މި އަހަރަށް ހުޅުވުމުގެ ގޮތުން ރައީސް ޑރ. މުއިއްޒު ދެއްވި ރިޔާސީ ބަޔާނުގައި ވިދާޅުވީ މިއަހަރު ބަޖެޓު ޑެފިސިޓް 9.4 ބިލިޔަން ރުފިޔާއަށް ކުޑަކުރުމަކީ އަމާޒެއް ކަމަށެވެ. ރާއްޖެއަށް ކުރިމަތިވެފައިވާ އިގުތިސާދީ ދަތިކަމުން އަރައިގަތުމަށް ޓަކައި، ދައުލަތުގެ އާމްދަނީ އިތުރުކުރަން އަޅާފައިވާ ފިޔަވަޅުތައް ތަންފީޒުކޮށް، އޭގެ ހެޔޮ އަސަރު މިހާރު ވަނީ ދައުލަތުގެ މާލިއްޔަތަށާއި ބޭރު ފައިސާގެ ރިޒާވަށް ކުރަން ފަށާފައި ކަމަށް ރައީސް ވިދާޅުވިއެވެ.