މަޖިލީސް މެންބަރުން ގާނޫނީ ދައިރާއިން ކިޔަވަން ފަށައިފި

Read Time:3 Minute, 36 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

ރައްޔިތުންގެ މަޖިލީސް މެންބަރުންނަށް ހާއްސަކޮށް މަތީ ތަޢުލީމު ދިނުމުގެ ޕްރޮގްރާމެއް އިސްލާމިކް ޔުނިވަރސިޓީ އޮފް މޯލްޑިވްސް (އައިޔޫއެމް)ގައި ފަށައިފިއެވެ، މަޖިލީހުގެ މެންބަރުންނަށް ޝަރީޢާ އެންޑް ލޯގެ އެޑްވާންސްޑް ސެޓްފިކެޓް ކޯހެއް ހިންގުމަށް އެއްބަސްވުމެއްގައި މިހާރު ވަނީ ސޮައިކޮށްފައެވެ.

މި ކޯހަކީ އެއް އަހަރު ދުވަހުގެ މުއްދަތަށް ކިޔަވައިދޭ ކޯހެއް ކަމަށްވާއިރު، މީގައި މަޖިލީހުގެ 8 މެންބަރަކު ބައިވެރިވެވަޑައިގަންނަވާނެއެވެ. ކޯހުގައި ބައިވެރިވާ މެންބަރުންނާއި މަޖިލީހުގެ އިސްވެރިން ވަނީ އައިޔޫއެމްގެ އިސްވެރިންނާއެކު ބައްދަލުކުރައްވައި، ކިޔެވުމުގެ ކަންކަން ކުރިއަށް ގެންދާނެ ގޮތާ ބެހޭ މަޢުލޫމާތު ހޯއްދަވާފައެވެ. މަޖިލީހުގެ ރައީސް ޢަބްދުﷲ ޢަބްދުއްރަޙީމް ވިދާޅުވެފައިވަނީ މި ކޯހުގެ މައިގަނޑު މަޤްޞަދަކީ 20 ވަނަ މަޖިލީހަކީ މަތީ ތަޢުލީމު ޙާޞިލްކޮށްފައިވާ، ޤާބިލު މެންބަރުންތަކެއް ތިބި މަޖިލީހަކަށް ހެދުން ކަމަށެވެ. އަދި މަޖިލީހަކީ އިލްމީ ގޮތުން މަސައްކަތްތަކެއް ކުރާ ނަމޫނާ މަޖިލީހަކަށް ހެދުމަށް އެދިވަޑައިގަންނަވާ ކަމަށްވެސް ވިދާޅުވިއެވެ.

(ފޮޓޯ ކްރެޑިޓްސް: ރައްޔިތުންގެ މަޖިލިސް)

މީގެއިތުރުން، މަޖިލީހުގެ އިދާރާއިން ބުނެފައިވާ ގޮތުގައި ޤާނޫނީ ދާއިރާއިން ފުރަތަމަ ޑިގްރީއަށް ކިޔަވައިދޭ ކޯހެއް ފެށުމުގެ އިދާރީ މަސައްކަތްތައްވެސް އައިޔޫއެމްއާ ގުޅިގެން ކުރިއަށްދާނެއެވެ. އައިޔޫއެމުން ހިންގާ އެޑްވާންސްޑް ސެޓްފިކެޓް އިން ޝަރީޢާ އެންޑް ލޯ ކޯހެއްގައި މަޖިލީހުގެ އަށް މެމްބަރަކު ބައިވެރިވެ މިއަދު ވަނީ ކިޔަވަން ވެސް ފަށައިފައެވެ. މިއީ ވެސް ސީދާ މަޖިލިސް މެމްބަރުންނަށް ހާއްސަކޮށް އޮންލައިންކޮށް ފެށި ޕްރޮގްރާމެކެވެ.

އެއް އަހަރު ދުވަހަށް ކުރިއަށް ގެންދާ އެޑްވާންސް ސެޓްފިކެޓް ޕްރޮގްރާމް ނިމުމުން ޑިގްރީ ޕްރޮގްރާމްގައި މަޖިލިސް މެމްބަރުންނަށް ބައިވެރިވެވޭނެއެވެ.