“އިޖުރާއަތާ އެއްގޮތަށް ގާނޫނުއަސާސީއަށް ގެންނަ ބަދަލު ސުޕްރީމް ކޯޓަށް ނުބެލޭނެ”

Read Time:5 Minute, 42 Second

ހުރިހާ އިޖުރާއަތަށް ފުރިހަމަކޮށް، ރައްޔިތުންގެ މަޖިލިހުން ގާނޫނުއަސާސީއަށް ގެންނަ ބަދަލުތައް އެއްވެސް ކޯޓަކަށް ނުބެލޭނެ ބަންޑާރަ ނައިބުގެ އޮފީހުން މިއަދު ސުޕްރީމް ކޯޓުގައި މިއަދު ވިދާޅުވެއްޖެއެވެ. ސިޔާސީ ޕާޓީން ވަކިވެއްޖެނަމަ ނުވަތަ ވަކިކޮށްފި ނަމަ ރައްޔިތުންގެ މަޖިލީހުގެ މެމްބަރުކަމުގެ ގޮނޑި ގެއްލޭ ގޮތަށް މިދިޔަ އަހަރު ގާނޫނުއަސާސީއަށް ގެނައި އިސްލާހު ބާތިލްކުރަން ސުޕްރީމް ކޯޓަށް ހުށަހެޅުއްވީ ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަދި ގާނޫނީ ވަކީލް އަލީ ހުސެއިންއެވެ.

ނަމަވެސް ސުޕްރީމް ކޯޓުގައި މިއަދު ފެށި އަޑުއެހުމުގައި ބަންޑާރަ ނައިބުގެ އޮފީހުން ވަނީ މައްސަލަ ކުރިއަށް ނުގެންދެވޭނެ ކަމަށް ވިދާޅުވެ، އިޖުރާއީ ގިނަ ނުކުތާތަކެއް ނަންގަވައިފައެވެ. އަދި އެ މައްސަލަތައް ނުބެލޭނެ ސަބަބުތައް ސުޕްރީމް ކޯޓުން މީގެކުރިން ނެރުނު ހުކުމްތަކަށް ރިއާޔަތްކޮށް ތަފްސީލްކޮށްދީފައިވެއެވެ. އެ ތަފްސީލްތަކާ ގުޅިގެން ސުޕްރީމް ކޯޓުގެ ބެންޗުން ވަނީ ބަންޑާރަ ނައިބުގެ ވަކީލުންނާ ގިނަ ސުވާލުތަކެއް ވެސް އަމާޒު ކުރައްވައިފައެވެ. ބަންޑާރަ ނައިބުގެ އޮފީހުގެ ފަރާތުން ވާހަކަ ދައްކަވަމުން ފާތިމަތު ހަލީމް ވިދާޅުވީ، ގާނޫނުއަސާސީގައި ބަޔާންކުރާ ގޮތުގެ މަތިން ގާނޫނުއަސާސީ އިސްލާހު ކުރުމަކީ ރައްޔިތުންގެ މަޖިލިހަށް ލިބިދޭ ބާރެއް ކަމަށާއި ގާނޫނުއަސާސީއަށް ބަދަލު ގެނައީ އިޖުރާއަތުތައް ފުރިހަމަކޮށް 78 މެމްބަރުން ވޯޓު ދެއްވައިގެން ކަމަށެވެ.

އަދި މަޖިލިހުގެ ނިންމުމާ އެއްގޮތަށް ރައީސް ޑރ. މުހައްމަދު މުއިއްޒު އެ އިސްލާހު ތަސްދީގު ކުރެއްވި ކަން ފާހަގަ ކުރެއްވިއެވެ. ފާތިމަތު ވިދާޅުވި ގޮތުގައި އަލީ ހުސެއިން ހުށަހެޅުއްވި މައްސަލަ ދުސްތޫރީ މައްސަލައެއްގެ ގޮތުގައި ނުފެތެއެވެ. ގާނޫނުއަސާސީ އަށް ގެންނަ އިސްލާހުތަކަކީ ގާނޫނުއަސާސީގެ ބައެއް ކަމަށާއި އިޖުރާއަތުގެ ތެރެއިން ގާނޫނުއަސާސީއަށް ގެންނަ އިސްލާހުތައް އެއްވެސް ކޯޓަކަށް ބެލޭނެ ކަމަށް ގަބޫލު ނުކުރައްވާ ކަމަށެވެ. އަލީ ހުސައިން ކޯޓުގައި އެދިވަޑައިގެންފައިވަނީ މި އިސްލާޙަކީ ބާތިލު އިސްލާހެއް ކަމަށް ކަނޑައަޅައި ދިނުމަށާއި، މިހާރު ހިނގަމުންދާ 20 ވަނަ ރައްޔިތުންގެ މަޖިލީހުގެ މެންބަރުންގެ މައްޗަށް މި އިސްލާހު ނުހިނގާނެ ކަމަށް ކަނޑައަޅައި ދިނުމަށެވެ.

ރައްޔިތުންގެ މަޖިލީހުގެ މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން މެންބަރުކަން ގެއްލޭ ގޮތަށް ގާނޫނުއަސާސީގެ 73 ވަނަ މާއްދާއަށް ގެނެވުނު އިސްލާޙު ބާތިލުކުރުމަށް އެދި ހުށަހެޅިފައިވާ މައްސަލަ ސުޕްރީމް ކޯޓުގެ ހަތް ފަނޑިޔާރުންގެ ފުލް ބެންޗުން ބަލަން ފެށި އިރު، މި މައްސަލައިގެ އަޑުއެހުމެއް މިއަދު ހެނދުނު 9:00 ގައި ކުރިއަށް ގެންދިއުމަށް ވަނީ ހަމަޖެހިފައެވެ. މި މައްސަލައިގެ ބަލަހައްޓަ ވަނީ އުއްތަމަފަނޑިޔާރު އަޙްމަދު މުއުތަސިމް އަދުނާނެވެ. ބެންޗުގައި ދެން ތިއްބަވާނީ، ފަނޑިޔާރު ޑރ. އަޒްމިރާލްދާ ޒާހިރާއި، ފަނޑިޔާރު އައިޝާ ޝުޖޫން މުހައްމަދު، ފަނޑިޔާރު މަހާޒު އަލީ ޒާހިރު، ފަނޑިޔަރު ހުސްނުއްސުއްސުއޫދު، ފަނޑިޔާރު ޢަލީ ރަޝީދު ހުސައިން، އަދި ފަނޑިޔާރު ޑރ. މުޙައްމަދު އިބްރާހީމެވެ.