ޑަބަލް ޕެންޝަން އުވާލުމަކީ ސަރުކާރުގެ ރިފޯމް އެޖެންޑާގައި ހިމެނޭ މުހިންމު ފިޔަވަޅެއް: ނާޒިމް

Read Time:4 Minute, 37 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

ޑަބަލް ޕެންޝަން އުވާލުމަކީ ސަރުކާތުގެ ރީފޯމް އެޖެންޑާގައި ހިމެނޭ މުހިންމު ފިޔަވަޅެއް ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙްމަދު ނާޒިމް މިއަދު ވިދާޅުވެއްޖެއެވެ. މާލިއްޔަތު ކޮމިޓީގައި ޕެންޝަނާ ގުޅޭ މައްސަލައެއް މަޝްވަރާކުރެވެމުން ދަނިކޮށް ނާޒިމް ވިދާޅުވީ ގައުމުގެ އިޤްތިސާދީ ހާލަތު އަދިވެސް އޮތީ ނާޒުކު ފައްތަރެއްގައި ކަމަށާއި ޚަރަދު ކުރުމުގެ ފިޔަވަޅުތައް އިތުރުކުރަން އެބަޖެހޭ ކަމަށެވެ.

އޭނާގެ ވާހަކަފުޅުގައި ޑަބަލް ޕެންޝަން އުވާލުމަކީވެސް ޚަރަދުތައް ކުޑަކުރުމަށް ވަރަށް މުހިންމު ފިޔަވަޅެއް ކަން ވަނީ ފާހަގަކުރައްވާފައެވެ.

“(ޕެންޝަން) ރިފޯމަކީ މިއީ އައިއެމްއެފްއިން ވެސް ވާލްޑްބޭންކުން މި ރާއްޖޭގެ އިގުތިސޯދީ ރިފޯމް އެޖެންޑާ ތެރޭގައި ތަންފީޒުކުރަން ބުނެފައި އޮތް އިސްލާހެއް އެ އިސްލާހަކީ، އެއީ ވަރަށް މުހިންމު އިސްލާހެއް، ސަބަބަކީ އެކި ގޮތްގޮތަށް ރިޓަޔާކުރެވޭ މީހުންތަކެއް މި އުޅެނީ އިނގޭތޯ އެކި ގާނޫނުގެ ދަށުން. އެންމެންނަށް އެއް ގޮތަކަށް ނެތޭ. މިސާލަކަށް ދަންނަވަންޏާ ފުލުހުން ވެސް ސިފައިން ވެސް އެބަ ރިޓަޔާކުރެވޭ. އަނެއްކާ ރިޓަޔާކުރައްވާފައި އެހެން މަގާމުތަކަށް ވެސް އެބަ ދެވޭ.”، ނާޒިމު ވިދާޅުވިއެވެ.

ނާޒިމް ފާހަގަކުރެއްވި ގޮތުގައި، ޕެންޝަން ދިނުމުގައި ހުރި ތަފާތުތައް ނައްތާލުމަށް ބައިނަލްއަޤްވާމީ މާލީ އިދާރާތަކުން ލަފާދޭތާ އެތައް އަހަރެއް ވެފައިވީ ނަމަވެސް، އެ މައްސަލަ ޙައްލުވާ ތަނެއް ނުފެނެއެވެ. އޭގެ ބަދަލުގައި ފެންނަނީ އަޅަން ނިންމާފައިވާ ފިޔަވަޅުތައް ތަންފީޒުކުރުން ލަސްވަމުންދާ މަންޒަރު ކަމަށް އޭނާ ވިދާޅުވިއެވެ. އަލަށް ރިޓަޔާ ކުރާ މީހުންނަށް ދައުލަތުން މަހުންމަހަށް ދޭ އެލަވަންސް ކަނޑާލުމަށް ނިންމި ނިންމުން އަނބުރާ ގެންދެވިކަން ފާހަގަކުރައްވަމުން ނާޒިމް ވިދާޅުވީ ޕެންޝަން ނިޒާމުގައި ހުރި ތަފާތުކުރުންތައް ނައްތާލައި ޑަބަލް ޕެންޝަން އުވާލުމަކީ ސަރުކާރުގެ ރިފޯމް އެޖެންޑާގައި ހިމެނޭ މުހިންމު ފިޔަވަޅެއް ކަމަށެވެ.

މި މައްސަލަ ޙައްލުކުރުމަށްޓަކައި، ނާޒިމް ހުށަހަޅުއްވާފައިވަނީ ރިފޯމް ކޮމިޝަނަރާ މާލިއްޔަތު ކޮމިޓީން ބައްދަލުކޮށް، ރިފޯމްތައް ގެނައުމަށް ކަނޑައަޅާފައިވާ ޓައިމްލައިނެއް ސާފުކޮށް، އެ ތާވަލާ އެއްގޮތަށް މަސައްކަތްތައް ކުރިއަށް ގެންދިއުމަށެވެ. އަދި މިކަމާ ގުޅޭގޮތުން އިތުރު މަޢުލޫމާތު ހޯދުމަށް ފިނޭންސް މިނިސްޓަރުވެސް ކޮމިޓީއަށް ހާޒިރުކުރެވިދާނެ ކަމަށް އޭނާ ވިދާޅުވިއެވެ.