ރޯދަ މަހު އުމްރާވެރިންނަށް އިތުރު 1،500 ޑޮލަރު ހަމަޖައްސަން ރައީސް އަންގަވައިފި

Read Time:5 Minute, 31 Second

(ފޮޓޯ ކްރެޑިޓްސް: ހައްޖު ކޯޕަރޭޝަން)

ކުރިއަށް އޮތް ރަމަޟާން މަހު އުމްރާއަށްދާ މީހުންނަށް އިތުރު 1،500 ޑޮލަރު ލިމިޓެއް ހަމަޖައްސަން ރައީސް ޑރ. މުހައްމަދު މުއިއްޒު މިއަދު އަންގަވައިފިއެވެ. ރައީސް ޑރ. މުއިއްޒު “އެކްސް” ގައި ކުރެއްވި ޕޯސްޓެއްގައި ވިދާޅުވި ގޮތުގައި އެ ބަދަލު ގެންނަން ނިންމީ މި އަހަރުގެ ރަމަޟާން މަހު އުމްރާއަށްދާ މީހުންނަށް ބޭންކްގެ ރަސްމީ ރޭޓުގައި ޑޮލަރު ހޯދުމުގައި ލުއި ފަސޭހަ ހައްލެއް ހަމަޖައްސައިދިނުމުގެ ގޮތުންނެވެ.

1446 ވަނަ އަހަރުގެ ރަމަޟާންމަހު ޢުމްރާއަށް ވަޑައިގަންނަވާ ފަރާތްތަކަށް ބޭންކްގެ ރަސްމީ ރޭޓުގައި ޑޮލަރު ހޯދުމުގައި ލުއި ފަސޭހަ ޙައްލެއް ހަމަޖައްސައިދިނުމުގެގޮތުން، ކޮންމެ ޢުމްރާވެރިއެއްގެ ބޭންކް އޮފް މޯލްޑިވްސް ޑެބިޓް ކާޑަށް، މިހާރު އޮންނަ ޑޮލަރުގެ ލިމިޓުގެ އިތުރުން 1500 ޑޮލަރުގެ…

— Dr Mohamed Muizzu (@MMuizzu) February 10, 2025

އެގޮތުން ކޮންމެ އުމްރާވެރިއެއްގެ ބޭންކް އޮފް މޯލްޑިވްސް (ބީއެމްއެލް) ޑެބިޓް ކާޑަށް، މިހާރު އޮންނަ ޑޮލަރުގެ ލިމިޓުގެ އިތުރުން 1،500 ޑޮލަރުގެ ލިމިޓެއް ހަމަޖައްސަވައި ދެއްވުމަށް ބީއެމްއެލް އަދި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ދަންނަވާފައިވާނެ ކަމަށް ރައީސް ވިދާޅުވިއެވެ. ކޮންމެ އުމްރާވެރިއެއްގެ ބީއެމްއެލް ޑެބިޓް ކާޑް ލިމިޓަކީ މިހާރު 250 ޑޮލަރެވެ. ރައީސް ޑރ. މުއިއްޒު ނިންމަވާފައި ވަނީ 250 ޑޮލަރު ހިމެނޭ ގޮތަށް އިތުރު 1،500 ޑޮލަރާއެކު ޖުމްލަ 1،750 ޑޮލަރު މިފަހަރުގެ ރަމަޟާން މަހު އުމްރާއަށްދާ ދިވެހިންނަށް ހަމަޖައްސައި ދިނުމަށެވެ.

މީގެއިތުރުން، ބީއެމްއެލް އިން ކޮންމެ ޓިކެޓަކަށް 500 ޑޮލަރު ދޫކުރެއެވެ. ރާއްޖެއަށް ދިމާވެފައިވާ ޑޮލަރުގެ މައްސަލަ ހައްލުކުރުމަށް ރައީސް ޑރ. މުއިއްޒުގެ ސަރުކާރުން ވަނީ ވަރުގަދަ ފިޔަވަޅުތަކެއް އަޅައިފައެވެ. ސަރުކާރުން އެޅި އެންމެ ބޮޑު ފިޔަވަޅަކީ ފަތުރުވެރިކަމުގެ ސިނާއަތުން ލިބޭ ޑޮލަރު ރާއްޖޭގެ ބޭންކުތަކަށް މާރުކުރަން މަޖުބޫރުވާ ގޮތަށް ހެދި ގާނޫނެވެ. ރައީސް ޑރ. މުއިއްޒު، ދާދި ފަހުން ހއ. އަތޮޅަށް ކުރެއްވި ދަތުރުފުޅުގައި ހއ. ހޯރަފުއްޓަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން އެމަނިކުފާނު ވިދާޅުވީ ފަތުރުވެރިކަމުގެ ސިނާއަތުން ލިބޭ ޑޮލަރު ރާއްޖޭގެ ބޭންކުތަކަށް މާރުކުރަން މަޖުބޫރުވާ ގޮތަށް ހެދި ގާނޫނުގެ ސަބަބުން މިދިޔަ މަހުގެ 27 ގެ ނިޔަލަށް 25 މިލިއަން ޑޮލަރު ލިބިފައިވާ ކަމަށެވެ.

ރައީސް ޑރ. މުއިއްޒު ވިދާޅުވީ ވޭތުވެދިޔަ 14 މަސް ދުވަހުގެ ތެރޭގައި ހައްލު ކުރަން އެންމެ ބޮޑަށް މަސައްކަތް ކުރީ ޑޮލަރުގެ ތާށިކަމުގެ މައްސަލަ ކަމަށެވެ. އެކަން ހައްލު ކުރުމަށް ބޭރު ފައިސާއާ ބެހޭ ގާނޫނެއް ހަދައި ގެޒެޓްކޮށް އަމަލު ކުރަން ފަށާފައިވާ ކަމަށް ވެސް އެމަނިކުފާނު ވިދާޅުވިއެވެ. ރައީސް ޑރ. މުއިއްޒު ވިދާޅުވި ގޮތުގައި ރައްޔިތުންގެ ހައްގުގައި ތަންފީޒު ކުރަން ފެށި ގާނޫނަށް ގިނަ ރިސޯޓުތަކެއްގެ އެއްބާރުލުން ލިބެމުން އަންނަ ކަމަށެވެ. އެކަމަކު، އެ ގާނޫނަށް ތަބާނުވާ މަދު ރިސޯޓުތަކެއް އަދިވެސް އެބަހުރި ކަމަށް ރައީސް ވިދާޅުވިއެވެ.