ފްލޯޓިން ސޯލާ ސިޓީ ތަރައްގީކޮށް، ކަރަންޓަށް ހަރަދުކުރާ 43 މިލިއަން ޑޮލަރު ސަލާމަތްކުރެވޭނެ: ސައީދު

Read Time:4 Minute, 46 Second

(ފޮޓޯ ކްރެޑިޓްސް: ވަގުތު)

ފްލޯޓިން ސޯލާ ސިޓީ ތަރައްގީކުރެވުމުން ދައުލަތުން ކަރަންޓަށް ހަރަކުރާ ފައިސާގެ ތެރެއިން 43 މިލިއަން ޑޮލަރު ސަލާމަތްކުރެވޭނެ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ. ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނުގެ ދަށުން ހިންގާ ފުރަތަމަ ޕްރޮޖެކްޓު ކަމަށްވާ ފްލޯޓިން ސޯލާ ޕެނަލް ހަރުކުރުމުގެ މަޝްރޫއު 2027 ވަނަ އަހަރަށް ނިންމާނެ ކަމަށް ރައީސް ޑރ. މުހައްމަދު މުއިއްޒު އިއްޔެ ވަނީ ވިދާޅުވެފައެވެ.

“މި މަޝްރޫއުގެ އަމަލީ މަސައްކަތް މި އަހަރު މެދު ތެރޭގައި ފަށައި، 2027 ވަނަ އަހަރުގެ ތެރޭގައި ނިންމައި އޭގެ ނަފާ ލިބެން ފަށާނެ” ރައީސް ގާތްގަނޑަކަށް 1.6 ބިލިއަން ރުފިޔާ ޚަރަދުވާނެ ކަމަށް ލަފާކުރެވޭ މި ޕްރޮޖެކްޓުގެ ފުރަތަމަ މަރުހަލާގެ ހުއްދަ ކެނެޑާގެ އެބްރަކްސަސް ޕަވަރ ކޯޕަރޭޝަނަށް މިދިޔަ އަހަރުގެ އެޕްރީލް މަހު ދީފައިވާ ކަމަށް ރައީސް ފާހަގަކުރެއްވިއެވެ.

“ރިޔާސީ ބަޔާން 2025 ފޯރަމް”ގައި ރޭ ވާހަކަދައްކަވަމުން ސައީދު ވިދާޅުވީ އިޔާދަކުރުވަނި ހަކަތަ ރާއްޖޭގައި ތަރައްގީކުރުމަށް އެނާޖީ އޮތޯރިޓީއާއި އެންވަޔަރަމެންޓް މިނިސްޓްރީއާއިއެއްކޮށް މަސައްކަތްތަކެއް ކޮށްފަިއވާ ކަމަށެވެ. “ކުރެވިފައިހުރި މަސައްކަތަށް ބަލާއިރު 100 އަށްވުރެ ގިނަ މެގާ ވޮޓްގެ ސޯލާ މޫދުގައި އަތުރާލައި ސޯލާ ސިޓީއެއްގެ ގޮތުގައި މާލެ ކައިރިގައި ސްޕްރެޑެއް ހެދުމަށް މަޝްވަރާކޮށްފައިވާނެ. އެ ސޯލާ ސިޓީއިން އުފައްދާ ކަރަންޓުން ގާތްގަނޑަކަށް އަހަރަކު 43 މިލިއަން ޑޮލަރު ސަލާމަތް ކުރެވޭނެ. މާނައަކީ އިޔާދަކުރުވަނި ހަކަތަ ނޫން އާންމު އުސޫލުން ރާއްޖޭގައި ކަރަންޓު އުފައްދާ ތެޔޮ އިމްޕޯޓްކޮށްގެން ހިންގާ ކަމަށްވަންޏާ އެއާއި އަޅާކިޔާއިރު 43 މިލިއަން ޑޮލަރު އަހަރަކު ސޭވް ކުރެވޭނެ ވާހަކަ. ސްޕެޝަލް އެކޮނަމީ ޒޯންގެ ފުރަތަމަ މަސައްކަތައް މި މަސައްކަތް ވެގެންދާނެ.”ސައީދު ވިދާޅުވިއެވެ.

އޭގެ އިތުރުން ރޭގެ ފޯރަމްގައި ސައީދު ވިދާޅުވީ މިސަރުކާރުން ވެރިކަމާއި ހަވާލުވިއިރު އޮތީ މާލީ އަދަވަޅެއްގެ ތެރޭގައި ކަމަށެވެ. މާލީ ދަތި ހާލުގައިވެސް ރައީސް ފައިސާ ޗާޕްކުރުން ހުއްޓާލި ކަމަށް ވިދާޅުވިއެވެ. ފައިސާ ޗާޕްކޮށްގެން ދައުލަތެއް ހިންގުމަކީ ފަސޭހަގޮތް ކަމަށާއި ނަމަވެސް ގައުމަށް މާދަމާ ވާނެ ގޮތްތަށް ވިސްނި ވަޑައިގަންނަވާތީ އެކަން އެގޮތަށް ނުކުރެއްވި ކަމަށް ވިދާޅުވިއެވެ.

ސައީދު ވިދާޅުވީ ރައީސްގެ އިރުޝާދާއިއެކު ފިނޭންސް މިނިސްޓްރީން ކުރެއްވި މަސައްކަތުގެ ނަތީޖައަކީ ގައުމު ނުދަރާ އޮތުން ކަމަށެވެ. ހަގީގަތުގައި ރައީސް ހޯދެއްވި އެންމެ ބޮޑު ކާމިޔާބީއަކީ އެއީ ކަމަށް ވިދާޅުވިއެވެ.