ޝުޖާއު އެމްޑީޕީއަށް: ޖަންގަލީގެ އުސޫލު މި ގައުމުގައި އާންމުކުރަން ފުރުސަތެއް ނުދޭނެ

Read Time:3 Minute, 51 Second

(ފޮޓޯ ކްރެޑިޓްސް: ރައްޔިތުންގެ މަޖިލިސް)

ޖަންގަލީގެ އުސޫލު މި ގައުމުގައި އާންމުކުރަން ފުރުސަތެއް ނުދެއްވާނެ ކަމަށް ވިދާޅުވެ، ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު އެމްޑީޕީގެ ޗެއާޕާސަން ފައްޔާޒް އިސްމާއިލް ދެއްކި ވާހަކަތަކަށް ވަރުގަދަ ރައްދެއް ދެއްވައިފިއެވެ. 7 ފެބްރުއަރީ 2012 ވަނަ އަހަރު ވެރިކަން ބަދަލުކޮށްލީ ބަޤާވާތްކޮށްގެން ކަމަށް އެމްޑީޕީން ދަނީ ތަކުރާރުކޮށް ބުނަމުންނެވެ.

އެ ވެރިކަން ބަދަލުވިތާ 13 އަަހަރު މިއަދު ފުުރުމާއި ގުޅިގެން ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ މީގެ 13 އަހަރު ކުރިން އެމްޑީޕީގެ ފުރަތަމަ ސަރުކާރު ބަޢާވާތަކުން ވައްޓާލުމަކީ މިފަހުގެ ތާރީހެއްގައި ރާއްޖޭގެ ޑިމޮކްރަސީއަށް ދެވުނު އެންމެ ބޮޑު ހަމަލާ ކަމަށެވެ. އެއީ ވެރިކަމުގެ ނިޒާމާއި ދައުލަތުގެ އިދާރާތަކަށް އޮތް ރައްޔިތުންގެ އިތުބާރު ގެއްލުވާލައި ޑިމޮކްރަސީގެ ދަތުރުގައި ބޮޑެތި ގެއްލުންތަކެއް ލިބިގެންދިޔަ ދުވަހެއް ކަމަށް ފައްޔާޒް ވިދާޅުވިއެވެ.

“އެ ބަޢާވާތުގެ މައްޗަށް ރައްޔިތުންގެ ބާރުވެރިކަން ކުރި ހޯދީ ބިރުވެރި މާހައުލެއްގައި އެތައް ބަޔަކު ކުރި ހިތްވަރުގަދަ މަސައްކަތްތަކަކުން. ރައްޔިތުންގެ ބާރުވެރިކަން ކަށަވަރު ކުރުމުގެ މަސައްކަތުގައި ދެގޮތެއް ނުވެ އަޅުގަނޑުމެން ދެމިތިބޭނަން.”، ފައްޔާޒު ވިދާޅުވިއެވެ. އެ ޕޯސްޓާއި ގުޅިގެން ޝުޖާއު ވިދާޅުވީ މީގެ 13 އަހަރު ކުރިން ވެރިން ރައްޔިތުންނަށް ހަރާން ކޯރުވެ، ރައްޔިތުންގެ މުދާ ނުއަގުގައި ވިއްކާ،ދައުލަތް ލޫޓުވައި،ރައްޔިތުން ސަރުކާރު ހިންގުމަށް ދިން ފުރުސަތުގެ ބޭނުން ނަހަމަގޮތުގައި ހިފައި ،އެންމެން އެކުގައި ރޭގަނޑު ހަަމައިން ނެއްޓި ބޮއި މަޖާކުރުމުގައި ވެރިކަމުގެ ދުވަސްތައް ހޭދަކުރަން ހެދުމުން ރައްޔިތުން ނުކުމެ ދިންބާރު އަތުލުމަކީ ބަގާވާތެއް ނޫން ކަމަށެވެ.

އަދި ޝުޖާއު ވިދާޅުވީ “ހޭވެރިކަން ވީމާ ނުކުމެ ދައުލަތުގެ މުދަލުގައި ހުޅުޖަހައި ދައުލަތެއްގެ ސިފަ ގެއްލުވާލި.”ކަމަށެވެެ. ޝުޖާއު ވިދާޅުވީ ޖަންގަލީގެ އުސޫލު މި ގައުމުގައި އާންމުކުރަން ފުރުސަތެއް ނުދެއްވާނެ ކަމަށެވެ.