Read Time:7 Minute, 24 Second
(ފޮޓޯ ކްރެޑިޓްސް: ރައްޔިތުންގެ މަޖިލިސް)
އައިސީޓީގެ ދާއިރާއިން އިންގިލާބީ ބަދަލެއް ގެނައުމުގެ މަސައްކަތް ފަށާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ. ރައްޔިތުންގެ މަޖިލީހުގެ މިއަދުގެ ޖަލްސާގައި ރިޔާސީ ބަޔާން އިއްވަމުން ރައީސް ވިދާޅުވީ، ގައުމު އުފެއްދުންތެރިކަމުގެ މިންގަނޑުގައި 2030 އާ ހަމައަށް ދާއިރު އައިސީޓީ ދާއިރާގެ ހިއްސާ 15 އިންސައްތައަށް މަތިކޮށް، އަދި ޑީޖިޓަލް އިކޮނޮމީގެ މަންފާތައް ދިވެހީންނަށް ފޯރުކޮށްދިނުމަކީ ސަރުކާރުން ހާއްސަ އަހަންމިއްޔަތު ކަމެއް ދީގެން ކުރިއަށް ގެންދާ މަސައްކަތެއް ކަމަށެވެ.
އެގޮތުން އައިސީޓީގެ ދާއިރާއަށް އިންގިލާބީ ބަދަލެއް ގެނައުމަށް ޓަކައި ވެސް ސަރުކާރުން މުހިންމު މަސައްކަތްތަކެއް ފަށަައިގެން ކުރިއަށް ގެންދާ ކަމަށް އެމަނިކުފާނު ވިދާޅުވިއެވެ. އެގޮތުން ނިމިދިޔަ ހަފްތާގައި އެކަމާ ބެހޭ ގޮތުން ވަޒީރުގެ މަޖިލީހުގައި ފުޅާދާއިރާއެއްގައި މަޝްވަރާކޮށް ނިންމުންތަކެއް ނިންމާފައިވާ ކަމަށް އެމަނިކުފާނު ވަނީ ފާހަގަކުރައްވާފައެވެ. އޭގެ ތޭރޭގައި ސަރުކާރުން ޓެކްނޮލޮޖީގެ ގަވަނަންސް ހަރުދަނާ ކުރުން، ޑިޖިޓަލް އައިޑެންޓިޓީ ކަދު ތައާރަފް ކުރުން، ޑެޓާ ޝެއަރިން ޕްލެޓްފޯމެއް ބިނާކުރުން، ސައިބަރ ސެކިއުރިޓީ ހަރުދަނާ ކުރުން ފަދަ އެތައް ކަމެއް ހިމެނޭ ކަމަށް އެމަނިކުފާނު ވިދާޅުވިއެވެ.
“އާދެ އަޅުގަނޑު މިއަހަރު އެންމެ ފުރަތަމަ ރާއްޖެއިން ބޭރަށް ކުރި ދަތުރަކީ ވެސް މިކަމަށް މަގު ކޮށުމަށް ކުރި ވަރަށް މުހިންމު ދަތުރެއް،” ރައީސް ވިދާޅުވިއެވެ. ރާއްޖޭގައި ޑިޖިޓަލް އައިޑީއެއްގެ ގޮތުގައި އީ-ފާސް ތަރައްޤީ ކުރެވިފައިވީ ނަމަވެސް، ބައިނަލްއަޤްވާމީ މިންގަނޑުތަކާއި، ބެސްޓް ޕްރެކްޓިސްތަކާއި ހަމަ ކުރެވޭ މިންވަރަށް ޑިޖިޓަލް އައިޑީ ތަރައްޤީކޮށް އީފާސްގެ އާކިޓެކްޗަރ ހަރުދަނާ ކުރެވިފައިނުވާނެ ކަމަށް އެމަނިކުފާނު ވިދާޅުވިއެވެ. އެހެންކަމުން މި ދާއިރާ ވެސް ބައިނަލްއަޤުވާމީ މިންގަނޑުތަކަށް ފެތޭހެން ތަރައްޤީކޮށް ކުރިއަރުވަން ޖެހޭ ކަމަށް އެމަނިކުފާނު ވިދާޅުވިއެވެ. އެގޮތުން އޯޕަން ޑާޓާ ޝެއަރިންގް ޕްލެޓްފޯމް ތަރައްޤީކޮށް ޑިޖިޓަލް އައިޑެންޓިޓީގެ ޒަރިއްޔާއިން ޚިދުމަތް ފޯރުކޮށްދޭ އެޕްލިކޭޝަންތަކުން ދައުލަތުގެ ހުރިހާ ޚިދުމަތެއް ލިބޭނޭ ގޮތަށް މުޅި ސިސްޓަމް ބައްޓަންކުރަން ޖެހިފައިވާ ކަމަށް ވިދާޅުވިއެވެ. 21 ވަނަ ޤަރުނުގެ ދިވެހިރާއްޖެއަށް މި ޒަމާނީ ބޮޑު ޑިޖިޓަލް އިންޤިލާބީ ބަދަލު ގެންނަން ބޭނުންވާ ކަމަށް އެމަނިކުފާނު ވަނީ ހާމަކުރައްވައިފައެވެ.
މި މަސައްކަތްތަކުގެ ނަތީޖާއަކަށް ވާނީ ކޮރަޕްޝަން ނައްތާލުމަށް ފަސޭހަވެގެން ދިއުން، ސަރުކާރުގެ ސިޔާސަތުތައް ހާމަކަންބޮޑު ގޮތެއްގައި މީހުންނަށް ފެންނަން ފެށުން އަދި ސިޓީތަކާއި އެހެނިހެން ފޯމުތައް ހުށަހެޅުމަށް އިސްރާފުވެ ގެއްލިގެންދާ ވަގުތުތައް ސަލާމަތްވުން ކަމަށް އެމަނިކުފާނު ވަނީ ފާހަގަކުރައްވައިފައެވެ. އެހެން ކަމުން ވަކި ނިޒާމެއްގެ ތެރެއިން ކަންކަމުގެ “ސްޓޭޓަސް” ބަލާލެވި ސަރުކާރުން ކުރަމުންދާ މަސައްކަތް ވަގުތުން ފެންނަމުންދާނެއެވެ. ތިމާގެ އަމިއްލަ ރެކޯޑްތަކަށް އެއްވެސް ފަރާތަކުން އެކްސެސް ވިއަސް، ބަދަލެއް ގެނައިކަމުގައި ވިޔަސް، އޭގެ ފުރިހަމަ މަޢުލޫމާތު އެމީހަކަށް ވަގުތުން ބަލާލުމުގެ ހިތްހަމަޖެހުމާއި، ރައްކާތެރިކަން ޔަޤީންވެގެންދާނެ ކަމަށް އެމަނިކުފާނު ވިދާޅުވިއެވެ.
“ޑިޖިޓަލައިޒޭޝަންގެ މި ނިޒާމް ޤާއިމުވެގެންދާނީ ވަކި އޮފީހެއް ވަކި މުއައްސަސާއެއްގައެއް ނޫން. ދައުލަތުގެ ހުރިހާ މުއައްސަސާއެއްގައި. އެއް ގޮތަކަށް. އެއް މިންގަނޑަކަށް. ދުނިޔޭގައި ކުރިއަރާފައިވާ، މިފަދަ އިތުބާރު ހުރި ފަސޭހަ ޒަމާނީ ގޮތްތައް ދިވެހި ލޮބުވެތި ރައްޔިތުންގެ ދިރިއުޅުމުގެ ބަޔަކަށް ހަދަން އަޅުގަނޑު ބޭނުން،” ރައީސް ވިދާޅުވިއެވެ. ހަތަރު އަހަރު ދުވަހުގެ މި މަޝްރޫޢު ސަރުކާރާއި ދައުލަތުގެ މުއައްސަސާތަކުގެ ވެރިންނާއި މުވައްޒަފުންނައި، އެންމެހާ ދިވެހި ލޮބުވެތި ރައްޔިތުންގެ ތާއީދާއި އެހީތެރިކަމާއެކު ކާމިޔާބުކަމާއެކު ތަންފީޒުކުރައްވާނެ ކަމަށް އެމަނިކުފާނުގެ ވަނީ ވިދާޅުވެފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0