ލޯން ސްކީމްގެ %25 ހާއްސަ ކުރަނީ ހާއްސަ އެހީއަށް ބޭނުންވާ އަންހެނުންނަށް

Read Time:5 Minute, 26 Second

އަންހެނުންެ ވިޔަފާރީގެ ދާއިރާއަށް ނުކުތުމަށް ހިތްވަރުދިނުމަށް 100 މިލިއަން ރުފިޔާގެ ޚާއްސަ ލުއި ލޯނު ސްކީމެއް ތައާރަފް ކުރެވިފައިވާ އިރު، މި ލޯނު ސްކީމުގެ 25 އިންސައްތަ ހާއްސަކުރެވިފައިވަނީ ހާއްސަ އެހީއަށް ބޭނުންވާ އަންހެނުންނަށް ކަމަށް ރައީސް ޑރ. މުޙައްމަދު މުއިއްޒު ވިދާޅުވެއްޖެއެވެ. ރައްޔިތުންގެ މަޖިލީހުގައި ރިޔާސީ ބަޔާން އިއްވަމުން ރައީސް މުއިއްޒު ވިދާޅުވި ގޮތުގައި، މި ސަރުކާރުން ގައުމު ތަރައްގީ ކުރާނީ އެއްވެސް ބަޔަކު ބާކީ ނުކޮށެވެ. އެގޮތުން، އަންހެނުންގެ ކުރިއެރުމާއި އެ ކަނބަލުން ބާރުވެރިކުރުވައި ފުރުސަތުތައް ފަހިކުރުމަކީ މި ސަރުކާރުން ވަރަށް އިސްކަން ދޭ ކަމެއް ކަމަށް ރައީސް ވިދާޅުވިއެވެ.

“މި ޚާއްސަ ލޯން ސްކީމްގެ 25 އިންސައްތަ ޚާއްސަކުރެވިފައިވާނީ ނުކުޅެދުންތެރިކަން ހުންނަ އަންހެނުންނަށް. މި ލޯނުސްކީމްގެ ދެވަނަ ފިޔަވަހި މި އަހަރުގެ ތެރޭގައި އިރާދަކުރެއްވިއްޔާ ކުރިއަށް ގެންދެވޭނެ.” ރައީސް ވިދާޅުވިއެވެ.

މި ޚާއްސަ ލޯނު ސްކީމްގެ ފުރަތަމަ ފިޔަވަހީގައި 60 ފަރާތަކަށް މިހާރު ވަނީ ލޯނު ދޫކުރެވިފައެވެ. މި ސްކީމަކީ އަންހެނުން ވިޔަފާރީގެ ދާއިރާއަށް ނުކުތުމަށް ހިތްވަރުދިނުމަށްޓަކައި ތަޢާރަފުކުރެވިފައިވާ ސްކީމެއް ކަމަށާއި، މިއީ އަންހެނުންގެ އިގްތިސާދީ ބައިވެރިވުން އިތުރުކޮށް، އެ ކަނބަލުން ބާރުވެރިކުރުވުމަށް އެޅޭ މުހިންމު ފިޔަވަޅެއް ކަމަށް ރައީސް ފާހަގަކުރެއްވިއެވެ.

އަންހެނުންނަށް ހާއްސަކޮށް “ސްޓާޓްއަޕް ލޯން ސްކީމް” އެއް ތައާރަފުކުރުމަކީ ސަރުކާރުގެ ހަފުތާ 14 ގެ މަގުޗާޓުގައި ހިމަނުއްވާފައިވާ ކަމެކެވެ.

(ފޮޓޯ ކްރެޑިޓްސް: ވަގުތު)

އަންހެނުން އުފައްދާ އުފެއްދުންތައް ވިއްކުމަށް ޚާއްސަ ސަރަހައްދެއް ހުޅުމާލޭގައި ކަނޑައަޅައި، ވިޔަފާރި ކުރުމަށް ފަސޭހަ އިންތިޒާމުތަކެއް، ފުރަތަމަ 63 ދުވަސް ތެރޭގައި ހަމަޖައްސައިދިނުން ހިމެނެއެވެ. އަންހެން ވިޔަފާރިވެރިންގެ ތެރެއިން އާމްދަނީ ކަށަވަރު ނުވުމުގެ ސަބަބުން ކޮންވެންޝަނަލް ބޭންކުތަކުން ހިދުމަތް ލިބިދިނުމުގައި ދަތިތައް ދިމާވާ ފަރާތްތަކަށް މި ސަރުން ވަނީ “ފަށާ މަދަދު” ލޯނުން ފައިނޭންސް ކޮށްދިނުމަށް ހަމަޖެހިފައެވެ. މިގޮތުން މި ފަރާތްތަކަށް 100،000 – 500،000ރ. ހަމައަށް ލޯނު ދޫކުރެވޭއިރު، ލޯނު އަނބުރާ ދެއްކުމަށް ހަތް އަހަރުގެ މުއްދަތެއް ލިބިގެން ދާނެއެވެ. މި ލޯނުގެ އިންޓަރެސްޓްގެ ގޮތުގައި އަހަރަކު %6 ނަގާނެއެވެ.

މީގެއިތުރުން ލީސިން ފައިނޭންސްގެ ގޮތުގައި ފައިސާ ހޯދަން ބޭނުންވާ އަންހެން ވިޔަފާރިވެރިންނަށް ފަސޭހަ އިންތިޒާމުތަކެއް ހަމަޖައްސައިދިނުމަށާއި ރާއްޖޭގައި ހައްދާ ބާވަތްތައް މާކެޓުކޮށް ގަނެ ވިއްކުމަށް ޚާއްސަ ނިޒާމެއް ގާއިމުކުރުމާއި އެ ނިޒާމުގެ ތެރެއިން އަންހެނުންނަށް ޚާއްސަ ފުރުސަތުތަކެއް ފަހިކޮށްދިނުމާއި ފަތުރުވެރިކަމުގެ ދާއިރާގައި ވަޒީފާ އަދާކުރާ އަންހެން މުވައްޒަފުން އިތުރުކުރުމަށް ޚާއްސަ ޕްރޮގްރާމެއް ހިންގަން ފެށުމަށް ވެސް ހަފުތާ 14 ގެ މަގުޗާޓުގައި ވަނީ ހިމަނުއްވައިފައެވެ.