މޯލްޑިވިއަންގެ ބޮޑު ބޯޓުގައި ޗައިނާއަށް މަސް އެކްސްޕޯޓްކުރަން މަޝްވަރާކޮށްފި

Read Time:5 Minute, 30 Second

ރާއްޖޭގެ ޤައުމީ އެއަރލައިން މޯލްޑިވިއަންގެ އައު ވައިޑްބޮޑީ މަތިންދާބޯޓު މެދުވެރިކޮށް ޗައިނާއަށް ރާއްޖޭގެ މަސްވެރިކަމުގެ އުފެއްދުންތައް އެކްސްޕޯޓުކުރުމުގެ ފުރުސަތުތައް ބަލައި ދިރާސާކުރުމަށް މަޝްވަރާތަކެއް ފަށައިފިއެވެ. މި މަޝްވަރާތައް ކުރިއަށް ގެންގޮސްފައިވަނީ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)، މޯލްޑިވްސް ސްޓޭޓް ޝިޕިންގ (އެމްއެސްއެސް)، މޯލްޑިވިއަން އަދި މަސްވެރިކަމުގެ ސިނާއަތުގެ މުހިންމު ބައިވެރިންނާ ދެމެދުގައެވެ. ފިޝަރީޒް މިނިސްޓްރީގެ އިންސްޓަގްރާމް ޕޯސްޓެއްގައި ބުނެފައިވާ ގޮތުން، މި ބައްދަލުވުމުގެ ރިޔާސަތު ބަލަހައްޓަވާފައިވަނީ ފިޝަރީޒް މިނިސްޓަރު އަޙްމަދު ޝިޔާމެވެ.

ފިޝަރީޒް މިނިސްޓްރީން އެކްސްގައި ކުރެއްވި ޕޯސްޓެއްގައި ބުނާގޮތުން، މި މަޝްވަރާތަކުގެ މަޤްޞަދަކީ މަސްވެރިކަމުގެ ދާއިރާއިން އެކްސްޕޯޓުކުރުމުގެ ފުރުސަތުތައް އިތުރުކުރުމެވެ. މިހާރު ޤައުމީ އެއަރލައިނުން ޗައިނާގެ ތިން މަންޒިލަކަށް ސީދާ ދަތުރުތައް ކުރަމުންދާތީ، މި ދަތުރުތަކުގައި މަހުގެ އުފެއްދުންތައް އެކްސްޕޯޓުކުރުމުން ދައުލަތަށް ލިބޭ އާމްދަނީ އިތުރުވާނެ ކަމަށް ބެލެވެއެވެ. މީގެ އިތުރުން، ޗައިނާއާއި ދިވެހިރާއްޖެއާ ދެމެދު ވެފައިވާ ވިޔަފާރީގެ މިނިވަން އެއްބަސްވުމުގެ ފައިދާ އިތުރަށް ލިބިގެންދާނެއެވެ.

މޯލްޑިވިއަންގެ އައު ވައިޑްބޮޑީ މަތިންދާބޯޓުގައި 10 ޓަނުގެ ކާގޯ އުފުލޭނެއެވެ. މި ދަތުރުތަކުގެ ސަބަބުން ދިވެހި ވިޔަފާރިތަކަށް އިމްޕޯޓާއި އެކްސްޕޯޓުގެ ގޮތުން އިތުރު ފައިދާތަކެއް ލިބިގެންދާނެ ކަމަށް ބެލެވެއެވެ. މޯލްޑިވިއަންގެ އައު ވައިޑްބޮޑީ މަތިންދާބޯޓު ރާއްޖެއަށް ގެނެސްފައިވަނީ 2024 ވަނަ އަހަރުގެ ޖެނުއަރީ މަހުގެ 6 ވަނަ ދުވަހުއެވެ. މި ބޯޓަކީ 264 މީހުންގެ ޖާގައިގެ މަތިންދާބޯޓެކެވެ. ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާސް ހިމެނޭ ގޮތަށް ފަރުމާކޮށްފައިވާ މި ބޯޓުގައި 18 ބިޒްނަސް ސީޓާއި 36 ޕްރިމިއަމް އިކޮނޮމީ ސީޓުގެ އިތުރުން 210 އިކޮނޮމީ ސީޓު ހިމެނެއެވެ.

މިހާރު މޯލްޑިވިއަންއިން ޗައިނާގެ ތިން މަންޒިލަކަށް ހަފުތާއަކު ތިން ދަތުރު ކުރެއެވެ. އެއީ ޗެންގްޑޫ، ވެރިރަށް ބެއިޖިން އަދި ޝަންގްހާއި އަށެވެ. މި ދަތުރުތަކުގެ ޓިކެޓު އަގުތަކަށް ބަލާއިރު، ޗެންގްޑޫއަށް ދެކޮޅު ޓިކެޓުގެ އަގަކީ 688 އެމެރިކާ ޑޮލަރެވެ. ބެއިޖިންގ އަށް ދެކޮޅު ޓިކެޓުގެ އަގު 788 އެމެރިކާ ޑޮލަރަށް އަރާއިރު، ޝަންގްހާއި އަށް ދެކޮޅު ޓިކެޓުގެ އަގަކީ 777 އެމެރިކާ ޑޮލަރެވެ.

މި މަޝްރޫޢުގެ ސަބަބުން ރާއްޖޭގެ މަސްވެރިކަމުގެ ދާއިރާއަށް އައު ފުރުސަތުތަކެއް ހުޅުވިގެންދާނެ ކަމަށް ބެލެވެއެވެ. އަދި މިކަމުގެ ސަބަބުން ރާއްޖޭގެ އެކްސްޕޯޓު އާމްދަނީ އިތުރުވެ، މަސްވެރިންނަށް ލިބޭ އާމްދަނީ އިތުރުވެގެންދާނެއެވެ. މީގެ އިތުރުން، މިއީ ޗައިނާގެ ބާޒާރުގައި ރާއްޖޭގެ މަހުގެ އުފެއްދުންތަކުގެ ޑިމާންޑް އިތުރުވެ، ދެ ޤައުމުގެ ދެމެދުގައި އޮންނަ ވިޔަފާރީގެ ގުޅުން އިތުރަށް ބަދަހިވެގެންދާނެ ކަމެކެވެ.