މަގޫދޫ އެއާޕޯޓް ރަންވޭގެ އޭބީސީ އެޅުމުގެ %56 މަސައްކަތް ނިމިއްޖެ

Read Time:4 Minute, 21 Second

ފ. މަގޫދޫ އެއާޕޯޓް ރަންވޭގެ އޭބީސީ އެޅުމުގެ %56 މަސައްކަތް ނިމިފައިވާ ކަމަށް އެމްޓީސީސީން ހާމަކޮށްފިއެވެ. އެމްޓީސީސީން ހާމަކުރި ގޮތުގައި މަގޫދޫ އެއާޕޯޓު ތަރައްގީ ކުރުމުގެ މަޝްރޫއުގެ ދަށުން ކުރެވޭ މުހިންމު މަސައްކަތްތަކުގެ ބޮޑު ބައެއް ވަނީ ނިންމާލެވިފައެވެ. މި މަޝްރޫއުގެ މައިގަނޑު މަސައްކަތްތަކުގެ ތެރެއިން ރަންވޭގެ އޭބީސީ އެޅުމުގެ %56 މަސައްކަތް ވަނީ ނިމިފައެވެ. އަދި ޓާމިނަލް ބިލްޑިން އިމާރާތްކުރުމުގެ %53 މަސައްކަތް ވެސް ވަނީ ފުރިހަމަކުރެވިފައެވެ. މީގެ އިތުރުން، ފަޔާ ބިލްޑިން އިމާރާތްކުރުމުގެ %24 މަސައްކަތްވެސް ވަނީ ނިމިފައެވެ.

ނިމިދިޔަ އެމްޑީޕީ ސަރުކާރުގައި މަގޫދޫގައި އެއާޕޯޓް އަޅާ ސަރަހައްދު އެ ރަށު ކައުންސިލުގެ އިހްތިސާސް އިންވެސް ވަނީ ބޭރުކޮށްފައެވެ. މަގޫދޫ އެއަޕޯޓް އަޅާ ސަރަހައްދު އެރަށު ކައުންސިލްގެ އިހުތިސާސުން ވަކިކޮށް އެ ސަރަހައްދަކީ ވަކި އިންޑަސްޓްރިއަލް ރަށެއްގެ ގޮތުގައި އޭރުގެ ސަރުކާރުން ކަނޑައަޅިއެވެ.

ރައީސް ޑރ. މުހައްމަދު މުއިއްޒު ފ.އަތޮޅަށް ކުރެއްވި ދަތުރުފުޅުގައި ދެއްކެވި ވާހަކަފުޅުގައި މި ސަރުކާރުގެ ފިކުރަކީ ތަރައްގީގެ ފިކުރުކަން ފާހަގަކުރައްވައި މަގޫދޫގެ އެއާޕޯޓްގެ މަޝްރޫއުވެސް އަދި ތަރައްގީގެ އެހެން މަޝްރޫއުތައްވެސް ހުއްޓާނުލައްވައި ނިންމަވައިދެއްވާނެކަމުގެ ޔަގީންކަން ވަނީ ދެއްވާފައެވެ. އެހެންކަމުން މަގޫދޫ އެއާޕޯޓުގެ ހުއްޓިފައިވާ މަސައްކަތް 2024 ވަނަ އަހަރު ޖުލައި މަހުގައި ވަނީ އަލުން ފަށާފައެވެ.

މަގޫދޫ އެއަޕޯޓް މަސައްކަތް އެމްޓީސީސީ އާ ހަވާލުކުރެވުނީ 2023 ވަނަ އަހަރު އޮގަސްޓު މަހު 10 ވަނަ ދުވަހުގައެވެ. މި މަޝްރުއޫގެ ދަށުން އެރަށު ބިން ހިއްކުމާއި ގޮނޑޫދޮށް ހިމާޔަތް ކުރުންވެސް ހިމެނެއެވެ. އަދި އެއާޕޯޓު އެޅުމަށް 30.8 ހެކްޓަރުގެ ބިން ހިއްކުމަށް ހަމަޖެހިފައިވާއިރު ރަށުގެ ތަރައްގީ އަށާއި އެހެނިހެން ބޭނުންތަކަށް އިތުރު 17 ހެކްޓަރުގެ ބިންވެސް މި މަޝްރޫޢުގެ ދަށުން ހިއްކިގެން ދާނެއެވެ.

މިއީ 231.5 މިލިޔަން ރުފިޔާގެ މަޝްރޫއެކެވެ. މަގޫދޫގައި އެޅުމަށް ހަމަޖެހިފައިވާ އެއަޕޯޓުގައި 1،500 މީޓަރު ދިގު 30 މީޓަރުގެ ފުޅާ ރަންވޭ އަކާއި ޓެކްސީވޭ، އޭޕްރަން، އަދި ފަޔަޕެޑް / ރޯޑްއާ އެކު ހެދުމާ، ޕެސެންޖާ ޓާމިނަލް އިމާރާތެެއް ހެދުމަށް ވަނީ ހަމަޖެހިފައެވެ. މީގެ އިތުރުން ކޮންޓްރޯލް ޓަވަރާ އެކު ފަޔާ ސްޓޭޝަނެއް ހެދުމަށް ވަނީ ހަމަޖެހިފައެވެ.