ހާއްސަ އެހީއަށް ބޭނުންވާ ޒުވާނާ އެދުނީ ވަޒީފާއަކަށް، ލިބުނީ ފެނަކައިން ވަޒީފާ!

Read Time:3 Minute, 50 Second

ހއ. އުލިގަމުގައި ދިރިއުޅެމުން އަންނަ ހާއްސަ އެހީއަށް ބޭނުންވާ ޒުވާނަކު، ރައީސް ޑރ. މުހައްމަދު މުއިއްޒުގެ އަރިހުން ވަޒީފާއެއް ދިނުމަށް އެދުނުތާ ތިން ދުވަސް ފަހުން، އެކަން ހަމަޖައްސައިދީފިއެވެ. ރައީސް ޑރ. މުއިއްޒު، އަތޮޅުތެރޭގެ ބައެއް ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި އެމަނިކުފާނު އުލިގަމަށް ވަޑައިގަތީ މިދިޔަ ބުރާސްފަތި ދުވަހުއެވެ. އުލިގަމަށް ވަޑައިގަތުމުން އެ ރަށުގެ ބަޔަކު އެމަނިކުފާނަށް ހޫނު މަރުހަބާއެއް ދެންނެވިއެވެ.

ރައީސް ޑރ. މުއިއްޒަށް މަރުހަބާ ދަންނަވަން ނުކުތް މީހުންގެ ތެރޭގައި އުލިގަމު، ފަޒާ، އިހްސާން އަބްދުލް މުހްސިން ހިމެނެއެވެ. އޭނާއަކީ ހާއްސަ އެހީއަށް ބޭނުންވާ ޒުވާނެކެވެ. ސަފުގައި ހުރެ އިހްސާން، ރައީސް ޑރ. މުއިއްޒަށް ދިއްކޮށްލީ ސިޓީއެކެވެ. އެ ސިޓީގައި އިހްސާން ރައީސް ޑރ. މުއިއްޒުގެ އަރިހުގައި އެދުނީ ވަޒީފާއަކަށެވެ. އޭގެ ތިން ދުވަސް ފަހުން އިހްސާން ވަނީ އުލިގަމު ފެނަކަ ބްރާންޗުން ވަޒީފާ ހަމަޖައްސައި ދީފައެވެ. ރައީސް ޑރ. މުއިއްޒުގެ މި ނިންމެވުމާ ގުޅިގެން ގިނަ ބައެއްގެ ތައުރީފް އެމަނިކުފާނަށް ވަނީ ލިބިފައެވެ.

“ރައީސުލްޖުމްހޫރިއްޔާއަކީ ރައްޔިތުންގެ ކަންކަމަށް އިޖާބަދެއްވާ ރައްޔިތުންގެ އިހުސާސްތައް ދެނެވަޑައިގަންނަވާ އޯގާތެރި ބޭފުޅެއް” އެކަކު ކުރި ޕޯސްޓެއްގައިވެއެވެ. އުލިގަމު ރައްޔިތުންނާ ބައްދަލު ކުރައްވައި ރައީސް ޑރ. މުއިއްޒު ވިދާޅުވީ އުލިގަމުގެ ތަރައްގީ އަށް ބޭނުންވާ ގިނަ މަސައްކަތްތައް މިއަހަރުގެ ބަޖެޓުގެ ތެރޭގައި ހިމަނާފައިވާނެ ކަމަށާއި ވަކިން ހާއްސަކޮށް ސިއްހީ ދާއިރާއަށް ބޭނުންވާ ކަންތައްތައް އޭގެތެރޭގައި ހިމެނޭނެ ކަމަށެވެ.

ސިއްޚީ މަރުކަޒުގެ ޖާގަ އާއި އެތަނުގެ ހާލަތާއި އަދި ވަސީލަތްތައް ވަރަށް އާދައިގެ ގޮތަކަށް ކުޑަކޮށް ހުރިކަން ފާހަގަކުރައްވަމުން ރައީސް ވިދާޅުވީ ސިއްހީ ދާއިރާ ތަރައްގީކޮށް އުލިގަމުގައި ފެންވަރު ރަނގަޅު ހިދުމަތްތަކާއެކު ސިއްހީ މަރުކަޒެއް އަޅައި ދެއްވާނެ ކަމަށެވެ. އަދި މި މަސައްކަތް ވަރަށް އަވަހަށް ފެށިގެންދާނެ ކަމަށް ރައީސް ވަނީ ވިދާޅުވެފައެވެ.