Read Time:3 Minute, 50 Second
އާސަންދަ ކުންފުނީގެ މިދިޔަ އަހަރުގެ ހަތަރުވަނަ ކުއާޓާގައި ޚަރަދު 817 އަށް ދަށްވެއްޖެއެވެ. އާސަންދަ ކުންފުނިން ހާމަކުރި އެންމެ ފަހުގެ ތަފާސްހިސާބުތަކުން ދައްކާ ގޮތުގައި، ފާއިތުވެދިޔަ އަހަރުގެ އޮކްޓޫބަރު 1 ވަނަ ދުވަހުން ފެށިގެން ޑިސެންބަރު 31 ވަނަ ދުވަހުގެ ނިޔަލަށް ބޭސްފަރުވާއަށް އާސަންދަ މެދުވެރިކޮށް 817 މިލިއަން ރުފިޔާ ޚަރަދުކޮށްފައިވެއެވެ. މިއީ 2023 ވަނަ އަހަރުގެ މި މުއްދަތާ އަޅާ ބަލާއިރު %4.3 ގެ ދަށްވުމެކެވެ. 2023 ވަނަ އަހަރުގެ ހަތަރުވަނަ ކުއާޓާގައި އާސަންދަ ސްކީމުގެ ދަށުން ބްލޮކްކުރެވުނު ޖުމުލަ ޚަރަދަކީ 854 މިލިއަން ރުފިޔާއެވެ.
ޚިދުމަތް ހޯދި މީހުންގެ އަދަދަށް ބަލާއިރު، ފާއިތުވި އަހަރުގެ ހަތަރުވަނަ ކުއާޓާގައި އާސަންދަ ސްކީމުގެ ދަށުން ޚިދުމަތް ހޯދި މީހުންގެ އަދަދު ވެސް ވަނީ 2023 ވަނަ އަހަރުގެ އެ މުއްދަތާ އަޅާބަލާއިރު ދަށްވެފައެވެ. 2023 ވަނަ އަހަރު ޚިދުމަތް ހޯދި މީހުންގެ ޖުމުލަ އަދަދު 279,851 ގައި ހުރިއިރު، ފާއިތުވީ އަހަރު މި އަދަދު ވަނީ 278,330 އަށް ދަށްވެފައެވެ. އިމަޖެންސީ ހާލަތްތަކަށް ބަލާއިރު، މިދިޔަ އަހަރުގެ ހަތަރުވަނަ ކުއާޓަރުގައި އާސަންދަ ސްކީމްގެ ދަށުން 1,393 ފަހަރު ބަލިމީހުން އެއް ރަށުން އަނެއް ރަށަށް ގެންގޮސްފައިވެއެވެ. މީގެ އިތުރުން، ޖުމުލަ 2,327 ބަލިމީހުން ވަނީ މި ސްކީމްގެ ދަށުން ރާއްޖެއިން ބޭރުން ފަރުވާ ހޯދާފައެވެ.
މި ތަފާސްހިސާބުތަކުން ދައްކާ ގޮތުގައި، އާސަންދައިގެ ޚަރަދުތަކާއި ޚިދުމަތް ހޯދާ މީހުންގެ އަދަދު ކުޑަކޮށް ދަށްވެފައިވީ ނަމަވެސް، އަދިވެސް ގިނަ އަދަދެއްގެ ރައްޔިތުން މި ޚިދުމަތް ބޭނުންކުރަމުންދާކަން ފާހަގަކުރެވެއެވެ. ޚާއްޞަކޮށް، އިމަޖެންސީ ހާލަތްތަކުގައި އަދި ރާއްޖެއިން ބޭރުން ފަރުވާ ހޯދުމަށް އާސަންދައިގެ ޚިދުމަތް މުހިންމު ދައުރެއް އަދާކުރާކަން މި ހިސާބުތަކުން ހާމަވެއެވެ. އާސަންދައިގެ ޚަރަދު ދަށްވެފައިވުމަކީ ޞިއްޙީ ދާއިރާގެ ޚަރަދުތައް ހަރުދަނާކުރުމަށް އެޅިފައިވާ ފިޔަވަޅުތަކުގެ ނަތީޖާއެއް ކަމަށް ބެލެވެއެވެ. ނަމަވެސް، މި ދަށްވުމަކީ ޚިދުމަތުގެ ފެންވަރަށް އަސަރުކޮށްފައިވާ ކަމެއްތޯ ބެލުމަކީ މުހިންމު ކަމެކެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0