ފެންނަމުން މިދަނީ ރައީސް މުއިއްޒު ވެވަޑައިގެންނެވި ވައުދު ފުއްދަވާތަން: އާދަމް ޝަރީފު

Read Time:7 Minute, 3 Second

(ފޮޓޯ ކްރެޑިޓްސް: ވަގުތު)

ރިޔާސީ އިންތިހާބުގެ ކެމްޕެއިނުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންނަށް ވެވަޑައިގެންނެވި ވައުދުތައް ފުއްދަމުންދާ ތަން ފެނިވަޑައިގަންނަވާ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ. ދ އަތޮޅު ކައުންސިލަށް ދެ ފަޅުރަށް، އިނގުރައިދޫ ކައުންސިލަށް ފަޅު ރަށަކާއި އަދި މާވަށު ކައުންސިލަށް ފަޅު ރަށެއް ހަވާލުކުރުމަށް މިއަދު ހެދުނު ވަނީ ހާއްސަ ރަސްމިއްޔާތެއް ބާއްވާފައެވެ.

މި ރަސްމިއްޔާތުގައި ވާހަކަފުޅު ދައްކަވަމުން ވަޒިރު އާދަމް ޝަރީފު ވިދާޅުވީ ރައީސް މުއިއްޒު ރައްޔިތުންނަށް ވެވަޑައިގެންނެވި ވައުދުތައް ފުއްދަމުންދާ މަންޒަރު ފެނިވަޑައިގަންނަވަމުންދާ ކަމަށާއި ކައުންސިލްތައް މާލީ ގޮތުން ބާރުވެރިކުރުމަށް ރައީސް ނިންމީ ފަޅުރަށްތައް ކައުންސިލްތަކަށް ދޫކުރެވޭނެ ނިޒާމެއް ޤާއިމުކޮށް އުސޫލުތަކެއް ކަނޑައެޅުމަށް ކަމަށެވެ.

“މިއަދު އަޅުގަނޑުމެންނަށް ފެންނަމުން މިދަނީ ދިވެހިރާއްޖޭގެ ލާމަރުކަޒީ ނިޒާމު ހަރުދަނާކުރުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ވައުދު ފުއްދަވާތަން. އެ މަންޒަރު، އެ ހެކި އަޅުގަނޑުމެންނަށް ފެނިގެން މިދިޔައީ.” ވަޒީރު ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

އެ އުސޫލުގެ ތެރެއިން ދ އަތޮޅު ކައުންސިލަށް ދެ ފަޅުރަށް، އިނގުރައިދޫ ކައުންސިލަށް ފަޅު ރަށަކާއި އަދި މާވަށު ކައުންސިލަށް ފަޅު ރަށެއް ދޫކުރީ ކަމަށް ވަޒީރު ވަނީ ވިދާޅުވެފައެވެ. މިއީ ލާމަރުކަޒީ ނިޒާމަށް ލިބުނު ވަރަށް ބޮޑު ކުރިއެރުމެއް ކަމުގައި ވަޒީރު ވަނީ ވިދާޅުވެފައެވެ.

އާދަމް ޝަރީފް ވިދާޅުވި ގޮތުގައި ރައީސް މުއިއްޒު ވަޑައިގަންނަވަނީ ގިނަ ގޮންޖެހުންތަކާއެކުވެސް އެމަނިކުފާނު ވެވަޑައިގަތް ވައުދުތައް ފުއްދައި ކައުންސިލްތައް މާލީ ގޮތުން ބާރުވެރިކުރުވަމުންނެވެ.

“މީގެކުރިން ކައުންސިލަކަށް ނުވަތަ އޮފީހަކަށް މިކަހަލަ ވަސީލަތެއް ހޯދައިދިނުމުގެ ނިޒާމުތަކެއް، އުސޫލުތަކެއް އެކަށައެޅިފައެއް ނެތް. އެހެންނަމަވެސް ވަރަށް ގިނަ ތަފާތު ގޮންޖެހުންތަކާއެކުވެސް އުސޫލުތަކެއް ޤާއިމުކުރައްވައި އެކަންކަން ކުރިޔަށް ގެންދެވޭނެ އުސޫލެއް ނިންމަވައިގެން ރައީސުލްޖުމްހޫރިއްޔާ ކުރެއްވި މަސައްކަތް މިއީ އަޅުގަނޑުމެން އެންމެންވެސް ޤާބޫލުކުރާނެ ލާމަރުކަޒީ ނިޒާމު ހަރުދަނާ ކުރުމަށްޓަކައި އެމަނިކުފާނު ކުރެއްވި ވަރަށް ބުރަ އަދި މިންނެތް މަސައްކަތްޕުޅުތަކެއް.” ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ 28 ފަޅުރަށެއް ކައުންސިލްތަކަށް ދޫކުރުމަށް ހުޅުވާފައިވާ ކަމަށާއި ފަޅުރަށްތައް ބޭނުންވާ ކައުންސިލްތަކުން އެކަމަށް އެދި ހުށަހަޅަމުންދާ ކަމަށެވެ. އެހެންކަމުން 5 ރަށެއް ހޯދުމަށް 3 ކައުންސިލަކުން ހުށަހަޅާފައިވާކަން ވަޒީރު ފާހަގަކުރެއްވިއެވެ. ސަރުކާރުން ކުރިޔަށް ގެންދާ މި މަސައްކަތަށް އެއްބާރުލުންދީ ފަޅު ރަށްތައް އެންމެ ފުރަތަމަ ހޯދި 3 ކައުންސިލަށް އާދަމް ޝަރީފު ވަނީ މަރުހަބާ ދަންނަވާފައެވެ.

ލާމަރުކަޒީ ނިޒާމު ހަރުދަނާ ކުރުމަށް ސަރުކާރުން ހަތަރު ސިޔާސަތެއް ކަނޑައަޅާފައިވާކަން ފާހަގަކުރައްވަމުން ވަޒިރު ވިދާޅުވީ އޭގެތެރެއިން އެންމެ މުހިންމު އެއް ސިޔާސަތަކީ ކައުންސިލްތައް މާލީ ގޮތުން ބާރުވެރިކުރުން ކަމަށެވެ. އަދި ރަށްވެހި ޚިދުމަތް ފޯރުކޮށްދިނުމުގައި ކައުންސިލްތަކުގެ ދައުރު ފުޅާކޮށް ކައުންސިލްތަކަކީ ރައްޔިތުންގެ ބައިވެރިވުމާއި މަޝްވަރާގެ މަތިން ހާމަކަން ބޮޑު ގޮތެއްގައި ހިންގާ މުވައްސަސާތަކަށް ހެދުމަކީ މި ސަރުކާރުގެ ސިޔާސަތެއް ކަމަށް އާދަމް ޝަރީފު ވަނީ ވިދާޅުވެފައެވެ. މި ރަސްމިއްޔާތުގައި ފިނޭންސް މިނިސްޓްރީގެ ސްޓޭޓް މިނިސްޓަރު އަހުމަދު މާޒިންގެ އިތުރުން މާވަށު ދާއިރާގެ މެންބަރު އަހުމަދު ޝާކިރުވެސް ވަނީ ބަިއވެރިވެވަޑައިގެންފައެވެ.