ތިން ރަށެއްގެ ކައުންސިލާއި ފަޅުރަށްތައް ހަވާލުކޮށްފި

Read Time:4 Minute, 46 Second

(ފޮޓޯ ކްރެޑިޓްސް: ވަގުތު)

ތިން ރަށެއްގެ ކައުންސިލް ތަކުން އެދިފައިވާ ފަޅުރަށްތައް އެ ކައުންސިލާއި ހަވާލުކޮށްފިއެވެ. މިއަދު ހެދުނު ބޭއްވި ހާއްސަ ރަސްމިއްޔާތެއްގައި ފަޅުރަށްތައް ހަވާލުކޮށްފަިއވަނީ ދ އަތޮޅު ކައުންސިލް، ރ. އިނގުރައިދޫ ކައުންސިލް އަދި ލ.މާވަށު ކައުންސިލާއެވެ. މި ރަސްމިއްޔާތުގައި ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފު ޢުމަރުގެ އިތުރުން ފިނޭންސް މިނިސްޓްރީގެ ސްޓޭޓް މިނިސްޓަރު އަހުމަދު މާޒިންއާއު މާވަށު ދާއިރާގެ މެންބަރު އަހުމަދު ޝާކިރުވެސް ބައިވެރިވެވަޑައިގެންނެވި އެވެ.

ކައުންސިލްތައް މާލީ ގޮތުން ބާރުވެރިކުރުވުމަށްޓަކައި ފަޅު ރަށްތައް ކައުންސިލްތަކާ ހަވާލުކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެކެވެ. އެހެންކަމުން ފަޅުރަށްތައް ހޯދުމަށް އެދިފައިވާ ތިން ކައުންސިލަކާ މިއަދު ވަނީ ރަށްތައް ހަވާލުކޮށްފައެވެ.

(ފޮޓޯ ކްރެޑިޓްސް: ވަގުތު)

މި އެއްބަސްވުންތަކުގެ ތެރެއިން ދ އަތޮޅު ކައުންސިލަށް ހަވާލުކުރާ ފަޅުރަށުގެ އެއްބަސްވުމުގައި ކައުންސިލްގެ ފަރާތުން ސޮއިކުރެއްވީ ރައީސް އަހުމަދު ޝާފިއު އެވެ. ރ. އިނގުރައިދޫ ކައުންސިލުގެ ފަރާތުން ސޮއިކުރެއްވީ އެކައުންސިލުގެ ރައީސް މުހައްމަދު ޖަލީލު، އަދި ލ. މާވަށު ކައުންސިލުގެ ފަރާތުން ސޮއިކުރެއްވީ ރައީސް އަހުމަދު މޫސާއެވެ. މިނިސްޓްރީ އޮފް ފިނޭންސް އެންޑް ޕްލޭނިންގެ ފަރާތުން ސޮއިކުރެއްވީ އަހުމަދު މާޒިންއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ވަޒިރު އާދަމް ޝަރީފު ވިދާޅުވީ ރައީސް މުއިއްޒު ރައްޔިތުންނަށް ވެވަޑައިގެންނެވި ވައުދުތައް ފުއްދަމުންދާ މަންޒަރު ފެނިވަޑައިގަންނަވަމުންދާ ކަމަށާއި ކައުންސިލްތައް މާލީ ގޮތުން ބާރުވެރިކުރުމަށް ރައީސް ނިންމީ ފަޅުރަށްތައް ކައުންސިލްތަކަށް ދޫކުރެވޭނެ ނިޒާމެއް ޤާއިމުކޮށް އުސޫލުތަކެއް ކަނޑައެޅުމަށް ކަމަށެވެ.

“މިއަދު އަޅުގަނޑުމެންނަށް ފެންނަމުން މިދަނީ ދިވެހިރާއްޖޭގެ ލާމަރުކަޒީ ނިޒާމު ހަރުދަނާކުރުމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ވައުދު ފުއްދަވާތަން. އެ މަންޒަރު، އެ ހެކި އަޅުގަނޑުމެންނަށް ފެނިގެން މިދިޔައީ.” ވަޒީރު ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

އެ އުސޫލުގެ ތެރެއިން ދ އަތޮޅު ކައުންސިލަށް ދެ ފަޅުރަށް، އިނގުރައިދޫ ކައުންސިލަށް ފަޅު ރަށަކާއި އަދި މާވަށު ކައުންސިލަށް ފަޅު ރަށެއް ދޫކުރީ ކަމަށް ވަޒީރު ވަނީ ވިދާޅުވެފައެވެ. މިއީ ލާމަރުކަޒީ ނިޒާމަށް ލިބުނު ވަރަށް ބޮޑު ކުރިއެރުމެއް ކަމުގައި ވަޒީރު ވަނީ ވިދާޅުވެފައެވެ.