އިންޑިއާއިން ރާއްޖެއަށް 12 ކިލޯގެ މަސްތުވާތަކެތި އެތެރެކުރަން އުޅުނު މައްސަލައެއް ބަލަނީ

Read Time:4 Minute, 21 Second

އިންޑިއާއިން 12 ކިލޯ މަސްތުވާތަކެތި ރާއްޖެ އެތެރެކުރަން އުޅުނު މައްސަލައެއް ފެންމަތިވެ، މިކަމުގެ ތަހުޤީގު ފުލުހުން ފަށައިފިއެވެ. އިންޑިއާގެ ޑިޕާޓްމަންޓް އޮފް ރެވެނިއު އިންޓެލިޖެންސް (ޑީއާރުއައި) ގެ އޮފިޝަލުން ވަނީ ޓުޓިކޮރިން ސިޓީގައި ހަޝިޝް އެތެރެކުރަން އުޅުނު ސެންޓްރަލް އިންޑަސްޓްރިއަލް ސެކިއުރިޓީ ފޯސް (ސީއައިއެސްއެފް) ގެ ޒުވާނަކާ އެކު ހަތަރު މީހަކު ހައްޔަރުކޮށްފައެވެ. އެ މީހުންގެ އަތުން 20 ކްރޯޑް ރުޕީސްގެ 12 ކިލޯގެ ހަޝިޝް އަތުލައިގަނެވުނެވެ.

ފުލުހުންގެ ސާވިސް ޑިވަލޮޕްމަންޓްގެ ވެރިއާ އެސިސްޓެންޓް ކޮމިޝަނާ އޮފް ޕޮލިސް މުހައްމަދު ޝިފާން ވިދާޅުވީ މި މައްސަލަ ފުލުހުންގެ ސަމާލުކަމަށް އައިސްފައިވާ ކަމަށާއި އިންޑިއާގެ ކަމާއި ބެހޭ އިދާރާތަކާއި ގުޅިގެން މައްސަލަ ބަލަމުންދާ ކަމަށެވެ. ޓުޓިކޮރިން އިން ކަނޑުމަގުން ހަޝިޝް ރާއްޖެ ގެނައުމަށް ދޯންޏެއްގައި މަސައްކަތް ކުރި ކަމުގެ ސިއްރު މައުލޫމާތެއް ޑީއާރުއައިއަށް ލިބުނު ކަމަށް އިންޑިއާގެ މީޑިއާތަކުން ވަނީ ރިޕޯޓްކޮށްފައެވެ. އޭގެ މައްޗަށް ބިނާކޮށް ކުރީގެ ބަނދަރު ސަރަހައްދުގައި އޮފިޝަލުން ވަނީ މޮނިޓަރިން އިތުރުކޮށްފައެވެ. ރިޕޯޓްތައް ބުނާގޮތުން ސައިކަލެއްގައި ދިޔަ ދެ މީހަކު ހުއްޓުވައި، ވެހިކަލް ޗެކްކުރިއިރު އެމީހުންނާއެކު ހަ ބަންޑަލް ފެނިފައިވެއެވެ. އޭގައި ހުރީ ހަޝިޝްކަން އިންސްޕެކްޝަނުން އެނގުމުން އެމީހުން ހައްޔަރުކުރެވުނެވެ. މި މައްސަލައިގައި ފުލުހުން ހައްޔަރުކޮށްފައިވަނީ ޓުޓިކޮރިންގެ ފާތިމާ ނަގަރުން ޖެސުރާޖާ، 34، އާއި ސުތަކަރް، 33، އެވެ.

އިތުރު ތަހުގީގަށް އެނގިފައިވާ ގޮތުގައި އެ މީހުން މަސްތުވާތަކެތި ގެންދިޔައީ ކުރީގެ ބަނދަރުން ރާއްޖޭގެ ވެރިރަށް މާލެ އަށް ދަތުރުކުރަން އުޅުނު ދޯންޏަކަށެވެ. އެ މީހުންގެ އިއުތިރާފުގެ މައްޗަށް ބިނާކޮށް ހައްޔަރުކޮށްފައިވަނީ ޓުޓިކޮރިންގެ ޖޯޖް ރޯޑުން ދަތުރުކުރި ދޯންޏެއްގެ ފަޅުވެރިއެއް ކަމަށްވާ 56 އަހަރުގެ ކިންގްސްލީއެވެ. މީގެ އިތުރުން ސޮރިސްޕޫރަމްއަށް ނިސްބަތްވާ ސީއައިއެސްއެފްގެ މަރިމުތޫ (30) ހަޝިޝް ބަންޑަލްތަކާއެކު ސެކިއުރިޓީ ގޭޓުން ވަނުމަށް އެހީތެރިވިކަން ވެސް ފުލުހުންނަށް އެނގުނެވެ. މަރިމުއްތޫ ވެސް އަތުލައިގަތެވެ. މި ހަތަރު މީހުންގެ ބަންދާމެދު ގޮތެއް ނިންމުމަށް ބުރާސްފަތި ދުވަހު ޓުޓިކޮރިން މެޖިސްޓްރޭޓް ކޯޓަށް ހާޒިރުކުރުމުން ވަނީ ބަންދުގައި ބެހެއްޓުމަށް އަމުރުކޮށްފައެވެ.