Read Time:3 Minute, 38 Second
(ފޮޓޯ ކްރެޑިޓްސް: ރައީސް އޮފީސް)
އިލެކްޝަންސް ކޮމިޝަނުގެ މެންބަރުކަމަށް ދެ ބޭފުޅަކު މިއަދު ހެނދުނު އައްޔަންކުރައްވާފައެވެ. އެ ކޮމިޝަނަށް ދެ މެމްބަރުން މި އައްޔަން ކުރަނީ ކޮމިޝަންގެ ނައިބު ރައީސްގެ މަގާމުގައި ހުންނެވި އަލީ ނަޝާތު އަދި މެންބަރުކަމުގައި ހުންނެވި މުހައްމަދު އާސިފް މަގާމުން ވަކިކުރަން މިދިޔަ ނޮވެމްބަރު މަހު 25ގައި މަޖިލީހުން ފާސްކުރުމުންނެވެ. އެ ދެބޭފުޅުންގެ މައްޗަށް ބޮޑެތި ތުހުމަތުތަކެއްކޮށް، މަޖިލީހުން ވަނީ އެ މެންބަރުން މަގާމުން ވަކިކޮށްފައެވެ. އީސީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އައްޔަން ކުރއްވި ދެ ބޭފުޅުންނަކީ މުޙައްމަދު ޒާހިދު (ދަފްތަރު ނަންބަރު ރސ 1548) އާއި ޢަބްދުއްރަޙްމާން ޞަލާޙް ރަޝީދު (ކ. ހުރާ / ރޯޒް) އެވެ.
އެކަމާ ގުޅިގެން ކޮމިޝަނަށް އަލަށް އައްޔަންކުރެއްވި މެމްބަރުންނަށް މެންބަރުކަމަށް އައްޔަންކުރެއްވިކަމުގެ ލިޔުން ހަވާލުކުރެއްވުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ޚާއްޞަ ރަސްމިއްޔާތުގައި މެންބަރުކަމުގެ ލިޔުން ހަވާލުކުރެއްވުމުގެ ކުރިން، ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޛު މަހާޒް ޢަލީ ޒާހިރުގެ ކުރިފުޅުމަތީގައި، އައު މެންބަރުން ވަނީ އިލެކްޝަންސް ކޮމިޝަނުގެ މެންބަރުކަމުގެ ހުވާ ކުރައްވައި، ހުވައިގެ އިޤްރާރުގައި ސޮއިކުރައްވާފައެވެ. އިލެކްޝަންސް ކޮމިޝަނަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ ދަށުން އުފައްދާފައިވާ މިނިވަން މުއައްސަސާއެކެވެ. މި ކޮމިޝަނުގެ މައިގަނޑު މަސްއޫލިއްޔަތަކީ ރާއްޖޭގައި ބާއްވާ އިންތިޚާބުތަކާއި ޢާންމު ވޯޓުތައް ހިންގައި ބެލެހެއްޓުމެވެ.
ކޮމިޝަނުގެ ރައީސް ފުއާދު ތައުފީގުގެ ދައުރު ހަމަވުމާއި، ދެ މެންބަރަކު މަގާމުން ވަކިކުރުމާ ގުޅިގެން ފަސް މެންބަރުންގެ މައްޗަށް އެކުލެވޭ އެ ކޮމިޝަންގައި މިއަދާ ހަމަޔަށް ތިބީ ތިން މެންބަރުންނެވެ. ގާނޫނުއަސާސީގައިވާ ގޮތުން، ކޮމިޝަންގެ ބައްދަލުވުންތައް ބޭއްވޭނީ ތިން މެންބަރުން ހާޒިރުވެގެންނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0