Read Time:5 Minute, 12 Second
އެސްޖޭ މިސްކިތްތަކާ ގުޅޭ ލިޔެކިޔުންތައް ހާމަކުރާނެ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. މި މައްސަލަ ކުރިމަތިވީ އެސްޖޭ ކޮންސްޓްރަކްޝަނުން ހުޅުމާލޭގައި އަޅަމުންދާ މިސްކިތުގެ ޤިބުލަ ޖެހުމާ ގުޅޭގޮތުން ކުރީގެ އިސްލާމިކް މިނިސްޓަރު ޑރ. އަޙްމަދު ޒާހިރު ޢަލީ ހާމަކުރެއްވި މަޢުލޫމާތަކާ ގުޅިގެންނެވެ. ޑރ. ޒާހިރު ވިދާޅުވެފައިވަނީ އެސްޖޭއިން 23 މާރިޗު 2022 ގައި ޤިބުލަ ފާހަގަކުރުމަށް އެދި ސިޓީ ފޮނުވި ކަމަށާއި، މިނިސްޓްރީން 11 އޭޕްރީލް 2022 ގައި ޤިބުލަ ޖަހައިދިން ކަމަށް އެސްޖޭއަށް އެންގި ކަމަށެވެ. އަދި މިކަމާ ގުޅޭ ލިޔެކިޔުންތައް މިނިސްޓްރީގައި ހުންނާނެ ކަމަށްވެސް ވިދާޅުވިއެވެ.
މި މަޢުލޫމާތާއި ގުޅިގެން އާންމު ފަރާތަކުން ލިޔެކިޔުންތައް ހާމަކުރުމަށް ގޮވާލުމުން، ވަޒީރު ޑރ. ޝަހީމް ކުރެއްވި ޓްވީޓެއްގައި ވިދާޅުވެފައިވަނީ ޤާނޫނީ ގޮތުން ބަލަންޖެހޭ ކަންކަން ބެލުމަށްފަހު، މިނިސްޓްރީގެ ކަމާބެހޭ ސެކްޝަންތަކާ މަޝްވަރާކުރުމަށްފަހު، އެގޮތަށް އެކަން ކުރެވެން އޮތްނަމަ، އެސްޖޭ މިސްކިތްތަކާ ގުޅޭ ލިޔެކިޔުންތައް ހާމަކުރާނެ ކަމަށެވެ.
“ޤާނޫނީ ގޮތުން ބަލަންޖެހޭ ކަންކަން ބެލުމަށްފަހު އާއި މިނިސްޓްރީގެ ކަމާއި ބެހޭ ސެކްޝަންތަކާ މަޝްވަރާ ކުރުމަށްފަހު އެގޮތަށް އެކަން ކުރެވެން އޮތް ނަމަ އެސްޖޭ މިސްކިތާއި ގުޅޭ ގޮތުން ހާމަކުރެވެން ހުރި އެންމެހާ ލިޔެކިޔުންތައް ހާމަކުރާނެ ވާހަކަ ދަންނަވަން.” ވަޒިރު ވިދާޅުވިއެވެ.
މާލޭ މަޖީދީ މަގަށްވާ ގޮތަށް ހުންނަ ޒިކުރާ މިސްކިތް ހުރި ބިމުގައި އައު މިސްކިތެއް އެޅުމަށް އެސްޖޭ އާ ހަވާލުކުރީ 24 ޖެނުއަރީ 2024 ގައެވެ. މި ކުންފުންނަކީ ކުރިންވެސް މި މަސައްކަތް ހަވާލުކުރި ކުންފުންޏެވެ. ޒިކުރާ މިސްކިތް ހުރި ބިމުގައި 10 ބުރީގެ ޢިމާރާތެއް އެޅުމުގެ މަޝްރޫޢު 2018 ވަނަ އަހަރު ފެށިގެން ދިޔައެވެ. މި މަޝްރޫޢު 130 މިލިއަން ރުފިޔާއަށް ކޮންޓްރެކްޓަރ ފައިނޭންސް އުޞޫލުން 9 ޖުލައި 2018 ގައި އެސްޖޭއާ ހަވާލުކުރެވުނެވެ. ރައީސް ޔާމީންގެ ސަރުކާރުން މި މަޝްރޫޢުގެ އެކުއިޓީގެ ގޮތުގައި އެސްޖޭއަށް 30 މިލިއަން ރުފިޔާ ދޫކުރިއެވެ.
ނަމަވެސް، ރައީސް އިބްރާހީމް މުޙައްމަދު ޞާލިޙް 2018 ވަނަ އަހަރު ވެރިކަމާ ހަވާލުވުމަށްފަހު، މި މަޝްރޫޢު ކުރިއަށް ނުގޮސްގެން އެއްބަސްވުން ބާޠިލުކުރެވުނެވެ. މިކަމާ ގުޅިގެން އެސްޖޭއިން ވަނީ ގެއްލުމުގެ ބަދަލު ހޯދުމަށް ދަޢުވާކޮށްފައެވެ. އަދި ސަރުކާރުން އެކުއިޓީގެ ގޮތުގައި ދޫކުރި ފައިސާ އަނބުރާ ހޯދުމަށް ދައުލަތުންވެސް ދަޢުވާ ކުރިއެވެ. މި މައްސަލަ ހައްލުކުރުމަށް ދެ ފަރާތުން ވަނީ ކޯޓުން ބޭރުގައި މަޝްވަރާކުރުމަށް އެއްބަސްވެފައެވެ. އެގޮތުން، ޒިކުރާ މިސްކިތުގެ ބަދަލުގައި އެސްޖޭގެ ޚަރަދުގައި ހުޅުމާލޭ ދެވަނަ ފިޔަވަހީގައި މިސްކިތެއް އެޅުމަށް މިދިޔަ ސަރުކާރުން ވަނީ އެސްޖޭއާއެކު އެއްބަސްވުމެއްގައި ސޮއިކޮށްފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0