Read Time:4 Minute, 49 Second
ދުބާއީގެ އެންމެ ވަރުގަދަ އެއް ރިއަލް އެސްޓޭޓް ކުންފުނި، ސަމަނާ ޑެވެލޮޕާސް އިން، ދުނިޔޭގެ މަޝްހޫރު ލަގްޒަރީ ބްރޭންޑް، އެލީ ސާބްއާ ގުޅިގެން ރާއްޖޭގައި އަގުބޮޑު ރިސޯޓެއް ތަރައްޤީކުރަން ނިންމާފައިވާކަން ހާމަކޮށްފިއެވެ. ބޭރުގެ ނޫސްތަކުން ބުނެފައިވާ ގޮތުގައި 598 މިލިޔަން އެމެރިކާ ޑޮލަރުގެ މި އަގުބޮޑު ރިސޯޓް ތަރައްގީކުރަން ނިންމާފައިވަނީ ހދ. ހަނިމާދޫ ކައިރީގައެވެ. އެގޮތުން، މި ރިސޯޓް އޮންނަނީ ހަނިމާދޫ އެއަރޕޯޓުން 20 މިނެޓުން އަދި ހުޅުލެއިން ފުރައިގެން ސީޕްލޭނެއްގައި 45 މިނެޓުން ދެވޭ ހިސާބުގައިކަމަށް އެ ނޫސްތަކުން ބުނެފައިވެއެވެ.
ދުބާއީގެ މަދީނަތު ސަރަހައްދުގައި ކުރިއަށް ދިޔަ ހަރަކާތެއްގެ ތެރެއިން މި ރިސޯޓް އިއުލާންކޮށްފައިވާއިރު، މިއީ 507،651 އަކަފޫޓުގެ ރިސޯޓެކެވެ. ބީޗްފްރަންޓް ވިލާތަކާއި، ވޯޓަރ ބަންގަލޯ އަދި ޕޫލްސައިޑް އެޕާޓްމަންޓްތައް ހިމެނޭހެން، މި ރިސޯޓުގައި 190 ޔުނިޓު ހިމެނޭކަމަށް ވެސް ނޫސްތަކުން ބުނެފައިވެއެވެ. އަދި މިއިން ކޮންމެ ޔުނިޓެއް ޑިޒައިން ކުރަނީ އެންމެ ޒަމާނީކޮށް، އެލީ ސާބް ކުންފުނިންނެވެ. މީގެ އިތުރުން ވެސް، މަސައްކަތުގައި ހަރަކާތްތެރިވާ ކުންފުނިތަކާ ހަވާލާދީ ޔޫއޭއީގެ ނޫސްތަކުން ބުނެފައިވަނީ މި ރިސޯޓުގައި ސްޕާއަކާއި ވެލްނަސް ސެންޓަރެއް، އަރަބި އަދި ޖަޕާނުގެ ރަހަތަކަށް ހާއްސަ ރެސްޓޯރަންޓްތަކެއް، ޑައިވިންގ ސެންޓަރަކާއި މޫދު ކުޅިވަރުގެ އިންތިޒާމުތައް އަދި ގިނަ އަދަދެއްގެ ޕޫލްތަކާއި ފިޓްނަސް ސެންޓަރެއް ވެސް ހިމެނިގެންދާނެ ކަމަށެވެ.
ހަމައެހެންމެ، ރިސޯޓް ތަރައްގީކުރުމާއި، ރިސޯޓް ތަރައްގީކޮށް ހުޅުވުމަށްފަހު ވެސް، ތިމާވެށީގެ ދެމެހެއްޓެނިވިކަމަށް އަމާޒުކޮށް މަސައްކަތްތަކެއް ކުރުމަށް ހަމަޖެހިފައިވާކަމަށް ބުނެފައިވެއެވެ. އެގޮތުން، ރިސޯޓުން އިސްނަގައިގެން، މުރަކަ އާލާކުރުމުގެ ހަރަކާތްތައް ކުރިއަށްގެންދާނެކަމަށް ބުނެފައިވެއެވެ. 2029 ވަނަ އަހަރު، މި ރިސޯޓް އޮޕަރޭޝަނަށް ނެރުމަށް މަސައްކަތްކުރަމުންދާއިރު، މިކަމުގެ ސަބަބުން ދެ ކުންފުނި ވެސް އެތައް ހަރުފަތެއް ކުރިއަށްޖެހިލާނެކަމަށާއި، ރާއްޖެފަދަ ލަގްޒަރީ އަދި މަތީފަންތީގެ ފަތުރުވެރިކަމެއް އޮންނަ ޤައުމެއްގައި މަސައްކަތް ފެށުމުން އިތުރު ކުރިއެރުންތައް ލިބިގެންދާނެކަމަށް، ދެ ކުންފުނީގެ ވެރިން ވެސް ވިދާޅުފައިވެއެވެ.
މި ރިސޯޓް ސަރަހައްދުގައި އޮންނަ ހަނިމާދޫ އިންޓަނޭޝަނަލް އެއަރޕޯޓް ބޮޑުކޮށް، ހިދުމަތްތައް ތަރައްގީކުރުމަށް ހާއްސަ މަޝްރޫއެއް މިހާރު ވެސް ހިންގަމުން އަންނައިރު، އެސަރަހައްދަކީ ރާއްޖޭގައި ފަތުރުވެރިކަން އެންމެ ކުޑަކޮށް ތަރައްގީވެފައިވާ އެއް ސަރަހައްދުކަން ވެސް ފާހަގަކޮށްލެވެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0