މާކުރަތު ބަނދަރު ނިންމައި ސިއްހީ މަރުކަޒަށް ބޭނުންވާ ވަސީލަތްތައް ފުރިހަމަކޮށްދޭނަން: ރައީސް

Read Time:4 Minute, 47 Second

(ފޮޓޯ ކްރެޑިޓްސް: ވަގުތު)

ރ. މާކުރަތަށް ބޭނުންވެފައިވާ ކަންކަން ފުއްދައިދިނުމުގެ ގޮތުން މިއަހަރުގެ ތެރޭގައި އެރަށުގެ ރަށް ގިރުމުގެ މައްސަލަ ހައްލުކުރުމަށް ޓަކައި ބަނދަރު ހެދުމާއި ސިއްހީ މަރުކަޒަށް ބޭނުންވާ ވަސީލަތްތައް ފުރިހަމަ ކުރުމުގެ އިތުރުން، ތަރައްގީގެ އެކި މަޝްރޫއުތައް ހިންގުމަށް ހަމަޖެހިފައިވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. އެ އަތޮޅުގެ ރަށްތަކަށް ރައީސް ކުރައްވަމުން ގެންދަވާ ދަތުރުފުޅުގައި މާކުރަތަށް ވަޑައިގެން އެރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ އެރަށުގެ ބަނދަރުގެ މަސައްކަތަކީ އެމަނިކުފާނު ހައުސިން މިނިސްޓަރެއްގެ ގޮތުގައި ހުންނެވި އިރު ކުރީގެ ސަރުކާރުން ފަށާފައިވާ ކަމެއް ކަމަށެވެ. އެ މަޝްރޫއުގެ ތެރެއިން ރަށް ގިރުމުގެ މައްސަލަ ވެސް ހައްލުކޮށްދެއްވާނެ ކަމުގައި ވިދާޅުވިއެވެ.

އޭރުގެ ސަރުކާރުން ފަށާފައިވާ، އެރަށުގައި ޕަބްލިކް ވޯކްސްގެ ސައިޓެއް ގާއިމްކުރުމުގެ މަސައްކަތް ވެސް މިއަހަރުގެ ތެރޭ ކޮށްދެއްވާނެ ކަމުގައި ރައީސް ވިދާޅުވިއެވެ. އެ ބައްދަލުވުމުގައި ރައީސް ވަނީ ސަރުކާރުން ހިންގާ ބޮޑެތި މަޝްރޫއުތަކާއި ރަށްރަށުގައި ބިނާކުރެވިފައިވާ އިންފްރާސްޓްރަކްޗަރތަކުގެ މެއިންޓެނެންސް ބެލެހެއްޓުމުގައި ޕަބްލިކް ވޯކްސްގެ ދައުރު މުހިއްމުކަން ފާހަގަކުރައްވައި މިއަހަރުގެ ތެރޭ ރާއްޖޭގެ ކޮންމެ އަތޮޅެއްގައި ޕަބްލިކް ވޯކްސްގެ މަރުކަޒެއް ގާއިމްކުރައްވާނެކަން ހާމަކުރައްވާފައެވެ.

މީގެ އިތުރުން މިއަހަރުގެ ބަޖެޓުގައި ހިމަނައިގެން އެރަށުގެ ސިއްހީ މަރުކަޒުގައި އިންސާނީ ވަސީލަތްތަކާއި، އިތުރު ވަސީލަތްތައް ތަރައްގީ ކުރައްވަން ގަސްދުކުރައްވާ ކަމުގައި ވެސް އެމަނިކުފާނު ވިދާޅުވިއެވެ. ސިއްހީ މަރުކަޒުގެ އިތުރުން ތައުލީމީ ދާއިރާއިން އެރަށުގެ ސްކޫލަށް ބޭނުންވާ ވަސީލަތްތައް އިތުރުކޮށްދިނުމަށް ވެސް ނިންމާފައިވާ ކަމަށް ރައީސް ވިދާޅުވިއެވެ. ޒުވާނުންނަށް ކުޅިވަރުގެ ދާއިރާއިން އެމަނިކުފާނު ވައުދުވެވަޑައިގެންފައިވާ ގޮތުގެ މަތިން މިއަހަރުގެ ތެރޭ އެރަށުގައި ފުޓްސަލް ދަނޑެއް އަޅުއްވާނެ ކަމަށާއި، އެރަށުގެ ފުޓްބޯޅަ ދަނޑު މަރާމާތު ކުރުމާއި ޒުވާނުންގެ މަރުކަޒެއް ގާއިމްކުރުން ވެސް މިއަހަރުގެ ތެރޭ ކުރިއަށް ގެންދަވާނެ ކަމުގައި ރައީސް ވިދާޅުވިއެވެ.

އިތުރަށް ވާހަކަފުޅު ދައްކަވަމުން ރަށުގެ ބޯހިޔާވަހިކަމުގެ ދަތިކަމަށް ހައްލު ހޯދައިދެއްވުމުގެ ގޮތުން އަންނަ އަހަރު އެރަށުގައި ބޯހިޔާވަހިކަމުގެ މަޝްރޫއު ހިންގަވައިދެއްވާނެ ކަމަށް ވެސް އެމަނިކުފާނު ވިދާޅުވިއެވެ.