މޯބައިލް ދެ ޔުނިޓާއެކު ކޮންމެ އަތޮޅެއްގައި ޕަބްލިކް ވޯކްސްގެ މަރުކަޒު ގާއިމްކޮށްދޭނަން: ރައީސް

Read Time:6 Minute, 9 Second

(ފޮޓޯ ކްރެޑިޓްސް: ވަގުތު)

އެއްތަނުން އަނެއް ތަނަށް ބަދަލުކުރެވޭ މޯބައިލް ދެ ޔުނިޓާއެކު ރާއްޖޭގެ ހުރިހާ ރަށެއްގައި ޕަބްލިކް ވޯކްސްގެ މަރުކަޒު ބަހައްޓަން ނިންމާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. ރ. އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު އެއަތޮޅު މާކުރަތަށް ވަޑައިގެން ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ އެކި ކަންކޮޅުތަކުގައި ކުރިއަށްދާ މަޝްރޫއުތައް ބެލެހެއްޓުމާއި، ރަށްރަށުގެ ތަންތަން މަރާމާތު ކުރުމާއި އިންފްރާސްޓްރަކްޗަރ ބެލެހެއްޓުމުގައި ޕަބްލިކް ވޯކްސްގެ މަސައްކަތް ވަރަށް މުހިންމު ކަމަށެވެ. އެހެންވެ ރާއްޖޭގެ ކޮންމެ އަތޮޅެއްގައި ޕަބްލިކް ވޯކްސްގެ މަރުކަޒެއް ގާއިމް ކުރުމަކީ ސަރުކާރުގެ ސިޔާސަތެއް ކަމަށާއި މިއަހަރުގެ ތެރޭގައި އެކަން ކުރައްވާނެ ކަމަށް ވިދާޅުވިއެވެ.

ރާއްޖޭގެ ބައެއް އަތޮޅުގައި މިހާރު ވެސް ޕަބްލިކް ވޯކްސްގެ މަރުކަޒުތައް ހުންނަކަން ފާހަގަކުރައްވައި ވާހަކަފުޅު ދައްކަވަމުން ރައީސް ވިދާޅުވީ، އެފަދަ ތަންތަނަށް ގިނަ ދުވަސްވެފައި ހުރުމުގެ ސަބަބުން މަރާމާތު ކުރަން ޖެހިފައިވާ ކަމަށެވެ. އަދި އެފަދަ ތަންތަން ނެތް އަތޮޅުތައް ވެސް އެބަހުރި ކަމަށް ރައީސް ވިދާޅުވިއެވެ.

“މިކަން ކުރުމުގައި (ކޮންމެ އަތޮޅެއްގައި ޕަބްލިކް ވޯކްސްގެ މަރުކަޒެއް ގާއިމްކުރުން) ވަރަށް މުހިއްމު މަގުސަދެއް އެބަ އޮތް. އެއީ ވަރަށް ގިނަ ޚަރަދުކުރެވިގެން އިންފްރާސްޓްރަކްޗަރ މަޝްރޫއުތައް މި ހިންގަނީ، އެތަންތަން ވަރަށް ރަނގަޅަށް ބެލެހެއްޓުމަކީ މުހިއްމު ކަމެއް. މެއިންޓެނެންސް މަސައްކަތް ވަރަށް މުހިންމު ވެގެންދޭ. އެހެންވެ އެކަން ކުރުމުގައި ވަރަށް ބޮޑު ދައުރެއް އަދާ ކުރާ ބައެއް ޕަބްލިކް ވޯކްސްގެ މަސައްކަތްކުރާ ފަރާތްތައް އެއީ،” ރައީސް ވިދާޅުވިއެވެ.

މީގެ އިތުރު ންވެސް، ރަށްރަށުގައި ކުރަން ހުންނަ ކުދިކުދި މަސައްކަތްތައް ކުރަން ބޭނުންވާ އާލަތްތަކާއި މީހުން ފޯރުކޮށްދެނީ ޕަބްލިކް ވޯކްސް އިން ކަން އެމަނިކުފާނު ފާހަގަކުރެއްވިއެވެ. ކޮންމެ އަތޮޅެއްގައި ޕަބްލިކް ވޯކްސްގެ މަރުކަޒެެއް ގާއިމްކުރުމުގެ އިތުރުން ރާއްޖޭގެ އުތުރާއި ދެކުނުގައި، އެއްތަނުން އަނެއްތަނަށް ބަދަލުކޮށް ގެންގުޅޭ މޯބައިލް ދެ ޔުނިޓެއް ގާއިމްކުރުމަށް މިއަހަރުގެ ބަޖެޓުގައި ހިމަނާފައިވާނެ ކަމަށް ވެސް ރައީސް ވިދާޅުވިއެވެ.

ކޮންމެ އަތޮޅެއްގައި މިއަހަރު ޕަބްލިކް ވޯކްސްގެ ސައިޓު ހެދިގެންދާނެ ހުރިހާ މެޝިނަރީސް ތަކެތި ހަމަކުރެވިފައި ހުންނަ. ހަމައެއާއެކީގައި މޯބައިލް ދެ ޔުނިޓު އެއްތަނުން އަނެއްތަނަށް ހުރިހާ ތަކެއްޗާއެކީގައި ބަދަލުކޮށް ގެންގުޅެވޭނެ ޔުނިޓު ހަމަޖެއްސުމަށް އޮތީ ކަނޑައަޅާފައި،” ރައީސް ވިދާޅުވިއެވެ.

އެމަނިކުފާނު ވިދާޅުވީ، އެކަމަކީ ބޮޑު އިންވެސްޓެމަންޓެއް ކަމަށާއި، އެކަން ކުރަނީ ކުރިއަށް އޮތް ތަނުގައި މަރާމާތުކުރަން ޖެހޭ ތަންތަން މަރާމާތުކުރުމަށް ކުރަން ޖެހޭ ޚަރަދު ކުޑަކުރުމުގެ ގޮތުން ކަމުގައެވެ. އަދި ޕަބްލިކް ވޯކްސްގެ ސައިޓުތައް ހެދުމަށް ކުރާ ޚަރަދަކީ “ބޭކަރުވާ ޚަރަދެއް ނޫން” ކަމުގައި ވެސް ރައީސް ވިދާޅުވިއެވެ. ރައީސް ވިދާޅުވީ ޕަބްލިކް ވޯކްސްގެ ނިޒާމު ގާއިމްކުރެވުމުން “ލޯންގް ޓާމް”ގައި ރަށްތަކުގައި ކުރަން ޖެހޭ މެއިންޓެނަންސް މަސައްކަތްތަކަށް ކުރަންޖެހޭ ޚަރަދު ވަރަށް ބޮޑުތަނުން ކުޑަވެގެންދާނެ ކަމަށެވެ.