މާކުރަތުގައި ބީއެމްއެލްގެ އޭޓީއެމްއެއް ގާއިމްކުރަން ކައުންސިލާ ހަވާލުކޮށްފި

ރ. މާކުރަތުގައި ބީއެމްއެލްގެ އޭޓީއެމްއެއް ބަހައްޓާނެ އިމާރާތެއް ގާއިމްކުރަން އެރަށު ކައުންސިލާ ހަވާލުކޮށްފިއެވެ. ރާއްޖޭގެ ހުރިހާ ހިސާބަކަށް ބީއެމްއެލްގެ އޭޓީއެމް ހިދުމަތް ފޯރުކޮށްދިނުމުގެ މަޝްރޫއު މިދިޔަ ނޮވެމްބަރު މަހުގެ ހަތް ވަނަ ދުވަހު ސަރުކާރުން ވަނީ އިފްތިތާހުކޮށްފައެވެ. މި މަޝްރޫއުގެ ދަށުން އޭޓީއެމް ހޯދަން ބީއެމްއެލް އިން އިއުލާން ވެސް ކޮށްފައިވެއެވެ. މާކުތަތުގައި އޭޓީއެމް ބެހެއްޓުމުގެ އެއްބަސްވުމުގައި ސޮއިކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ރ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި މިއަދު އެރަށަށް ވަޑައިގެން ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައެވެ.

އޭޓީއެމް ބެހެއްޓުމުގެ އެއްބަސްވުމުގައި ބީއެމްއެލްގެ ފަރާތުން ސޮއި ކުރެއްވީ ބޭންކްގެ ޑިރެކްޓަރު އޮފް ރީޓެއިލް އެންޑް އެސްއެމްއީ ބޭންކިންގ ބަދުރުއްދީން ހަސަނެވެ. މާކުރަތު ކައުންސިލްގެ ފަރާތުން ސޮއި ކުރެއްވީ ކައުންސިލްގެ ރައީސް، މުޙައްމަދު ރަމީޒެވެ. މި އަހަރު ނިމެންވާއިރަށް ރާއްޖޭގެ ހުރިހާ ރަށެއްގައި ބީއެމްއެލްގެ އޭޓީއެމްއެއް ބެހެއްޓުމަކީ ސަރުކާރުގެ އަމާޒެކެވެ. މިވަގުތު ރާއްޖޭގައި ބީއެމްއެލްގެ 190 އޭޓީއެމް ގާއިމުކުރެވިފައިވާއިރު، އަންނަ އަހަރު ނިމުމުގެ ކުރިން، ރާއްޖޭގައި 250 އަށްވުރެ ގިނަ އޭޓީއެމް ގާއިމުކުރުމަކީ ބީއެމްއެލްގެ އަމާޒެކެވެ.

މާކުރަތުގައި ބީއެމްއެލްގެ އޭޓީއެމެއް ބަހައްޓަން ކައުންސިލާ ހަވާލުކުރި އިރު، ރ. ފައިނު ރ. އަނގޮޅިތީމު، ވާދޫ އާއި ރ. ރަސްގެތީމު، ރ. ހުޅުދުއްފާރު، ރ. ރަސްމާދޫ އަދި ރ. ކިނޮޅަސްގައި ބީއެމްއެލްގެ އޭޓީއެމްއެއް ބަހައްޓަން އެ ރަށްރަށުގެ ކައުންސިލްތަކާ ވަނީ ހަވާލުކޮށްފައެވެ.