Read Time:4 Minute, 0 Second
(ފޮޓޯ ކްރެޑިޓްސް: ވަގުތު)
ރ އަތޮޅު ފައިނުގައި ފެނާއި ނަރުދަމާ ނިޒާމުގެ ހިދުމަތް ރަސްމީކޮށް ފަށައިފިއެވެ. ރައީސް ޑރ. މުހައްމަދު މުއިއްޒު ރ. އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ފައިނަށް ވަޑައިގެން އެމަނިކުފާނު ވަނީ ރަސްމީކޮށް ފެނާއި ނަރުދަމާ ނިޒާމު ޚިދުމަތް ރަސްމީކޮށް ފައްޓަވައިދެއްވާފައެވެ. ރ. ފައިނުގައި ގާއިމުކޮށްފައިވާ ފެނާއި ނަރުދަމާގެ ނިޒާމަކީ ދިވެހި ދައުލަތުގެ ބަޖެޓުން ހަރަދުކޮށްގެން މިނިސްޓްރީ އޮފް ކޮންސްޓްރަކޮޝަން، ހައުސިން އެންޑް އިންފްރާސްޓްރަކްޗާއިން މާލެ ވޯޓާ އެންޑް ސްވަރޭޖް ކޮމްޕެނީ ޕްރައިވެޓް ލިމިޓްޑާއި ހަވާލުކޮންގެން ނިންމާފައިވާ މަޝްރޫއެކެވެ. މި މަޝްރޫއުގެ އަގަކީ 64،240،752.74 ދިވެހި ރުފިޔާއެވެެ.
މި މަޝްރޫއުގެ މައިގަނޑު ސްކޯޕްގައި ނަރުދަމާގެ ތިން ޕަމްޕް ސްޓޭޝަން ގާއިމު ކުރުމާއި، ސީ އައު ފޯލް އެޅުމާއި، މުޅި ރަށުގެ ފެނާއި ނަރުދަމާގެ ނިޒާމުގެ ވިއުގަ އެޅުމާއި، ދުވާލަކު 20 ޓަނުގެ ފެން އުފެއްދޭ ވަރުގެ ދެ އާރު.އޯ ޕްލާންޓް ބެހެއްޓުމާއި، ފެން ރައްކާކުރުމަށް ދެ ޓޭންކް އަދި ވާރޭ ފެން ރައްކާ ކުރުމަށް ޓޭންކެއް ބެހެއްޓުމުގެ އިތުރުން ގޭގެއަށް ފެނާއި ނަރުދަމާގެ ކަނެކްޝަން ގުޅައިދިނުން ހިމެނެއެވެ. އެމްޑަބްލިއުއެސްސީ އިން 20 ރަށެއްގައި ކުރިއަށްގެންދިޔަ ފެނާއި ނަރުދަމާ ނިޒާމް ޤާއިމްކުރުމުގެ މަސައްކަތް މިދިޔަ ޑިސެމްބަރު މަހު ވަނީ ނިންމާލާފައެވެ. މި 20 ރަށުގެ ފެނާއި ނަރުދަމާގެ ނިޒާމު ގާއިމްކުރުމުގެ މަޝްރޫއުތަކަކީ، މިދިޔަ ސަރުކާރުގައި މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާއިން ހަވާލުކޮށްގެން ސަރުކާރުގެ ޚަރަދުގައި ކުރިޔަށް ގެންދިޔަ މަޝްރޫއުތަކެކެވެ. މި މަޝްރޫއުތަކުގެ ޖުމްލަ އަގަކީ 1.34 ބިލިއަން ރުފިޔާއެވެ.
ޕީއެސްއައިޕީގެ ދަށުން ކުރިއަށްގެންދިޔަ ހުރިހާ ރަށެއްގެ މަސައްކަތް ނިންމާލުމުގެ އަމާޒަށް ވާސިލުވެވުނީ ވަރަށް ގިނަ ބައެއްގެ ބުރަ މަސައްކަތުންކަން އެމްޑަބްލިޔުއެސީން ފާހަގަކުރެއެވެ. އަދި އެ މަޝްރޫއުތަކުގެ ސަބަބުން އެ ރަށްރަށުގެ ރައްޔިތުންނަށް ސާފު ބޯފެނާއި ރައްކާތެރި ނަރުދަމާ ނިޒާމެއް ލިބިގެންދާނެކަން ވެސް އެ ކުންފުނިން ފާހަގަކުރެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0