ރައީސް ދެއްވީ ކިނޮޅަސް ސްކޫލް، ސިއްހީ މަރުކަޒު ތަރައްގީކޮށް ދެއްވާނެކަމުގެ ޔަގީންކަން

Read Time:6 Minute, 27 Second

(ފޮޓޯ ކްރެޑިޓްސް: ވަގުތު)

ރ. ކިނޮޅަސް ސްކޫލާއި ސިއްހީ މަރުކަޒާއި ކުޅިވަރުގެ ވަސީލަތްތައް ތަރައްގީކޮށްދެއްވާނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު މިއަދު ދެއްވައިފިއެވެ. ރައީސް ޑރ. މުއިއްޒު، ރ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ކިނޮޅަސް އަށް ވަޑައިގެން އެ ރަށު ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ވިދާޅުވީ ސިއްހީ މަރުކަޒާއި ސްކޫލް ތަރައްގީ ކުރުމުގެ އިތުރުން ސިކުނޑި ތަރައްގީކޮށް ދުޅަހެޔޮ ކަމަށް ކުޅިވަރު ވަރަށް މުހިންމު ކަމަށެވެ. އަދި ކޮންމެ އުމުރަކަށް ވެސް އަދި ކޮންމެ ޖިންސަކަށް ވެސް ކުޅިވަރަކީ މުހިންމު އެއްޗެއް ކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ އެ ރަށެއްގެ އާބަދީއަށް އެކަށީގެންވާ އަދަދަށް ކުޅިވަރު ގާއިމްކޮށްދިނުމަށް ސަރުކާރުން ކަނޑައަޅާފައިވާނެ ކަމަށެވެ. އެގޮތުން ކިނޮޅަސްގައި ވެސް ކުޅިވަރުތަކަށް ބޭނުންވާ ވަސީލަތްތައް ގާއިމްކޮށްދެއްވާނެ ކަމަށް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

ޖީލެއް ބިނާކުރުމުގައި ތައުލީމީ ރަނގަޅު ދަރިންތަކެއް ބިނާކުރުމުގައި ތައުލީމީ އިންފްރާސްޓަރަކްޗާއަކީ މުހިންމުކަމެއް ކަމަށް ވެސް ރައީސް ވިދާޅުވިއެވެ. ތައުލީމީ ގޮތުން ސްކޫލްތަކުގައި ހުންނަންޖެހޭ ވަސީލަތްތައް ފުރިހަމަވުމަކީ މުހިންމު ކަމެއް ކަމަށާއި އެއާއެކުގައި ކިޔަވައިދިނުމުގެ ފެންވަރު ރަނގަޅުވުން ވެސް އަންނާނެ ކަމަށް ވިދާޅުވިއެވެ. ކިނޮޅަސް ސްކޫލަށް ބޭނުންވާ ގިނަ ކަންތައްތަކެއް އެބަހުރި ކަމަށް ވިދާޅުވިއެވެ. “ސްކޫލާއެކު މިނިސްޓްރީން މަޝްވަރާތައް ކުރުމަށް ފަހު ފްލޭން ހަދާނެ ސްކޫލަށް ބޭނުންވާ ކަންކަމުގެ. ސްކޫލްގެ ފެސިލީޓައް ހަމަކޮށްދިނުމުގައި ސަރުކާރުން އިސްކަމެއް ދޭނަން. އަމާޒަކީ ދެ އަހަރުގެ ތެރޭގައި އެކަންކަން ކޮށްދިނުން.” ރައީސް ވިދާޅުވިއެވެ.

ރައީސް ކިނޮޅަސް އަށް ވެވަޑައިގެންނެވި އިތުރު ވައުދުތައް:

ފުޓްސަލް ދަނޑު އަޅައިދިނުން
ވޮލީ ކޯޓެއް އަޅައިދިނުން
ހޭންޑް ބޯލް ކޯޓެއް އަޅައިދިނުން
ފުލުހުންގެ ހިދުމަތް ގާއިމްކުރުން
ލައިބްރަރީއެއް ގާއިމްކުރުން
ނެރުފައިކަށި ރޫޅިފައިވާ މައްސަލަ ހައްލުކުރުން

(ފޮޓޯ ކްރެޑިޓްސް: ވަގުތު)

ރައީސް ވިދާޅުވީ ކޮންމެ ދިވެހި ރައްޔިތަކީ ވެސް މުހިންމު ރައްޔިތެއް، ހަމަހަމަ ރައްޔިތެއް ކަމަށެވެ. އެހެންކަމުން ސިއްހީ ހިދުމަތް އެއް ފެންވަރެއްގައި ލިބޭނެ މަގު ފަހިވެފައި އޮންނަން ޖެހޭނެ ކަމަށް ވިދާޅުވިއެވެ. ކިނޮޅަސްގެ ސިއްހީ މަރުކަޒުގައި ރަނގަޅުކުރަން ޖެހޭ ކަންކަން އެބަހުރި ކަމަށް ވިދާޅުވިއެވެ. ރައީސް ވިދާޅުވީ އެކަންކަމަށް ހައްލު ގެނައުމަށް ބަޖެޓުން ކުރެވެން ހުރި ކަންކަން ކުރައްވާނެ ކަމަށެވެ. އިމާރާތް ބޮޑު ކުރުމާއި އެމްބިއުލާންސްގެ ހިދުމަތް ރަނގަޅުކުރުންފަދަ ކަންކަން ކުރައްވާނެ ކަމަށް ވިދާޅުވިއެވެ.

ބޭންކާއި ފުލުހުންގެ ހިދުމަތާއި ފެނާއި ނަރުދަމާއަކީ ރަށެއްގައި ހުންނަންޖެހޭނެ ހިދުމަތްތަކެއް ކަމަށް ވިދާޅުވިއެވެ. ކިނޮޅަސްގައި ފެނާއި ނަރުދަމާ ވަނީ އެޅިފައި ނަމަވެސް ދާންވާ ހިސާބަށް އެ ހިދުމަތް ނުދާކަމަށް ވިދާޅުވިއެވެ. ކިނޮޅަސްގައި ލޯކަލް ޓޫރިޒަމް ތަރައްގީ ކުރުމަށް ސަރުކާރުން އެއްބާރުލުންދެއްވާނެ ކަމަށާއި އެ ރަށުގައި ލޯކަލް ޓޫރިޒަމްގެ ކަންތައް ފެށޭގޮތް ވުމަށް ބޭނުންވާ ކަމަށް ރައީސް ވިދާޅުވިއެވެ. އެކަމަށް ދޭ އެހީއެއްގެ ގޮތުގައި އެ ސަރަހަށްދަށް ފެނާއި ނަރުދަމާގެ ހިދުމަތް ފޮރުކޮށްދެއްވާނެ ކަމަށް ވިދާޅުވިއެވެ. ރައީސް ވިދާޅުވީ އޭރުން ޓޫރިޒަމްގެ ދާއިރާއަށް ކިނޮޅަސް ވަދެވިގެންދާނެ ކަމަށެވެ.