ޒަކިއްޔާގެ މަރުގެ ތަހުގީގަށް އެފްބީއައިގެ އެހީތެރިކަން ހޯދަނީ

Read Time:4 Minute, 23 Second

(ފޮޓޯ ކްރެޑިޓްސް: ވަގުތު)

ނ. ހޮޅުދޫގައި މިދިޔަ އަހަރު ސެޕްޓެންބަރު މަހު ޒަޚަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާގެ މައްސަލައިގައި ކަން ހިނގާދިޔަ ގޮތާމެދު ޝައްކުތައް އުފެދިފައިވާތީ، މި މައްސަލަ ތަޙުޤީޤުކުރުމަށް އެމެރިކާގެ ތަޙުޤީޤީ އިދާރާ އެފްބީއައިގެ އެހީތެރިކަން ހޯދަން ފަށައިފިއެވެ. ފުލުހުންގެ ތަރުޖަމާނު، އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޝިފާން ވަނީ “ވަގުތު” އަށް ވިދާޅުވީ މި މައްސަލައިގައި އެފްބީއައިގެ އެހީތެރިކަން ހޯދަމުންދާ ކަމަށެވެ.

“ޒަކިއްޔާ މަރުގެ މައްސަލައިގައި އެފްބީއައިގެ އެހީތެރިކަން ހޯދަމުންދަނީ.” ޝިފާން ވިދާޅުވިއެވެ. މިކަމާއި ގުޅޭ އިތުރު ތަފްސީލެއް ފުލުހުން ހާމައެއް ނުކުރެއެވެ. އެފްބީއައިގެ އެހީތެރިކަން ހޯދަނީ ރަށު މީހުންގެ ޝަކުވާ ބޮޑުވެފައިވާތީ، ފުލުހުންގެ ތަޙުޤީޤު ހިނގާދިޔަ ގޮތުގެ މުރާޖަޢާއެއް ހެދުމަށާއި، މިނިވަން ތަޙުޤީޤީ އިދާރާއެއް މެދުވެރިކޮށް އުފެދިފައިވާ ޝައްކުތައް ފިލުވުމަށް ކަމަށް ލަފާކުރެވެއެވެ.

އުމުރުން 50 އަހަރުގެ ޒަކިއްޔާގެ ބޮޑެތި ޒަހަމްތަކަކާއެކު ނިޔާވެފައި އޮއްވާ ފެނުނީ އޭނާ ދިރިއުޅުނު ގޭގެ ބަދިގެ ފަރާތުގައި ހުންނަ ގުދަނެއްގެ ކައިރިން ސެޕްޓެމްބަރު 10 ވަނަ ދުވަހުގެ ހެނދުނު 10:00 ހާއިރުއެވެ. އޭނާ އަކީ ޑިޕްރެޝަނަށް ފަރުވާ ހޯދާ މީހަކަށް ވާތީ އެންމެ ފުރަތަމަ އޭނާ މަރުވީ އަމިއްލައަށް ކަމަށް އަޑު ފެތުރުނު ނަމަވެސް، ފުލުހުން ޖިނާއީ ތަހުގީގެއް ދަނީ ކުރިއަށެވެ. އޭނާގެ ކަރުގައި ޒަޚަމްތަކެއް ހުރުމާއި، ކައިރީގައި ވަޅިއެއް އޮތުމުން މި މަރާމެދު ޝައްކުތަކެއް އުފެދުނެވެ. ރަށުގެ ގިނަ ބަޔަކު ޒަކިއްޔާ މަރާލީ ކަމަށް ތުހުމަތުކުރާއިރު، އެފަދަ ހެއްކެއް އަދި ނުލިބޭ ކަމަށް ފުލުހުން ބުނެފައިވެއެވެ.

ފުލުހުން ކުރިން ދީފައިވާ މަޢުލޫމާތުގައި، ޒަކިއްޔާގެ ހަށިގަނޑުން މީހަކު ދޭ ޒާތުގެ އަނިޔާއެއް ނުފެންނަ ކަމަށް ޕެތޮލޮޖިސްޓް ޑޮކްޓަރަކު ލަފާދީފައިވާ ކަމަށް ބުނެފައިވެއެވެ. ނަމަވެސް ޒަކިއްޔާ މަރުވީ އަމިއްލައަށްކަން ނުވަތަ މީހަކު މަރާލީކަން ފުލުހުން އަދި މުޅީން ނުނިންމައެވެ. މި މައްސަލައިގައި ރަށުތެރޭގައި ހަމަނުޖެހުންތަކެއް ހިނގައި، ޒަކިއްޔާގެ ދޮށީ ދަރިފުޅު މޫސާ ރިމްޒީ ހައްޔަރުކޮށް ފަހުން ދޫކޮށްލާފައިވެއެވެ. އަދި ޒަކިއްޔާގެ ޢާއިލާގެ މެދުގައި ވެސް އެކި ތުހުމަތުތައް ކުރެވި، ގިނަ ވާހަކަތަކެއް ރަށުތެރޭގައި ފެތުރެމުންދާ ކަމަށް ބުނެވެއެވެ.