އިންނަމާދޫގައި 50 ހައުސިން ޔުނިޓާއި ވަޑިން ތަމްރީނުކުރާ މަރުކަޒެއް ގާއިމްކޮށްދޭނަން: ރައީސް

Read Time:8 Minute, 28 Second

(ފޮޓޯ ކްރެޑިޓްސް: ވަގުތު)

ރ. އިންނަމާދޫގައި 50 ހައުސިން ޔުނިޓާއި، ބޯޓު ބިލްޑިން ދާއިރާއިން ޒުވާނުން ތަމްރީން ކުރުމަށް ޓަކައި ވަޑިން ތަމްރީންކުރާ މަރުކަޒެއް ގާއިމްކޮށްދެއްވާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ރ. އަތޮޅުގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގައި މިރޭ އިންނަމާދޫއަށް ވަޑައިގެން އެރަށު ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ. އެމަނިކުފާނު ވިދާޅުވީ މިއަހަރުގެ ބަޖެޓުގައި އެންމެ ބޮޑު އިސްކަމެއް ދެނީ ބޯހިޔާވަހިކަމަށް ކަމަށާއި އެ ސިޔާސަތުގެ ދަށުން އިންނަމާދޫގައި 50 ހައުސިން ޔުނިޓު އެޅުމަށް ހުޅުވާލާނެ ކަމަށެވެ.

“މިމަހުގެ ބާކީ މިއޮތް ދުވަސްކޮޅުގެ ތެރޭގައި އަޅުގަނޑުމެން އިއުލާންކުރާނަން މިރަށުގައި އަޅާ ހައުސިން ޔުނިޓްތައް ހިމެނޭހެން ރާއްޖޭގެ ހުރިހާ ރަށްރަށެއް، އަޅުގަނޑު ވައުދުވީ ހުރިހާ މަޝްރޫއުތައް ހިންގުމަށް އެކި ފަރާތްތައް ހޯދުމަށް. އެ މަސައްކަތް މިމަހުގެ ތެރޭގައި އަޅުގަނޑުމެން ބިޑަށް ހުޅުވާލަން އެބަ،” ރައީސް ވިދާޅުވިއެވެ.

އެމަނިކުފާނު ވިދާޅުވީ ކޮންޓްރެކްޓަރުން ލިބި، ކައުންސިލުން އެކަމަށް ބިން ކަނޑައަޅެމާއެކު އެރަށުގައި 50 ހައުސިން ޔުނިޓުގެ ހައުސިން މަޝްރޫއެއް ހިންގުމަށް ނިންމާފައިވާ ކަމަށެވެ. އިތުރަށް ވާހަކަފުޅު ދައްކަވަމުން ރައީސް ވިދާޅުވީ މިއަހަރުގެ ބަޖެޓުގެ ތެރެއިން ދެން އެންމެ ބޮޑު އިސްކަމެއް ދެނީ ތައުލީމާއި ސިއްހީ ދާއިރާއަށް ކަމަށެވެ. އެހެން ނަމަވެސް އެރަށަކަށް ބަޖެޓު ކަނޑައަޅާއިރު ބަލާނީ އެރަށަކަށް އެންމެ މުހިއްމު ކަންކަން އިސްކޮށްގެން ކަމަށާއި އެގޮތުން އިންނަމާދޫއަކީ ފުޅާ ދާއިރާއެއްގައި އޮޑިބަނުމުގެ މަސައްކަތް ކުރާ ރަށެއް ކަމަށްވާތީވެ އެ މަސައްކަތް އިތުރަށް ފުޅާކޮށްދިނުމުގެ ގޮތުން ގިނަ ކަންތައްތަކެއް ސަރުކާރުން ރާވާފައިވާ ކަމަށް ވިދާޅުވިއެވެ.

އޮޑިފަހަރު ބަނުމުގެ ސިނާއަތުގައި އެރަށުގައި ހަރަކާތްތެރިވާ ވަޑިންނާއި މާވަޑިންނާއެކު މިއަދު ބޭއްވެވި ބައްދަލުވުމަށް އަލިއަޅުއްވާލައްވަމުން ރައީސް ވިދާޅުވީ އެބޭފުޅުންނަށް އެ ދާއިރާއިން ދިމާވެފައިވާ އެންމެ ބޮޑު ގޮންޖެހުމަކީ މަސައްކަތަށް ބޭނުންވާ ފައިސާ ނުވަތަ ފައިނޭންސް ހަމަޖެހުމަށް ހުރި ހުރަސްތައް ކަމަށެވެ. އަދި އެ މަސައްކަތް ކުރިއެރުވުމަކީ ސަރުކާރުން އިސްކަމެއް ދޭ ސިޔާސަތެއް ކަން ވެސް ރައީސް ފާހަގަކުރެއްވިއެވެ.

“މިއަދު އަޅުގަނޑުމެންނަށް ކުރެވުނު މަޝްވަރާގެ އަލީގައި އަދި މިދެންނެވި ސިޔާސަތުގެ ތެރެއިން އިރާދަކުރެއްވިއްޔާ އެއް ކަމަކަށް މި ދާއިރާގައި މަސައްކަތްކުރައްވާ ބޭފުޅުންނަށް ބޭނުންވާ ކަންކަމުގެ ތެރެއިން ލުއި ގޮތެއްގައި ރަހުނަކާ ނުލައި ލޯނު ނެގޭނެ ގޮތް އިރާދަކުރެއްވިއްޔާ ބޭންކިން ނިޒާމުގެ ތެރެއިން އަޅުގަނޑުމެން ހަމަޖައްސަވައިދެއްވާނަން،” ރައީސް ވިދާޅުވިއެވެ.

ބޭންކިން ނިޒާމުގެ ތެރެއިން އެކަމަށް ޓަކައި ލޯނު ނެގޭނެ މަގުފަހިކޮށްދެއްވާނެ ކަމަށާއި އެދާއިރާގައި ބޭރު މީހުން ގެންގުޅެން ބޭނުން ނުވާ ކަމަށް ރައީސް ވިދާޅުވިއެވެ. ސަރުކާރުން އެދާއިރާގެ ސިޔާސަތުތައް ބައްޓަންކޮށްފައިވަނީ ހަމައެކަނި ދިވެހިން އެމަސައްކަތުގައި ބާރުވެރިކޮށް ކުރިއަރުވާ ގޮތަށް ކަމަށް ރައީސް ވިދާޅުވިއެވެ. އެ ދާއިރާއަށް ޒުވާނުންގެ މެދުގައި ޝައުގުވެރިކަން ކުޑަކަން ފާހަގަކުރައްވައި ވާހަކަ ދައްކަވަމުން އެމަނިކުފާނު ވިދާޅުވީ އެކަމަށް މަގުފަހިކުރުމަށް ޓަކައި އިންނަމާދޫގައި ބޯޓުފަހަރު ބަނުމުގެ ފަންނު ކުރިއެރުވުމަށް ޓަކައި އެ ދާއިރާއިން ތަމްރީން ފޯރުކޮށްދޭ މަރުކަޒެއް ގާއިމް ކުރުމަކީ ކުރަން ގަސްދުކުރައްވާ ކަމެއް ކަމުގައެވެ. އެގޮތުން ސްކިލްސް ޑިވެލޮޕްމަންޓް މިނިސްޓްރީގެ ދަށުން އެކަމަށް ބޭނުންވާ ކަންކަން ހަމަޖައްސައިދީގެން އެ ދާއިރާއިން ކުރިއަރަން ބޭނުންވާ ޒުވާނުންނަށް ތަމްރީން ފޯރުކޮށްދެވޭނެ މަގު ފަހިކޮށްދެއްވާނެ ކަމުގައި ރައީސް ވިދާޅުވިއެވެ.

“އެކަން ފަހިކޮށްދެވި މިއީ ހަމައެކަނި ދިވެހިންނަށް ޚާއްސަ ދިވެހިން އެކަނި މަސައްކަތްކުރާ ދާއިރާއެއްގެ ގޮތުގަ، ތަމްރީންވެގެން އަންނަ ދިވެހިން އިތުރުވެގެންދާ ދާއިރާއެއްގެ ގޮތުގައި ވާތަން ދެކެން ބޭނުން. އެކަމަށް ސަރުކާރުން ކޮށްދޭންޖެހޭ ހުރިހާ ކަމެއް ކޮށްދޭނެ ވާހަކަ ދަންނަވާލަން” ރައީސް ވިދާޅުވިއެވެ.

މީގެ އިތުރުން އެރަށުގައި ބޯޓުފަހަރު ބަނުމަށް ދޫކުރާ ބިންތައް ދިގު މުއްދަތަށް ކުއްޔަށް ދެވޭ ގޮތަށް ސަރުކާރުގެ ތެރެއިން ކައުންސިލަށް އެކަން މަގުފަހިކޮށްދީގެން އެކަމަށް އިންވެސްޓުކުރާ މީހުންގެ އިތުބާރާއި ޔަގީންކަން ހޯދުމަށް މަގުފަހިކޮށްދެއްވާނެ ކަމަށް ވެސް ރައީސް ވިދާޅުވިއެވެ.