ރައީސް ޑރ. މުއިއްޒު މަސައްކަތްކުރައްވަނީ ދެވަނަ ދައުރެއް ހޯއްދަވާކަށް ނޫން: ފަލާޙް

Read Time:5 Minute, 12 Second

(ފޮޓޯ ކްރެޑިޓްސް: ވަގުތު)

ކޮންމެ ރައީސަކު ވެސް ވެރިކަމާ ހަވާލުވެވަޑައިގަންނަވަނީ ދެވަނަ ދައުރެއް ހޯދުމުގެ ނިޔަތުގައި ކަމަށާއި، އެހެން ނަމަވެސް ރައީސް ޑރ. މުއިއްޒު، ރައްޔިތުންގެ މަންފާއަށް ޓަކައި ކުރައްވަމުން ގެންދަވާ މަސައްކަތްފުޅުތަކަކީ ދެވަނަ ދައުރެއް ހޯއްދަވަން ކުރައްވަމުން ގެންދަވާ މަސައްކަތްފުޅުތަކެއް ނޫން ކަމުގައި އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމެންޓްރީ ގްރޫޕްގެ ލީޑަރު، އިބްރާހިމް ފަލާހް ވިދާޅުވެއްޖެއެވެ. ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ރ. އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި އިންނަމާދޫއަށް ވަޑައިގެން އެރަށު ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަ ދައްކަވަމުން މެމްބަރު ފަލާހް ވިދާޅުވީ އެމަނިކުފާނު ގައުމުގެ ވެރިކަމާ ހަވާލުވެވަޑައިގެންނެވި އިރު ކުރީގެ ސަރުކާރުތަކުން ނަގާފައިވާ ލޯނުތަކުގެ ސަބަބުން ބޮޑެތި ގޮންޖެހުންތަކެއް ކުރިމަތިލާން ޖެހުނު ކަމަށެވެ. އަދި އެ ލޯނުތައް ދޫކުރި ގައުމުތަކުން ވެސް އެތަކެތި ދޫކޮށްފައި ހުރީ ރާއްޖެއަށް “އަނިޔާ ލިބޭ ގޮތްތަކަށް ބަލައިގެން” ކަމުގައި ވެސް އޭނާ ވިދާޅުވިއެވެ.

“ވެރިން ވެރިކަމާ ހަވާލުވެވަޑައިގަތުމަށްފަހު ވެސް ކޮންމެ ވެރިއަކު ވެސް ހިތުގައި އޮންނަނީ ދެވަނަ ދައުރެއް މިއަދާ ހަމައަށް އައި އިރުގައި. އެހެން ނަމަވެސް ވަރަށް ޔަގީންކަމާއެކު އަޅުގަނޑު ދަންނަވާލަން ބޭނުންވާ އެއްވާހަކަ އެބަ އޮތް. އަޅުގަނޑުމެންގެ އިއްޒަތްތެރި ރައީސުލްޖުމްހޫރިއްޔާގެ ހިތްޕުޅުގައި ދެވަނަ ދައުރެއް އޮވެގެންނެއް ނޫން މިއަދު އެމަސައްކަތް ކުރައްވަނީ.” ފަލާހް ވިދާޅުވިއެވެ. ފަލާހް ވިދާޅުވި ގޮތުގައި ރައީސް ބޭނުންފުޅުވަނީ، އެމަނިކުފާނަށް ލިބިވަޑައިގަތް ފަސް އަހަރު ދުވަހުގެ ތެރޭގައި، ރާއްޖޭގައި އުފެދިފައިހުރި މައްސަލަތައް ހައްލުކޮށްދެއްވައި ގައުމު އަމާން ބަނދަރަކަށް ގެންގޮސްދިނުމަށް ކަމަށެވެ. އެގޮތުން ދެވަނަ ދައުރެއްގައި ކުރަން ކުރީގެ ވެރިން ނިޔަތްގަނެގެން ތިބި އެތައް ކަމެއް ރައީސް ޑރ. މުއިއްޒުގެ ސަރުކާރަށް މިވީ ކުޑަ މުއްދަތުގެ ތެރޭގައި ހައްލުކޮށްދެއްވާފައިވާކަން ފަލާހް ފާހަގަކުރެއްވިއެވެ.

އިތުރަށް ވާހަކަ ދައްކަވަމުން އޭނާ ވިދާޅުވީ ރައީސް އަޅުއްވަމުންދާ ފިޔަވަޅުތައް ގުޅިފައިވަނީ އިޖްތިމާއި ރީތި ފޭރާމުގައި އަޚްލާގު ގާއިމްވެފައި އޮތް ޒުވާން ޖީލެއް ބިނާކުރުމާ ކަމަށެވެ. އެގޮތުން މަސްތުވާތަކެއްޗާއި މުޖުތަމައުގައި ދެން ވެސް ހުރި ނޭދެވޭ ކަންކަމުން ސަލާމަތްވެފައި އޮތް ޒުވާން ޖީލެއް އުފެއްދުމުގެ މަސައްކަތް ކަމަށެވެ. “އަޅުގަނޑަށް ޔަގީން އެމަނިކުފާނު އެކުރައްވާ މަސައްކަތުގައި މުޅި ރާއްޖެ، ވަކި ރަށެއް ކުޑަ ރަށެއް ބޮޑު ރަށެއް ނިކަމެއްޗެއް ފަގީރެއް މުއްސަންޖެއް ނުބަލާ އެމަނިކުފާނު ތަރައްގީކޮށްދެއްވާނެ. ހެޔޮކޮށް ހިއްތަވާނެ.” ފަލާހް ވިދާޅުވިއެވެ.