ހުޅުމާލޭގައި އަޅަމުންދާ މިސްކިތުގެ މަސައްކަތް އަލުން ފަށައިފި

Read Time:3 Minute, 13 Second

ހުޅުމާލޭގައި އެސްޖޭ ކުންފުނިން އަޅަމުންދާ މިސްކިތުގެ މަސައްކަތް، ގިނަ ދުވަސްތަކެއް ވަންދެން ހުއްޓިފައި އޮތުމަށްފަހު އަލުން ފަށައިފިއެވެ. އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވި ގޮތުގައި، މިނިސްޓްރީއިން ބާރުއަޅައިގެން މިސްކިތް އަވަހަށް ނިންމުމަށް ކުރަންޖެހޭ ކަންކަން މިހާރު ދަނީ ކުރަމުންނެވެ. އަދި އަމިއްލަފުޅަށް އެތަނަށް ޒިޔާރަތްކުރައްވައި، ދިމާވެފައިވާ ދަތިތައް ބައްލަވައި، ޙައްލުކުރަންޖެހޭ ކަންކަން ޙައްލުކޮށްދެއްވަމުން ގެންދަވާ ކަމަށް ވިދާޅުވިއެވެ.

އެ މިސްކިތް އެޅުމަށް ގެންނަ ތަކެއްޗަކީ ޑިއުޓީ ފްރީ ތަކެތި ކަމަށް ދެކެވޭ ވާހަކައަކީ ދޮގު ވާހަކައެއް ކަމަށް ވަޒީރު ވިދާޅުވިއެވެ. 2022 ގައި މަސައްކަތް ފެށި ފަހުން މިއަދާ ހަމައަށް އެ މިސްކިތުގެ މަސައްކަތަށް ގެނެއި އެއްވެސް އެއްޗަކުން ޑިއުޓީ މާފްކޮށްފައި ނުވާ ކަމަށް ވަޒީރު ހާމަކުރެއްވިއެވެ. އެ މިސްކިތުގެ މަސައްކަތް ފަށާފައިވަނީ 2022 ވަނަ އަހަރުގެ ޖެނުއަރީ 23 ވަނަ ދުވަހުއެވެ. ނަމަވެސް، ގިބުލަ މާކު ކުރުމާއި، ގޯތީގެ އިން ވަކިކުރުމުގައި ދިމާވި މައްސަލަތަކާ ހުރެ މަސައްކަތް ވަނީ ގިނަ ދުވަސްތަކަކަށް ލަސްވެފައެވެ. އެގޮތުން، ގިބުލަ މާކު ކޮށްދިނުމަށް އެދި ދެ ފަހަރެއްގެ މަތިން ސިޓީ ފޮނުވައި، ގޯތީގެ އިންވަކިކުރުމުގައި ދިމާވި މައްސަލަތައް ހައްލުކުރުމަށް ގިނަ މަސައްކަތްތަކެއް ކުރަން ޖެހުނު ކަމަށް ވަޒީރު ވަނީ ވިދާޅުވެފައެވެ.

މިހާރު މަސައްކަތް ކުރިއަށްދާ ގޮތުން، 2023 ވަނަ އަހަރުގެ ޖޫން 24 ވަނަ ދުވަހު ވަނީ ފައުންޑޭޝަން އިންސްޕެކްޝަން ހަދައި، ކޮންކްރީޓް އެޅުމުގެ ހުއްދަ ދީފައެވެ. މިސްކިތް ނިންމުމަށް ކުރެވޭ މަސައްކަތުގައި އެސްޖޭ ކުންފުނީގެ އެހީތެރިކަން ލިބެމުންދާ ކަމަށް ވަޒީރު ފާހަގަކުރެއްވިއެވެ.