މަޑުއްވަރީ ބިން ހިއްކުމުގެ މަސައްކަތް މި އަހަރު ފަށާނަން: ރައީސް

Read Time:4 Minute, 36 Second

(ފޮޓޯ ކްރެޑިޓްސް: ވަގުތު)

ރ. މަޑުއްވަރީ ބިން ހިއްކުމުގެ މަސައްކަތް މި އަހަރު ފައްޓަވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ. ރ. އަތޮޅުގެ 11 ރަށަކަށް މިހާރު ކުރައްވަމުން ގެންދަވާ ދަތުރުފުޅުގައި މަޑުއްވަރީ އަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ މަޑުއްވަރީގެ ބިން ފުރި، އެކަށީގެންވާ ޖާގައެއް މިހާރު ނެތުމަކީ އެންމެ ބޮޑު މައްސަލަ ކަމަށެވެ. މަޑުއްވަރީ ފަޅު ތެރޭގައި ބިން އިތުރު ކުރުމަށް ވެސް މާ ބޮޑު ފުރުސަތެއް ނެތް އިރު، ހިއްކެން އޮތީ ހައެއްކަ ހެކްޓަރުގެ ބިން ކަމަށް އެމަނިކުފާނު ވިދާޅުވިއެވެ.

“އަޅުގަނޑު ވައުދުވިން ހިއްކެން އޮތް އެންމެ ފުޅާކޮށް، އެންމެ ބޮޑުކޮށް ހިއްކައި ދޭނެ ކަމަށް. އެހެންވީމަ އެ މަޝްރޫއަކީ އަޅުގަނޑު ވައުދުވީ ގޮތަށް ކުރިއަށް ގެންދާނެ ކަމެއް. މި އަހަރުގެ ބަޖެޓުގެ ތެރޭގައި އެ މަޝްރޫއު ކުރިއަށް ގެންދިއުމަށް އަޅުގަނޑު ވާނީ ނިންމާފައި،” ރައީސް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

“މި އަހަރުގެ ތެރޭގައި އެ މަޝްރޫއު (މަޑުއްވަރީ ބިން ހިއްކުން) ކުރިއަށް ގެންދާނަން، އެކަން ފަށާނަން،” ރައީސް ޑރ. މުއިއްޒު ވިދާޅުވީ މަޑުއްވަރީ ބަނދަރު ކުރިން ހެދިއިރު، “ބެކްފިލް” ނުކޮށް އޮތް ސަރަހައްދެއް އޮތުމުން މަދިރި އުފެދި ރަށުގައި ޑެންގީ ފެތުރުން ފަދަ ކަންކަން ހިނގަމުންދާތީ އެކަން ވެސް ހައްލު ކުރަން ޖެހޭ ކަމަށެވެ. އަދި ރަށުގެ ގިރާ ސަރަހައްދެއް އޮތުމުން އެކަން ވެސް ހައްލުކުރަން ޖެހޭ ކަމަށް ވިދާޅުވިއެވެ.

މީގެއިތުރުން ހިއްކާ ބިން ހިމާޔަތް ކުރުން ފަދަ ކަންކަމަކީ ވެސް އެކުއެކީގައި ކުރަން ޖެހޭ ކަންކަން ކަމުގައި ރައީސް ވިދާޅުވިއެވެ.

(ފޮޓޯ ކްރެޑިޓްސް: ވަގުތު)

“ދެ ބަނދަރު އޮތް އިރު، ދެ ބަނދަރުގައި ވެސް ވަނީ ކަންތައްތައް ކުރަން ޖެހިފައި. އެއް ބަނދަރުގައި ބޭރު ތޮށި ވެހިކަލް އެރޭ ގޮތަށް ބަދަލުކުރުމާއި އެކަމަށް ބޭނުންވާ މަސައްކަތްކޮށް ދިނުމާއި މި ހުރިހާ ކަމެއް އެކުއެކީގައި ކުރިއަށް ގެންދިއުމަކީ ދެކޮޅު ޖެހޭނެ ގޮތަކަށް ވާނީ،” ރައީސް ވިދާޅުވިއެވެ.

މަޑުއްވަރީއަށް ވައުދުވެވަޑައިގެންނެވި ކަންކަން

– 50 ހައުސިން ޔުނިޓް އެޅުން
– ބަނދަރުގެ މައްސަލަ ހައްލުކުރުން
– ބިން ހިއްކުން
– ގިރާ ސަރަހައްދު ހިމާޔަތް ކުރުން
– މަގު ހެދުމުގެ މަސައްކަތް ކުރުން
– ސިއްހީ މަރުކަޒު އަޕްގްރޭޑް ކުރުން
– ފުޓްބޯޅަ ދަނޑު ތަރައްގީ ކުރުން

ރައީސް ޑރ. މުއިއްޒު ވަނީ މި ހުރިހާ ކަމެއް ކުރިއަށް ގެންދަވާނެ ކަމުގެ ޔަގީންކަން މަޑުއްވަރީ ރައްޔިތުންނަށް ދެއްވައިފައެވެ.